5
Iiyi Me’d Uc̱i gi Moŋkush mo
Wakan tayi imanthoḵa Arumgimis mii mo me’d uc̱i gun enu mo be. Dhali iiyi e mo/en mo me’da Ḵrisṯẖos enki ana mo dhali c̱i is pitiŋ gana/ mo gom ana mo mmota to jin ḵuyaḵuy mo jin c̱inu mo dhali jin ’ciṯẖu/ ’kus mo goma Arumgimis mo.
Hili mo jin miinu miinyc̱al mo dhala ris mii kun ta en’dap mo walla mo jin tanuwa ’thoṯẖum bwa mo minu ’koki mii yer gway mo isi bwaman um kani me’d jin hana mii me’d mo e bwaman uni kun dhunu ki she/ ki dhelel dhelel mo. Dhalku/ ki dhal miiŋ kamu/ jin nyo/anyo/ bway mo mmodi mo, walla gwom p̱us jin onu mo walla miin salkin mo, uni gun ’koki ha me’d mo. Hili mmodhal mii gwansan e i is mo mmoc̱i mo jin ’boruwa ’bor bwa i is mo. Mishi ki ’bore/ gom gwo yan mo ma. Wathin ’deŋ kamu/ jin mii miinyc̱al jin haku ’pen c̱eŋ gwas mo walla jin ’dap̱a’da ’dap̱ e mo walla jan ’deŋ kamu/ jin ta’da ’thoṯẖum bwa mo (a’di jin ta mii jin luŋu to mo) midi diki gam ari mal e Bampa/ ma Ḵrisṯẖos mo dhali Arumgimis mo be. Dhalku/ ki dhal wathin ’deŋ kamu/ bway mo mmohe’k um e mo ki gwo kun ’ko bwa ’te/ mo haali/ gom to gi wakansan mo tani a’di ip̱u’dkin ma nyor ma Arumgimis ap̱o/ iya/ gi uni gun ush gwo ha e mo. Wakan dhalku/ ki ce e ki uni mo haali/ ’thissa/ um ’kokin mo e mondhurumi’d mo, hili shwane/ um ta ku gi moŋkush e Tap̱a mo. Iiyi um mo me’d uc̱i gi moŋkush mo (haali/ maman ’peni moŋkush mo a’di gamkunu mo eya ris miim ’borga/ mo dhali mii kun tana ḵar/e mo dhali mii gi gwoŋ gana/ mo). 10 Dhali pali mii mo mmoda/ar a’di jin midi ’bor Tap̱a bwa mo. 11 Dhalku/ mii ki nyaḵ mii ki mondhurumi’d mo jin moli maman dho’th mo, hili dhali mii e i is mo mmodhu uni eya tente/ mo. 12 Haali/ a’di ta mii jin ’thenu is mo isi kani mmo/o gwo gom to gwansan kun miina uni ka ḵwal is mo. 13 Hili waḵki/ toŋ kamu/ ṯal ’de/ ṯoru eya tente/ ki moŋkush mo tani a’di wara’d ki to jin mishu mo haali/ ton ’deŋ kamu/ jin wara’d ki to jin mishu mo tani a’di ta moŋkush mo be. 14 Wakan a’di okunu gwo mo ki:
Meri is mo, ayy /e jin ishki e mo, dhali cuyi mis mo ’peni mowu mo
dhala Ḵrisṯẖos midi c̱i /e moŋkush mo be.
15 Hili ki thoson mo gom ii jin mina umi ii mo, yisa me’d ’kwani kun dar gi moyuḵ mo, hili me’d ’kwani kun ta gi moyuḵ mo, 16 mmowar mo is mo haala tee ta thus ki thus mo be. 17 Wakan dhalku/ ki ta p̱us mo, hili mishi gwo ’ban mo gom bwa gi Tap̱a jin wa cikise/ mo be. 18 Dhali dhalku/ ki ta uni kun ’kosh ma su mo, gom mii ma dhor piti mo. Hili ’tu’di mo ki Shi/in mo 19 mmoṯora ṯor ka rem ’kup̱ mo e gway kun yuḵu mo mmoka mo jin miinuwa mii e mo dhali e gway jin maŋuwa maŋ mo dhali e gway jin yuḵu mo gom to gi shi/in mo mmoyuḵ gway mo dhali mmomii ko ’pena dum bumi ’baar mo gom Tap̱a mo, 20 isa yempa/ mo dhali goma ris to ’baar mo mmoc̱i mo jin ’boruwa ’bor bwa i is mo ki gway gi Tap̱am bana ka Yesus Ḵrisṯẖos mo eya Arumgimis jin ta’da Baba mo be.
Ikaṯẖ dhali I/ash mo
21 ’Dap̱i ki me’d ka rem ’kup̱ mo ki moŋḵo/ ma Ḵrisṯẖos mo. 22 Up, ’dap̱i ki me’d ki gwo gi ikaṯẖim bum mo me’d mii jin miina um e Tap̱a mo be. 23 Haali/ wathiŋ gwaṯẖ a’di ta’da ’kaŋ’kup̱ gom ash mo me’da Ḵrisṯẖos mmotana a’di a’kaŋ’kup̱ goma ḵaniisa mo, a’di jin ta buŋgwar is piti mo dhali mmotana a’di a’di ki is piti Amanwoṯẖ a’di mo be. 24 Me’d jin ’dap̱ ma ḵaniisa ki me’d ka Ḵrisṯẖos mo tani wakan dhalka ris up si’da/ ’dap̱an ki me’d ka ris to gi ikaṯẖim buni mo. 25 Kwaniŋ gwaṯẖa, eni up̱ bum mo ma me’da Ḵrisṯẖos mmo/enkina a’diya ḵaniisa mo dhali c̱i is pitiŋ gana/ mo goma yim mo 26 ki a’di midi dhagama yim mo ki mo jin dhelelkina a’di ayim mo ki gwo mo me’d mo jin lamu ki yi’de/ mo 27 ka ḵaniisa minu kari bwambori a’di mo ki ra/ ra/ mo ki dar gi monyo/o’d mo walla mo jin dudup̱a dudup̱ mo walla ma to gi wakan mo, ka yim midi dheleladhelel mo dhali dar gi monthalkin mo. 28 Isi kani gwaṯẖ si’da/ mini mii en up̱ buni mo me’d is buniŋ gana/ mo. A’di jin eni ashim piti mo tani eni is pitiŋ gana/ mo be. 29 Haali/ wathiŋ kamu/ yisa di’da jin shi/i buŋgwar is piti i e mo, hili a’di ki thip̱ a’di mo dhali ŋa/ a’di mo me’d mii jin miikin ma Ḵrisṯẖos goma ḵaniisa mo, 30 haali/ ana tana tom buŋgwar is piti mo be. 31 Haali/ gom ’kup̱ gwo gi wakan mo tani wathi/ midi mii ḵwa/ bwa mo ’peni com mo dhali kum mo dhali gam is ki ashim piti mo dhali uni su/ mo tani mini ṯal ’de/ mo be. 32 Gwo yansan ta dhan gwo jin bagu mo dhali aha/ butha ’pemen yan kan mo mmotana a’diya Ḵrisṯẖos mo dhala ḵaniisa mo be. 33 Bahili dhalka ris umi ’baar ka ’deṯe/ ’deṯe/ mo eni up̱ bum mo me’d is bum gana/ mo, dhali dhalki up̱ si’da/ hilin ki ’bore/ mo ki uni mini taḵ ikaṯẖim buni mo be.