1 Hili wathiŋ kamu/ jin yuḵu gway ka Hananiyya uni ki ash jin yuḵu ka Sap̱p̱iira mo tani uni yoli mo jin tana uni mo 2 dhali boc̱kina guurush ’pen ’pena guurush gi she yol piti mo, ashim piti si’da/ nyaḵ mishki a’di mo. Dhali a’di ’doyi’da guurush gi ’bana kamu/ mo dhali dhu a’di isho’k gi imandhun ma Yesus ki she/ mo. 3 Hila Buṯerus ki o a’di gwo mo ki: Hananiyya, ata ’tu’d ma Seṯaan eya dum pini mmotham gwo o ki Shi/in Dheleladhelel mo dhali boc̱ ’bana kamu/ ’pen ’pena guurush jin yolu/ mo mo sa/? 4 Ki a’di dinuki yol naskina/ mo tani dina a’di ki ta jim pini /e ’deya? dhali ’ko’di a’di yolkunu mo tani dina /e ki ta gi ’bi’th ap̱o/ a’diya? Mii yan di /e ibwam pini mana kan? Gwon thus thamkina /e ki ’kwaniny’cesh yisa, hili thama /e ka Arumgimis mo be. 5 Dhali mmociḵ ma Hananiyya gwo gwansan mo tani a’di biṯki’da ’cesh mo dhali c̱i shi/in piti mo be. Dhali moŋḵogu caaca yayi’da p̱o/ uni ’baar kun ciḵ a’di mo be. 6 Dhali ’kwanin dhuru’c cuki mis mo dhali ’tam a’di is mo dhali ḵal a’di ka pije/ mo dhali kan a’di mo be.

7 Dhali mo ta’da tente/ jin wana e ka tente/ kwara mo mmoshor ma tente/ is i’ko’d me’dyan yayina ashim piti si’da/ ka enthus mo mmomola a’di a’di jin miikunu mo be. 8 Dhala Buṯerus oki’da yim gwo mo ki: Ṯor aha/ gwo mo ma, mo yola um ka guurush wa cikise/ mo ’taa? Dhala yim ki thoḵ a’di gwo mo ki: Nye, ka guurush wakan mo be. 9 Hila Buṯerus oki’da yim gwo mo ki: Ata gama um gwo me’d mmonṯal ’de/ mmopal Shi/in gi Tap̱a kan mo? Hili ma, sho’k gi uni gun kankina kaṯẖin mo tani uni ’koni shan’tamo/ mo dhali uni mini ḵal /e ka pije/ gara/ mo be. 10 Dhali ise/ a’di biṯki’da ’ceshi sho’k piti mo dhali c̱i shi/in piti mo dhali ’kwanin dhuru’c seyin mo dhali gama yim wuki’d mo be dhali uni ḵalki a’di ka pije/ mo dhali kan a’di ka remambor ka kaṯẖim piti mo be. 11 Dhali moŋḵogu caaca yayi’da p̱o/ ḵaniisa ’baar mo dhali ap̱o/ uni ’baar mo kun ciḵ to gwansan mo be.

12 Dhali ki me’d gi imandhunu ki she/ mo tani momer ka ris dhali dhan mii caaca si’da/ miikunu mo ibwaŋ ’kwani mo be, dhali uni ’baar mo ’kon ki bwan ṯal ’de/ eya lambalany ma Sulemaan mo. 13 Hili ’peni uni gun ’ko ki she/ mo tani wathiŋ kamu/ yisa di’da jin eni uni mmo’dish mo is mo. Hili ’kwani maŋ uni kagahara mo be. 14 Dhali imangam gwo is mo maru is ki nyanye/ e Tap̱a mo, awaambuhany ’kwani kun ta ’kwaniŋ gwas uni ki up̱i lu/ mo. 15 To miikunu ki nyanye/ mo tani uni si’da/ ki ḵal kum ’bathan e bway mo dhali ’thi uni eya ci mo dhala birish si’da/ mo ka Buṯerus mmopena a’di uni mo tani aḵashiram piti midi ’taki wup̱a p̱o/ unin tiya ’peni bwam uni mo be. 16 Dhala waambuhany ’kwani si’da/ iiyin mmonṯal ’de/ mo ’peni pa kun ’kon is ’ko’d ’peni Pa Urushaliim mo mmo’doyu/ ’kwani kun ’bathan mo dhali uni gun ṯoju bwa ka rum thus kun nyo/on mo dhali uni ’baar wac̱kunu ki ’beles mo be.

