1 Dhali shwane/ aha/ mina ka um gwo e mo, iwaḵ mo, e gwom ’borga/ jin c̱ikika/ um mo, a’di jin bu’thkina um mo dhali a’di jin doshkina um ap̱o/ mo be. 2 Gwo jin woṯẖkunu um mo waḵki/ um mini bu’th a’di mmoṯel shoki cine/ mo, – isi ciki/ um gamki a’di is ki p̱e’th mo.

3 Haali/ aha/ c̱ikina a’di um a’di jin midi mii ta to jin midi mii ta jin ṯwa/a/ mo a’di jin bu’thkika/ mo si’da/ ka Ḵrisṯẖos wuki’d mo gom miinthus bana mo isi me’d gwo ma Arumgimis kun ’kwarkunu mo be. 4 Dhali a’di kankunu mo dhali a’di cuki mis mo ka cim kwara isi me’d Gwo ma Arumgimis jin ’kwarkunu mo be. 5 Dhali a’di piki’da Sap̱a i is mo dhali yan’ko’d e uni gun tana ’kume’d i’ce’dka su/ mo be. 6 Dhali yan’ko’d a’di piki ’kwani gun bol ’kwani e mo kun ’koni iss*ḵumsumiyya ’kwanimpa i/iss ’de/ i’ce’dki iss ’kwanimpa imudhe’d ap̱o/ mo ki me’d ’deŋ gana/ mo. Kun tiya ka woho/ mo tani uni ’kon ki e mo naskina/, ba kun tiya uni i/ishki e mo be. 7 Yan’ko’d a’di piki’da Yakuubi is mo, dhali yan’ko’d a’di piki uni ’baar mo i is mo kun dhunu ki she/ mo. 8 Dhali ’ko’di uni ’baar mo tani a’di piki aha/ i is si’da/ mo me’d ara ŋan ’de/ jin daḵa sulu adho’th mo be. 9 Haali/ aha/ tana a’di jin p̱isi’d ki uni gun dhunu ki she/ mo, mmodika/ ki ha me’d mo jin minu yuḵ aha/ ki a’di jin karu ki she/ mo haali/ aha/ ṯo’ckina aḵaniisa ma Arumgimis bwa mo be. 10 Hili ka ’the ma Arumgimis mo tani aha/ be itana aha/ mo, dhali ka ’them piti ’kup̱ ki aha/ mo tani a’di yisa ki p̱etha. E gwo gi c̱a’ckon mo tani aha/ miikina ṯu’c jin ’batha’ba’th mmobol unin tiya e mo gun miikin mo. Ba a’di yisa ta aha/ mo, hili a’the ma Arumgimis mo, a’di jin diki’d e aha/ mo be. 11 Waḵki/ a’di ta aha/ walla uni mo tani wakan aman c̱ikina um gwo mo dhali wakan um gamki gwo is mo be.

12 Dhali waḵka Ḵrisṯẖos c̱inu gwo mo me’d jin pikina a’di mo ’peni mowu mo tani kata ona uma tiya gwo mo ki mo jin piyunu/ mo ’peni mowu mo p̱iyi’d mo? 13 Hili waḵki/ mo jin piyunu/ mo ’peni mowu mo p̱iyi’d mo tani aḴrisṯẖos si’da/ yisa ’de’kkunuwa. 14 Waḵka Ḵrisṯẖos minu ’taki ’koki ’de’k mo tani gwo jin c̱ina aman mo tani midi ta jim p̱e’th mo dhali moŋgam gwo is bum mo si’da/ midi ta jim p̱e’th mo be. 15 Isi kan aman mina ta ku gi minu gam mo gun thisu hash mo goma Arumgimis mo haali/ aman ṯena gwo mo goma Arumgimis mo ki a’di ’de’kki’da Ḵrisṯẖos mo ’peni mowu mo a’di jin dina a’di ki ’de’k mo waḵki/ a’di ta gwoŋ gana/ mo waḵki/ uni gun wukin mo ’konuki ’de’k mo be. 16 Haali/ waḵki/ uni gun wukin mo ’konuki ’de’k mo tani wakan si’da/ Ḵrisṯẖos dinuki ’deku/ mo be. 17 Waḵka Ḵrisṯẖos ’konuki ’deku/ mo tani moŋgam gwo is bum di’d ki p̱e’th mo dhali um ’kon mo naskina/ e miinthus mo be. 18 Dhali uni gwansan si’da/ gun ishki e mo eya Ḵrisṯẖos mo tani minu ’ce’d sho’k mo be. 19 Waḵki/ e moŋ’koki/e yan jasi kan mo tani ana gun ’kona eya Ḵrisṯẖos mo tana gi mo ma ’teŋ kap̱e/ mo tani ana ’baar mo tana ’kwani gun boṯa ki shi/ gana/ mo mmobol ’kwanin tiya ’baar mo e mo be.

