1 Dhali ki gwo gamu me’d mo jin mina amani ’taki ii eya ḵur yi’de/ jin bela ’tham ki bway gi Pa Ithaaliya mo tani uni c̱ikina Buulus mo dhali uni ahabuusa tiya e me’d ma mancil ma askar iss ’kwanim pa imudhe’d mo jin yuḵkunu gway ka Yuliyuus mo ’peni mo jin jin ma askara ji eya Ughusthus mo. 2 Dhali mmomerkina aman ap̱oŋ ḵur gi Pa Adramiṯiniyya jin bela ’tham mo jin muru ’cuḵ mo mmo/ii iyi’de/ e mon tiya eya gap̱ gi Pa Asiyya mo tani aman ’cuḵkina aḵur yi’de/ e yi’de/ mo dhali jan ṯal ’de/ jin ta’da Aristarḵus gi Pa Makiduniyya mo ’peni Pan Tasaluniiki mo tani a’di nyaḵ di ki aman mo. 3 Dhali ka cim jiŋ ’ko’d mo tani am takina Pan Saydaa/ ki me’d mo. Dhala Yuliyuus mii’da Buulus me’d wathimpa mo dhali mmodhal a’di bway mo mmoya mo e ikam piti mo dhali a’di ta wathimpa ki is piti mo be. 4 Dhali mmo’cuḵkina amana ḵur yi’de/ jin bela ’tham ’peni mun mo tani aman iikina eya ḵur jin bela ’tham mo mmosheshela gap̱ gi Paŋ Kuprus mo gom ’tham ’kon ki c̱a’ckon mo. 5 Dhali ki aman iikina eya ḵur yi’de/ jin bela ’tham mo mmo’ciṯẖ dhan yi’de/ jin di’d ’twa/ ki mis gi Paŋ Kilikiyya mo dhali Pam Pamp̱iliyya mo tani aman p̱u’dkina e Pam Mira gi Bampa/ gi Pa Likiyya mo. 6 Dhali imun mo tani amancil ma askar iss ’kwanim pa imudhe’d mo gamki’da ḵur yi’de/ jin bela ’tham mo ki bway gi Pa Iskandariyya mo mmoya iyi’de/ ki bway gi Pa Ithaaliya mo dhali a’di ṯu’cki am mmomer a’di ap̱o/ mo. 7 Dhali aman iikina i yi’de/ ka serec̱, ka serec̱ mo ka cim ka ris mo dhali ki aman p̱u’dkina mo ki mii kun diṯadiṯ mo ap̱o/ Paŋ Kiniidus mo mmonona ’tham am ki bway naskina/ mo tani aman iikina eya ḵur jin bela ’tham mo mmosheshela gap̱ gi Paŋ Kariiṯ ap̱o/ Pan Salmuuni mo be. 8 Dhali ki mii kun diṯadiṯ mmota agap ki me’d mo ki sule/ tani aman p̱u’dkina mo e moŋkamu/ jin yuḵkunu ki Mo jin Dhunuwa Ḵur Yi’de/ ki Jaro/ mmo’dish Pa Lasaa/iya is mo be.

9 Dhali ka cim ’baarkunu ki nyanye/ mo dhali ki mo/ii jin ta jin ṯagu wu hila/ mo tani haali/ moŋga/ to pekunu hila/ mo tani aBuulus ḵucurki uni ki gwom ’borga/ 10 dhali oki uni gwo mo ki: Kana, aha/ nyiṯẖa ki mo/ii midi washi/a dhali mo jin minu this to e midi caaca mo, yisa jasi to kun ḵalu yisa dhala ḵur jin bela ’tham mo yisa hili si’da/ moŋ’koki/em bana mo. 11 Hila mancil ma askar iss ’kwanim pa imudhe’d mo c̱iki’da dum piti ki nyanye/ ki gwo gi tap̱a ma ḵur yi’de/ jin bela ’tham mo dhali com ma ḵur yi’de/ si’da/ mo, yisa ki gwon to gwansan kun okin ma Buulus mo. 12 Dhali haali/ mo yan jin dhunuwa ḵur yi’de/ mo diki ta a’di jin karu ki ’bore/ mo mmo’baara ppe gi mondiṯ mo tani a’bana tiya o gwo mo mmo’cuḵa ḵur yi’de/ jin bela ’tham mo mmo/ii mo ’peni mun, waḵki/ a’di midi ’taki ta isi mii gom uni mmomish p̱u’d e Pam P̱iniks mo dhali ’baara ppe gi mondiṯ mo imun mo jin ta mo jin dhunuwa ḵur yi’de/ gi Paŋ Kariiṯ jin hili ’kup̱ ki mom’pesho’k gi ’ko’d gwar ma bim poros mo dhali ki mom’pesho’k gi ’ko’d gwar ma biny cam mo.