17 Dhala gasiis jin ca’d doshki’d ki mis mo dhali uni ’baar mo kun nyaḵ ’ko ki a’di mo (uni kun ta c̱eŋ ’Kwani Sadukiyiin) dhali uni ’tu’du/ mo ki mondeeya du mo 18 dhali uni ki bu’th imandhun ma Yesus ki she/ mo dhali dhu uni mo e mo jin jinu ’kwani mo. 19 Hila man’doyu gwo gi Tap̱a mon’thiny mo tani a’di ḵa’dki’da sijin ’twaŋkal mo dhali sus uni ka pije/ mo dhali o gwo mo ki: 20 Iiyi um mo dhali doshi mo dhali ṯor ’kwani aris gwo ’baar mo gom mondiki/e yan e gu’b gi mondheleladhelel mo. 21 Dhali ki uni ciḵ yan mo tani uni sekin e gu’b gi mondheleladhelel ki mo ḵali kush mo dhali uni ki ṯor gwo mo.

Hili agasiis jin ca’d yayi’d mo dhali uni kun nyaḵ ’ko ki a’di mo dhali yuḵ uni mo imontul is buni yan imonṯal ’de/ mo dhali montul isa kamu/ ki ’kwani gwanyjaḵa/ gi ’Kwani ma Israyiil mo dhali uni ki hash gwo i gu’ba sijin ki uni minu susu mo be. 22 Hili iboliish kun iikin mo tani uni ’koki gam uni eya sijin mo dhali uni doḵkin mo dhali ṯor gwo mo 23 mmo/o gwo mo ki: Gu’ba sijin gamkina am ki mu’th ki ’dantar mo dhali imanhil mo mo mmodosh ishan’tamo/ mo. Hili ki am ḵa’dkina a’di mo tani am ’konaki gam wathiŋ kamu/ nycine/ mo. 24 Dhali ki tap̱a jin ca’d ki imanhil gu’b gi mondheleladhelel mo dhali igasiis kun can mo ciḵ gwo gwansan mo tani uni duŋkurkin ma du is mo gom uni mo mmomina to yan ita ata mo. 25 Dhali jin ṯal ’de/ yayi’d mo dhali ṯor uni gwo ki: Hili mo mo ma, ’kwaniŋ gwas kun dhukina um eya sijin mo tani uni ’kon e gu’b gi mondheleladhelel mo mmodosh mo dhali mmoṯor ’kwani gwo mo. 26 Ŋ’ko’d Tap̱a jin ca’d gi imanhil gu’b gi mondheleladhelel mo uni ki iboliish mo tani uni iikin mo dhali sus uni ki dar gi mondor mo haali/ uni ki ḵo/ ’kwani mo gom uni minu ’taki ’kosh ki wosh mo.

27 Dhali ki uni suski uni mo tani uni ki dhu uni ibwambor montul is buni yan mo. Dhala gasiis jin ca’d doṯki uni gwo mo 28 mmo/o gwo mo ki: Am ḵankina um gwo ki ’bi’th mo mmo’koki ṯor gwo ki gway yansan mo, dhali hili ma, um ’tu’di Pa Urushaliim ki gwonṯor bum mo dhali um o ki guya bas wathi/ yan mmokara p̱o/ am mo.

