8
Dhali yan’ko’d TAP̱A oki’da Musa gwo mo ki: Yaku/ mo eya P̱irawn mo dhali ṯori a’di gwo mo ki: Yase ta gwo jin ona TAP̱A mo ki: Dhalki ’kwanim pem bway mo mmo/ii mo ki uni mini mii mii mmotaḵ aha/ mo. Hili waḵki/ /e mini ush mo mmodiki dhal uni bway mo mmo/ii mo tani, aha/ mina ’kosh aris bampam pini ka ma’dinya ’dwa/ mo be. Dhali ḵumma/ Yi’de/ Niil minu ’tu’d mo ka risa ’dwa/ mo. Uni mini seku bway gu’b pini mo dhali bway gu’b ish pini mo dhali ap̱owa cim pini mo dhali eya ris gu’b gi imanmii tom pini mo dhali ’kwanim pini mo dhali eya ris mo ma p̱urun pini mo dhali e bwaman ma sahan kun miikunu /eya gana’th mo. Arisa ’dwa/ mini seku /e i is mo dhali ap̱o/ ’kwanim pini mo dhali ap̱o/ aris imanmiiya ṯu’c pini mo be.
Yan’ko’d TAP̱A oki’da Musa gwo mo ki: Ṯora Haruun gwo mo mmo’deḵa lukaas piti ap̱o/ aris yi’de/ kun son mo dhali ap̱owa risa kanycal dhali ap̱owa risa al mo. Dhali raḵa risa ’dwa/ mmoseyu/ ap̱o/ Bampa/ Masir mo.
Wakana Haruun ’de’kki’da lukaas piti mo ap̱owa ris yi’de/ gi Pam Masir mo. Dhali arisa ’dwa/ p̱u’dkin ka pije/ mo dhali kum Bampa/ Masir mo be. Hili ŋari si’da/ miiki miilaṯ buni gun gama uni adu is mo kun nyaḵkan ki mii gi iMusa mo. Dhali uni si’da/ raḵana arisa ’dwa/ mmoseyu/ ka pije/ mo e Bampa/ Masir mo be.
Dhali yan’ko’da P̱irawn yuḵki’da Musa dhala Haruun mo dhali o uni gwo mo ki: ’Thoyi TAP̱A mo ma ki a’di midi ḵalka risa ’dwa/ mo ’peni aha/ mo dhali ’peni ’kwanim pem mo, dhali aha/ mina dhal ’kwani bway mo mmo/ii mo mmomii TAP̱A a basa ’cesh mo be.
Musa oki’da P̱irawn gwo mo ki: Aha/ mina bwa ’kuny mo mmo’tho gom /e mo. Ṯori atente/ jin ŋap̱a /e aha/ ki ’tho gom /e mo dhali goma ris imanmiiya ṯu’c pini mo dhali gom ’kwanim pini mo ka risa ’dwa/ minu ’ce’d sho’k mo dhali minu dhalku/ mo mmo’ko jasi e ḵumma/ Yi’de/ Niil mo be.
10 Dhala P̱irawn ki o gwo mo ki: Ka’thamo/ mo. AMusa thoḵki gwo mo kan ki: Dhalki mii yan miinu wakan mo me’d jin okina /e mo ki /e mini mish mo mo ki jaŋ kamu/ yisa di’da jin wa ki TAP̱A Arumgimis bam mo. 11 Ama’dinya ’dwa/ mini dhal um ’pen mo dhali aris gu’b pini mo dhali aris imanmii tom pini kun mii ki /eya ṯu’c mo dhali ’kwanim pini mo. Dhali momboc̱ ma ’dwa/ mina uni ’ko jasi e ḵumma/ Yi’de/ Niil mo be.
12 Wakana Musa dhala Haruun uni iikin ka pije/ mo ’pena P̱irawn mo. Dhala Musa ’thoki’d ki ’bi’th mo e TAP̱A mo isi gom gwo ma ’dwa/ mo jin hashkina a’di a P̱irawn mo. 13 Dhali TAP̱A miiki a’di mo isi me’d gwo ma Musa mo. Dhali arisa ’dwa/ wukin mo eya ris gu’bi ’baar mo dhali eya ris bwaagoŋi ’baar mo dhali e mondhe’di ’baar mo. 14 Dhali uni tulki uni is i monṯal ’de/ ka ŋul’kup̱ mo dhali bampa/ bulabul mo be. 15 Hili ka P̱irawn p̱arki mo e mo ka ’dwa/ wukin mo tani a’di ’bi’thki’da dum piti mo dhali diki’d ki gwo i bwa mo mmo/ush gwo ma Musa dhala Haruun mo me’d jin ṯorkina TAP̱A uni gwo mo be.