13 Dhali ki ’tham gi ’ban ma biny cam poshki’d ki p̱uyii p̱uyii mo tani uni ṯoshkin ki uni gamki to jin di uni ibwa mo tani uni buḵkina ḵar ’kup̱ toŋḵuthu’d jin ṯelki’da ḵur yi’de/ mo dhali uni iikin mo eya ḵur yi’de/ jin bela ’tham mo mmota ga gap̱ gi Paŋ Kariiṯ ki me’d mo ki sule/ sule/ ki ’dish ’dish mo. 14 Hili ŋ’ko’di mo jin ’konu ki rash rash mo tani ’tham biṯkunu ’peni a’di jin mii’d ki ji wuṯul mo jin yuḵu ka Urukliduun mo. 15 Dhali ka ḵur bu’thkunu mo tani a’di moli ya ibwambor ’tham mo tani am c̱ikina a’di bway mo dhali am borkunu mo be. 16 Dhali mmosona aman mo mmosheshela gap̱ ma ara uḵ ma ’cesh jin yuḵkunu gway ka Kalawdi mo tani aman misha ḵur bu’th ki mom’bi’th ki mii jin diṯadiṯ mo. 17 Dhali ki uni yu’dki a’di ki mis mo tani uni miiki to woṯẖ mo mmohakam is ma ḵur mo ki ton deḵ mo dhali mmoḵo/ ka uni is mo ki uni minu ’taki biṯ ap̱o/ mo ma Sirṯis*Sirṯis a’di ta mo jin hapuc̱ ma si’b ki hapuc̱ mo. mo tani uni ’cuḵki burrinye/ ma ḵur jin bela ’tham mo dhali wakan uni ’kokunu mo mmobor mo be. 18 Dhali ki aman ’kokina mo mmo’kosha ṯu’c ki mii ki nyanye/ gom dhan ’thama p̱unthar mo tani ka cim jiŋ ’ko’d uni ṯelki mii ’pen mo mmoḵal to kun ḵalu mmoṯa’k ka pije/ ’pena ḵur yi’de/ mo. 19 Dhali ka cim kwara mo tani uni ki me’d buni uni ’cena iṯa’kki cwam burrinyen ’tham ma ḵur yi’de/ ka pije/ mo. 20 Dhali ki dar ga tente/ mo walla acul mo mmokusha p̱o/ aman ka cim ka ris mo dhali ki dhan ’thama p̱unthar jin wa’da iyayi’da p̱o/ aman mo dhali arisa ’teŋ kap̱em bam jin minu ’taki woṯẖ am mo tani thisu e ’baar ki ’bil ’bil mo.