29 Hila Buṯerus dhali imandhun ma Yesus ki she/ mo uni thoḵ gwo mo dhali o gwo mo ki: Am mina mii mii gwo ma Arumgimis mo, yisa jiŋ ’kwaniny’cesh yisa. 30 Arumgimis gi ibabam bana ’de’kki’da Yesus jin ’kosha um jwa mo mmohankina um a’di imis cwa mo. 31 A’di karkin ma Arumgimis ki ca ki me’da bim poros piti mo mmota Amanṯel Mondiki/e ’Pen mo dhali ka Manwoṯẖ mmoc̱i mo jin rijuwa du is ki ’Kwani ma Israyiil mo dhali moŋgwam gom miinthus mo. 32 Dhali am tana iman/o gwo gom to gwansan am ki Shi/in Dheleladhelel si’da/ jin c̱in ma Arumgimis gom uni kun ha gwom piti e mo mmomii mo be.

33 Hili ki uni ciḵ gwo yansan mo tani uni c̱ithirkin ma dum buni ka nyor mo dhali ’kona gwo bwa mo mmo’kosh uni jwa mo. 34 Hili jan ṯal ’de/ doshki’di bwam uni imontul is buni yan jin ta Wathim P̱arisi jin yuḵu ka Ghamala/iil jin ta’da manṯor gwo gom gwoŋḵan jin c̱inu mo dhali a’di jin taḵu ki momaŋ caaca ibwam ma ris ’kwani ’baar mo. Dhali a’di ḵanki gwo ki uni mini thoṯẖki imandhun ma Yesus ki she/ is ’ko’d naskina/ mo. 35 Dhali a’di ki o uni gwo mo ki: Um ’Kwani ma Israyiil, ’cunycuri is bum mo ma gom ’Kwani gwansan mo gom to kun mura umi mii mo. 36 Haali/ ka cim jin ṯwa/a/ gwansan mo tani Ṯẖudaas doshki’d mo mmoṯor is piti ki a’di ita jaŋ kamu/ jin ca’d mo. ’Kwaniŋ gwasa tiya wana e ki iss*urbumiyya ’kwanimpa i/iss ’de/ mo gam is buni me’d ki a’di jin ’koshu jwa mo, dhali uni ’baar mo uni kun mii gwom piti mo tani uni c̱ekerkunu bwa mo dhali toŋ kamu/ yisa gamu ’peni a’diya. 37 ’Ko’di wathi/ yan mo tani Yahuusa gi Pany Jaliil ka cim gi moŋ’kwaru ’kwani gway mo a’di doshki’d si’da/ mo dhali a’di ki sus ’kwanin tiya per mo mmobaṯẖ a’di mo. A’di si’da/ this e mo dhali uni ’baar mo, uni kun mii gwom piti mo tani uni si’da/ c̱ekerkunu bwa mo. 38 Dhali shwane/ aha/ ona um gwo mo ki: Ḵwa/i is bum bwa mo ’peni ’kwani gwansan mo dhali dhalki uni ’kon uni ’cena mo. Haali/ waḵki/ gwo jin onu yan walla mii yan ta jiŋ ’kwani mo tani a’di minu ’taki p̱i e mo be. 39 Hili waḵki/ a’di ta ji ma Arumgimis mo tani um mini mol p̱i uni e mo be waḵki/ um minu ’taki gam mo mmo’ko mmo/asa p̱o/ Arumgimis kan mo.

40 Dhali gwom piti gama uni me’d mo. Dhali ki uni yuḵki imandhun ma Yesus ki she/ i uni mo tani uni ki dor uni mo dhali ḵan uni gwo mo ki uni mini ’koki o gwo ki gway ma Yesus mo dhali uni ki dhal uni mo mmo/ii mo be. 41 A’di iina uni mo ’peni bwambori montul is yan mo mmo’bora uni bwa mo ki uni dhunu ki montaḵ wakan mmo’kosha uni is ka nyor kan ki mon’the is mo gom gway yan mo be. 42 Dhali isa yempa/ e gu’b gi mondheleladhelel mo dhali e pa mo tani uni ’koki daḵ gwo mo mmoṯor mo dhali mmoc̱i si’da/ mo ka Yesus yan ita’da Ḵrisṯẖos mo be.