Gwo jin ’Kon ma P̱o/i Kwara jin ’Kwar ma YOHAAN mo
1
Monthe Me’d mo
1 Wathiŋ gwanyjaḵa/ eya Gayus jin enu mo, a’di jin enka/ e gwoŋ gana/ mo.
2 /E jin enu mo, aha/ ’thona ka ris to ’baar mo mini ii ki ’bore/ gom /e mo dhali ki /e mina isi ’bor mo. Aha/ misha mo mo ki a’di ’boro’d goma ḵashiram pini mo be. 3 Haali/ aha/ ’bora bwa kagahara mo ki ’kwani ma waḵa tiya bumburkin mo dhali c̱i gwo gom miiŋ ganam pini mo ka jiŋ gana/ me’d jin baṯẖkina /e gwoŋ gana/ mo. 4 Moŋ’kuny bwaŋ kamu/ yisa di’da jin ca’d ki a’di yan jin miga/ mish ta mo, mmociḵ gwo ki uc̱im pem baṯẖi gwoŋ gana/ mo.
Mii ma Gayus jin Tanu Gu’b Piti Ŋal mo A’di Maŋu mo
5 /E jin enu mo, a’di ta’da ṯu’c isiŋ gana/ mo jin miikina /e ki /e mii to mo ma waḵ mo isi ki ji mum mo eya ris yilkina/ mo 6 uni gun c̱iki gwo gom mo/en pini ibwambor ma ḵaniisa mo. /E mini mii ki ’bore/ mmohashki uni e bway buni gun iina uni mo me’d jin hana to me’d mo goma ṯu’c ma Arumgimis mo be. 7 Haali/ uni cuki mis mo gom gway piti mo dhali uni ’koki bu’th toŋ kamu/ ’peni ’kwani kun ’koki ta ’Kwani Yahuuda/ mo. 8 Wakan ana ḵa ba/ imina han ’kwani kun wakan mo ki ana mina ta imannyaḵ to mii e gwoŋ gana/ mo be.
Mii ma Diyutriip̱is jin Miina A’di ki C̱a’ckon mo
9 Aha/ ’kwarkina gwoŋ kamu/ goma ḵaniisa mo. Hili Diyutriip̱is a’di jin ona bwa ki kar is piti nṯwa/a/ mo tani diki pi gwo gom moshirr pem mo. 10 Wakan waḵki/ aha/ mina p̱u’dku/ mo tani aha/ mina ḵal gwo ka pije/ mo gom to jin miina a’di mo mmoyer aha/ is ki gway ka wuny is ki gwonthus mo. Dhali a’di diki ’kosh jwa kan tan mo tani a’di ushki’d ki is piti mo mmohana waḵ mo, dhali a’di si’da/ ki non uni gwansan ’kup mo kun ona bwa ki han uni mo dhali a’di ki ur uni ka pije/ ’pena ḵaniisa mo.
Gwom ’Borga/ jin C̱inu Isi goma Dimiṯriyuus mo be
11 /E jin enu mo, dhalku/ ki baṯẖ tonthus mmomii mo ma, hili baṯẖi a’di jin ’boro’d mmomii mo. A’di jin mii tom ’boro’d mo tani a’di ’peni Arumgimis mo. A’di jin mii tonthus mo tani diki p̱ar Arumgimis e mo be. 12 Dimiṯriyuus a’di ta gi gwo jin c̱ina ’kwani ’baar ka ’deṯe/ ’deṯe/ mo dhali ’peni gwoŋ gana/ ki is piti mo. Aha/ c̱ina gwo gom a’di si’da/ mo dhali um mishi mo mo ki gwony c̱im pem ta kuŋ gana/ mo be.
Ḵwalany Monthe Me’d jiŋ ’Ko’d mo
13 Aha/ tana gi gwo kagahara mo mmo’kwarki /e mo tani hili aha/ dina bwa ki o mmo’kwarki /e a’di ka galama risha mo. 14 Aha/ ṯosha mmop̱ar /e e ki ’dishe/ mo dhali ana mina ṯora ṯor mmonṯal ’de/ ka ḵarambuye/ mo.
15 Moŋḵu’th is midi di e /e mo. Ikam theki /e me’d mo. Theki ikam me’d mo ma, aris uni ’baar ka ’deṯe/ ’deṯe/ mo.