21 Dhali ki uni ’kokin ki rash rash ki dar gi tonṯe/ mo tani aBuulus doshki’d ki mis mo ’peni bwam uni mo dhali o gwo mo ki: Kana, um mini ’taki ha isi gwom pem e mo mmo’taki ’koki ’cuḵa ḵur yi’de/ jin bela ’tham ’peni Paŋ Kariiṯ mo dhali um mini ’taki ye mon tonthus yan mo dhali to gwansan kun thisu e si’da/ mo. 22 Dhali shwane/ aha/ malasa um ki gwo mo. Tayi gi bwam ’boro’d mo ma haali/ jamu/ ṯal ’de/ midi diki this mondiki/em piti e ’peni bwam um mo hili jasa ḵur yi’de/ ’te/ mo. 23 Haala man’doyu gwoŋ kamu/ ’peni Arumgimis doshki’d e aha/ mon’thiny yan mo aha/ jin tana jim piti mo, a’di jin miiga/ to si’da/ mo 24 mmo/o gwo mo ki: Dhalku/ is ki ḵo/ mo ma, Buulus. /E mini mii doshi bwambor ma Kaysar mo dhali hili, Arumgumis midi c̱i ki /eya ris uni gun nyaḵ ii ki /e eya ḵur yi’de/ jin bela ’tham mo. 25 Haali/ a’di gi wakan mo tani kana, tayi gi bwam ’boro’d mo ma haali/ aha/ gama Arumgimis gwo is ki a’di midi mii mii wakan me’d jin okunu aha/ gwo mo be. 26 Hili ana minu mii ṯaka p̱o/ moŋ kamu/ jin ta ara uḵa ’cesh mo be.

27 Hili ki mon’thiny jin ta’da ’kume’d i’ce’dka doŋon p̱u’dki’d mo tani aman ’kokunu mmobor ki yi’dem babaŋgal eya dhan yi’de/ ma Adriya ki mo murki’di ta mombwam/e mo tani imanmiiya ḵur yi’de/ ṯoshkin ki uni ’kokin mo mmo’dish bampaŋ kamu/ is mo be. 28 Dhali uni biṯki to mo mmopal ’kul gi dhan yi’de/ mo dhali uni gamki a’di mo mmota eŋgula/ iss ’kwanimpa ipe’de/ mo dhali ’ko’di ari mo jin thoṯẖa uni is mo tani uni biṯki to doḵ/e mo mmopal ’kul piti mo dhali uni gamki a’di mo mmota eŋgula/ iss ’kwanimpa idoŋon i’ce’dka ’kume’d mo be. 29 Dhali mmoḵo/kina aman is mo waḵki/ aman minu ’taki ṯa’k mo a’cesh ap̱o/ ’kuwosh ’kwaḵala/ mo tani uni ṯa’kkina ḵar ’kup̱ toŋḵuthu’d jin ṯelki’da ḵur yi’de/ mo idoŋon ’peni bum ’pen jiŋ ’ko’d mo dhali ’tho moŋkush ki a’di bala midi di kakasjayi. 30 Dhali ki imanmiiya ḵur ’kokin mo mmoŋap̱ki mo mo mmoso ka pije/ ’peni bwam ma ḵur yi’de/ mo dhali thulka ḵur yi’de/ eya dhan yi’de/ e mii jin diki ta jamas mii me’d jin mina uni ’taki beredha ḵar ’kup̱ toŋḵuthu’d jin ṯelki’da ḵur yi’de/ mo ’peni bum ’pen ma kamu/ jin ṯwa/a/ mo tani 31 aBuulus oki gwo eya mancil ma askar iss ’kwanimpa imudhe’d mo dhali i/askar si’da/ mo ki: Isi ciki/ mmo’kokina gwansan ki ’koki ’ko eya ḵur yi’de/ mo tani um minu mol woṯẖ mo be. 32 Ŋ’ko’d i/askar ’ciṯẖkina shi/ ma ḵur yi’de/ ’pen mo dhali mmodhal a’di mmobiṯku mo be.