20 Hili shoka ’cesh gana/ mo tani aḴrisṯẖos ’de’kkunu mo ’peni mowu mo, a’di yansan jin ta maman jin ṯwa/a/ ki uni gwansan kun ishki e mo be. 21 Haali/ ki wathimpa mo tani a’di p̱u’dkina wu mo dhali ki wathimpa mo tani a’di p̱u’dkina mo jin piyunu/ mo si’da/ ’peni mowu mo be. 22 Haali/ me’d jin wukina ’kwani ’baar mo eya Aadam mo tani wakan si’da/ eya Ḵrisṯẖos mo tani aris uni ’baar mo minu dhu ki e mo be. 23 Hili aris ’kwani ’baar ka ’deṯe/ ’deṯe/ mo e mo ma p̱ara p̱om buni mo tani aḴrisṯẖos ta maman ma ’kaŋ ’kup̱ jin ṯwa/a/ mo dhali yan’ko’d e yam piti jin mina a’di p̱u’du/ mo tani uni gwansan kun ta ku ma Ḵrisṯẖos mo be. 24 Yan’ko’d ’pemen midi p̱u’du/ mo ki a’di midi c̱i bampa/ ka Arumgimis mo a’di jin ta Com mo i’ko’di a’di midi ’ce’da ris mo gun tanu tap̱a sho’k mo dhali aris mo gun tanu ki moshirr mo dhali aris mom’bi’th mo be. 25 Haali/ a’di midi mii ta Tap̱a mo ntagi a’di midi dhu aris uni ’baar mo kun ta ’kup̱ gi a’di mo e bwaŋ’kwariny sho’k piti mo be. 26 Dhali ’kup̱ jin ta jiŋ ’ko’d jin minu ’ce’d sho’k mo tani ta wu mo be. 27 Haali/ Arumgimis dhuki’da ris to ’baar mo ’ko’di me’d piti mo e bwaŋ’kwariny sho’k piti mo be. Hili ki a’di o gwo mo ki: Aris to ’baar mo dhukunu mo ’ko’di me’d piti mo e bwaŋ’kwariny a’di mo tani a’di di’da tente/ ba/ ki a’di jin dhuki’da ris to ’baar mo e bwaŋ’kwariny me’d piti kan mo tani a’di di’d ka p̱o/ mo be. 28 Ki aris to ’baar dhukunu mo ’ko’di me’d piti mo tani Ya/ si’da/ ki is piti mo minu kar ’ko’di me’di a’di mo a’di jin dhuki’da ris to ’baar mo e bwaŋ’kwariny me’d piti mo, ka Arumgimis midi ta aris to ’baar mo goma ris ’kwani ’baar ka ’deṯe/ ’deṯe/ mo be.

29 Mac̱a/ ’te/ ba/. Ki gwonta ona ’kwani gwo mo gom gwo jin miinuwa mii ki yi’de/ mo gom gway gi uni kun wukin mo? Waḵki/ uni kun wukin mo ’konuki ’deku/ ’baar mo tani atinta miinu ’kwani ki yi’de/ gom gway buni mo? 30 Kata si’da/ dikika/ e mo jin ’dishi ’twa/ aha/ wu mo? 31 Aha/ usha mo, iwaḵ mo, gom miim pem jin karka/ is ki ca mo e um mo a’di jin taka/ eya Ḵrisṯẖos jin ta’da Yesus Tap̱am bana mo tani aha/ wukina isa yempa/ mo be. 32 Dhali to jin ta shi/ miim ’boro’d gom aha/ mo tani ta’da ta mo waḵki/ aha/ ona gwo me’d wathi/ en’thi/ mo, waḵki/ aha/ askina ki to/e gi Pan Ep̱asus mo? Waḵki/ uni gun wukin mo ’konuki ’deku/ mo tani: Dhalki ana shwana to mo dhali p̱i to mo haali/ ka’thamo/ mo tani ana ki wu mo be. 33 Dhalku/ ki ta ku gun minu he’k e mo. Mii jin cenu e ki tonthus mo tani uni shi/i miim ’boron kun boṯu mo be. 34 Kulumi gwo ibwa mo ki kulum gana/ mo ma. Dhali dhalku/ miinthus ki mii mo doḵ/e haali/ kun tiya ’koki misha Arumgimis mo. Aha/ ona gwo yansan mmo’the um is mo be.

35 Hili ’kwanin tiya ka ’deṯe/ ’deṯe/ mini doṯ gwo mo ki: Ki ku gun wukin minu ’deku kataye? Dhali ki buŋgwar is jin wakata imina uni p̱u’du/ mo? 36 /E wathim p̱us yan mo! To jin sina /e mo tani a/a’di midi di ki e iṯwa/a/ mowa hili isi ciki/ a’di midi wu mo be. 37 Dhali a’di jin sina /e mo tani diki ta buŋgwar is mo jin mina a’di di mo tani, hili jasi emena ’de/ mo, wariba/ midi ta pos bunyan mo walla emen posa kamu/ mo. 38 Hili Arumgimis ki c̱i a’di buŋgwar is me’d jin kwanykina a’di a’di mo. Dhali arisa ḵa’bany to ki she/ ki she/ mo tani c̱ina a’di buŋgwar is buniŋ gana/ mo be. 39 Haali/ aris shuman is yisa nyaḵkana, hili buŋgwar is ṯal ’de/ gom ’kwani en’thi/ mo, dhali buŋgwara kamu/ goma ris tonycuḵ mo, dhali buŋgwara kamu/ goma ris tonyjeshe/ mo dhali buŋgwara kamu/ goma ris to yi’de/ mo. 40 Wakan si’da/ aris buŋgwar isa tiya ta ku gi momis mo dhali wakan si’da/ aris buŋgwar isa tiya ta ku ga ’cesh mo. Hili monyca gi buŋgwar is gi momis mo tani a’di ṯal ’de/ mo dhali monyca gi buŋgwar is ga ’cesh mo tani a’di ta jaŋ kamu/ mo be. 41 Dhali monycaŋ kamu/ ’de/ goma tente/ mo dhali monycaŋ kamu/ goma ppe mo dhali monycaŋ kamu/ goma risa cul mo. Haala cula kamu/ dina ca ki she/ ’pena cula kamu/ mo be.

42 Wakan si’da/ a’di nyaḵka’d ki mo jin pinu ’peni mowu mo be. A’di jin sikunu mo tani a’di mishi p̱u/ mo, dhali a’di jin ’de’kkunu mo tani a’di moli p̱u/ mo be. 43 A’di sikunu mo ki dar gi montaḵ mo, dhali a’di ’de’kkunu mo e monyca mo. Dhali a’di sikunu mo ki is jin ’ka’da’d mo, dhali a’di ’de’kkunu mo ki mom’bi’th mo be. 44 A’di sikunu mo ki is buŋgwar jin ta shuman is mo dhali a’di ’de’kkunu mo ki buŋgwar is jin ta ji gi to gi shi/in mo. Waḵki/ buŋgwar is jin ta ji gi shuman is di’d mo tani wakan si’da/ buŋgwar is gi to gi shi/in di’d mo be. 45 A’di i’kwarkunu gwo gi wakan mo be ki: Dhala Aadam yan jin ta jin ṯwa/a/ mo tani warki’d ki to jin di ki e mo, dhala Aadam jin ta jiŋ ’ko’d mo tani warki’d ki shi/in jin c̱i mondiki/e mo be. 46 Hili a’di yisa ta to gi shi/in jin ta jin ṯwa/a/ mo, hili a’di jin ta ji gi shuman is mo dhali yan’ko’d ji gi to gi shi/in mo be. 47 Wathi/ jin ta jin ṯwa/a/ mo tani a’di ta jany ’cesh mo, wathi/ jin cila bu’d mo. Dhali wathi/ jin ta jiŋ ’ko’d mo tani a’di ’peni momis mo be. 48 Me’d jin tana wathi/ jim bu’da ’cesh mo tani wakan si’da/ aris uni gwansan ta ku gi bu’da ’cesh mo. Dhali me’d jin tana wathi/ ji gi momis mo tani wakan si’da/ uni gwansan kun ’kon e momis mo. 49 Me’d jin ḵalkina ana jamas gi wathi/ gi bu’da ’cesh mo tani ana si’da/ mina ḵal jamas gi wathi/ jin ta ji gi momis mo be. 50 Aha/ ṯora um gwo yansan mo, iwaḵ mo, shuman is dhala bas mo tani uni mol mal gi Bampa/ ma Arumgimis gam mo walla si’da/ to jin mishi p̱u/ mo tani mol gam mal gi a’di jin moli p̱u/ mo be.

51 Hili, aha/ ṯora um gwo jin ta jim bag mo. Ki ana ’baar mo mina ’koki ish e mo be, hili aris ana ’baar mo minu aḵ e mo be, 52 e mo jin ta ari mo mo, dhali e mo jin ’kamu’thkunu e mo tani ka poome/ jin ta jiŋ ’ko’d dhalkunu me’d mo be. Haala poome/ midi koyu/ mo dhali uni gun wun mo tani minu ’deku/ mo e buŋgwar kun moli p̱u/ mo dhali ana minu aḵ mo be. 53 Haali/ buŋgwar is yan jin mishi p̱u/ mo tani midi mii war gi buŋgwar is jin moli p̱u/ mo dhali buŋgwar shuman is yan jin mishi wu mo tani midi mii shum mo ki mo jin moli wu mo be. 54 Ki a’di jin mishi p̱u/ mo midi shum mo ki a’di jin moli p̱u/ mo tani dhali a’di jin mishi wu mo tani midi shum mo ki a’di jin moli wu mo tani yan’ko’d a’di mina gwo p̱u’du/ mo jin onu jin ’kwarkunu mo cikise/ mo be ki:

58 Wakan um pem gun enka/ mo, kun tana waḵ mo tani ṯeli mo dhali tayi ku gi minu mol joc̱ mo dhali ’dap̱i ’twa/ mo isa yempa/ eya ṯu’c gi Tap̱a mo mmomisha um ki um ’koki miiya ṯu’c gi Tap̱a ki p̱e’th mo be.