33 Dhali ki moŋkush ma tente/ di’d mmoyayu/ mo tani aBuulus ŋap̱ki uni ’baar mo mmoshwa tonṯen tiya mo mmo/o gwo mo ki: Atee yan ta’da cim ma ’kume’d i’ce’dka doŋon mo jin c̱ora um mo dhali ’kona um mmoga/ to mo dhali um ’koki bu’th toŋ kamu/ mo be. 34 Haali/ a’di gi wakan mo tani aha/ yuḵkina um mo mmobu’th tonṯen tiya mo haali/ a’di ta mo jin ta mom bum ki ’dantar mo. Haali/ ara mur’kup̱ ṯal ’deŋ kamu/ midi diki ’ce’d sho’k ’peni ’kup̱ bum ki jin ’deŋ kamu/. 35 Dhali ki a’di oki gwo yan kan tan mo tani dhali a’di bu’thki maaŋḵuthu’d mo dhali a’di ’borki’da Arumgimis bwa i is e buŋ’kusi uni ’baar mo. Dhali a’di ’ce’dki a’di mo dhali ṯel a’di ’pen mo mmoshwa mo be. 36 Dhali mmo’borkina uni bwa mo tani uni ki is buni si’da/ bu’thki tonṯe/ mo be. 37 Dhali aman ’baar mo kun ’kona eya ḵur yi’de/ mo tani aman ’kwanimpa tana iss†miyyaṯeen siṯṯa wa saba/iin ’kwanimpa i’kume’d i’ce’dka kwara ap̱o/ i’ce’dka ḵarpa’c i’ce’di ’de/ mo be. 38 Dhali ki uni shwakini kap̱ mo tani uni pashkina ḵur yi’de/ to is mo mmoṯagku ka pije/ mo pos bunyan eya dhan yi’de/ mo.

39 Dhali ki mo ta montee mo tani uni ’koki nyiṯẖ mony’cesh mo hili uni thiskina bem bwaŋ gap̱a ’kulgaŋ kamu/ i is mo jin ta’da gap̱ mo dhali uni ṯorkina ṯor waḵki/ uni mini ’taki misha ḵur yi’de/ bor ap̱owa gap̱ mo. 40 Dhali mmobiṯkina uniya ḵar ’kup̱ toŋḵuthu’d jin ṯelki’da ḵur yi’de/ mo tani uni dhalki uni mo eya dhan yi’de/ mo mmo’cuḵ to kun deḵki cwa jin shu’da ḵur yi’de/ bway ka yiha/ mo. Dhali mmoyu’dkina uni burrinyen ’tham ma ḵur jin ṯwa/a/ mo ’kup̱ ki ’tham tani uni bu’thkina ḵur yi’de/ mo mmoya ’kup̱ ka gap̱ mo. 41 Hili mmobiṯkina uni ap̱o/ mo jin gama dhan yi’de/ suŋ ’kup̱ mo tani uni ṯu’ckina ḵur yi’de/ mo mmop̱eya ’cesh mo. Dhali bum ’pen ma ḵur yi’de/ jin ṯwa/a/ jimki’da ’cesh mo dhali molu joc̱ mo dhali di’d kan mo. Hili bum ’pen ma ḵur yi’de/ jin ta jiŋ ’ko’d mo ṯel ’pen mo mmo’cuḵ is piti mo gom mom’bi’th gi yi’de/ mmobir bakal mo be. 42 Dhali gwo jin ’koni bwa gi i/askar mo tani ta gwo mmo’kosh ’kwani habuus mo jin mina unin tiya ’peni uni ’taki ’koki kaŋ ka pije/ mo dhali ye mo be. 43 Hila mancil ma askar iss ’kwanimpa imudhe’d mo tani a’di dina gwo ibwa mmokara Buulus ki ’dantar mo tani a’di nonki uni mo ’peni gwo kun ’ko uni ibwa mo dhali ḵanki gwo mo ki uni gun mishi yi’de/ kaŋ mo mini posh is buni eya dhan yi’de/ mo dhali p̱u’di mony’ceshi ṯwa/a/ mo. 44 Dhali ’peni kun tiya mo tani uni ’kokin eya ḵur yi’de/ jin pwaṯẖki bwa mo dhali kun tiya e ton tiya ’pena ḵur yi’de/ mo. Dhali wakan a’di warki’d ki mo jin yekina uni ’baar mo mmop̱u’da p̱o/ mony’cesh ki ’dantar mo be.