Mompal jin Wo’c ’Kwani Is She/ ka Shokom mo
16 Dhali yan’ko’d TAP̱A ki owa Musa gwo mo ki: Ṯora Haruun gwo mo ki: ’Deki alukaas pini mo dhali dori bu’da ’cesh mo ki a’di midi war ka shokom ki tur mo e Bampa/ Masiri ’baar mo. 17 Wakan aHaruun dorki’da ’cesh ka lukaas piti mo dhali dhan bu’d ’ce’dki’d ki to’bo/ to’bo/ mmowar ka shokom mo dhali shwa ’kwanim Pam Masiri ’baar mo dhali to em buni si’da/ mo be. 18 Dhali ŋari si’da/ palki mii mo mmo’taki raḵa shokom mmoseyu/ ka pije/ ki miilaṯ buni mo jin gama uni adu is tani, hili uni p̱ikunu e mo. Ashokom ishki’d e ’kwani mo dhali to e mo be.
19 Dhali ŋari ṯorkina P̱irawn gwo mo ki: Yansan ta me’d ma Arumgimis mo. Hila P̱irawn i ’bi’thkin ma du mo dhali a’di si’da/ ush gwom buni ciḵ mo me’d gwo jin okina TAP̱A mo be.
Mompal jin Wo’c ’Kwani Is She/ ka ḵanthi/ mo
20 Dhali yan’ko’d TAP̱A ki owa Musa gwo mo ki: Cuyi mis mo mon’thamo/ ka’tum mo dhali yayi dosha bora P̱irawn mo me’d jin yakina a’di ka pije/ bwaya Niil mo, dhali ṯor a’di gwo mo ki: Yase ta gwo jin ona TAP̱A mo ki: Dhalki ’kwani bway mo mmo/ii mo ki uni mini mii mii mmotaḵ aha/ ki momaŋ mo. 21 Waḵki/ /e mini diki dhal ’kwanim pem bway mo mmo/ii mo tani aha/ mina hash ka dhana buhanya ḵan’thi/ ap̱o/ /e mo dhali ap̱o/ imanmiiya ṯu’c pini mo dhali ap̱o/ ’kwanim pini mo dhali eya ris bwaŋgu’b pini mo. Dhali eya ris bwaŋgu’b gi ’kwani Pam Masir mo tani uni minu ’tu’d mo ka dhana buhanya ḵan’thi/ mo dhali i tagi mo jin karkina Bampa/ Masir ’kup̱ mo be.
22 Hili ka tee c̱aan mo tani aha/ mina ḵwa/ Bampa/ Jaasaan bwa mo a’di jin ’kokina ’kwanim pem i cine/ mo, wakan ka buhanya ḵan’thi/ ’deŋ kamu/ midi diki di imun mo, ki /e mini mish gwo ’ban ki aha/ tana TAP̱A jin di’d e bwaman gi mony’cesh mo. 23 Yaase/ i ta mii jin miga/ mii mo mmoḵwa/a ḵwa/ bwa mo e bwaman ’kwanim pem dhali ’kwanim pini mo. Ka’thamoŋ gana/ mo tani a’di i mina to mer yan i di mo be.
24 Dhali TAP̱A miiki mii gi wakansan mo. E mun mo tani adhana buhanya ḵan’thi/ p̱u’dkin mo e gu’b ma P̱irawn mo dhali gu’b ma ris imanmii tom piti mo. Dhali eya ris Bampa/ Masiri ’baar mo uni shi/kunu is mo ki ’kup̱ gwo ma ḵan’thi/ mo be.
25 Dhali yan’ko’d a P̱irawn yuḵki’da Musa dhala Haruun mo dhali o uni gwo mo ki: Iiku/ mo dhali miiya Arumgimis bum abasa ’cesh e bampa/ Masir mo.
26 Hila Musa thoḵki gwo o ki: A’di yisa midi ’bora mmomii mii gi wakan mo haali/ aman mina mii TAP̱A Arumgimis bam abasa ’cesh mo. Mii yan midi bulabul mo gom ’kwani Pam Masir mo. Waḵki/ aman miina abasa ’cesh jin bulabul mo e jis e gi ’kwani Pam Masir mo tani uni mini ’koki ’kosh aman jwa mo ki wosh mo ’te/ tana? 27 Aman mina mii ii mo goma cimi kwara mo e mom bwaasho mo dhali mii TAP̱A Arumgimis bam abasa ’cesh mo me’d gwo jin ḵankina a’di aman mo be.
28 Wakana P̱irawn oki gwo mo ki: Aha/ mina dhal ki um bway mo mmo/ii mo dhali mii TAP̱A Arumgimis bum abasa ’cesh mo e mombwaasho mo hili um mini ii i si’dasi’d yisa. ’Thoyi gom aha/ si’da/ mo.
29 Dhali yan’ko’da Musa oki gwo mo ki: Aha/ yana mo ka pije/ mo ’peni /e mo dhali aha/ mina ’tho TAP̱A ki a’di midi hashka buhanya ḵan’thi/ mo ’peni /e mo jin tana P̱irawn mo dhali ’peni imanmiiya ṯu’c pini mo, dhali ’peni ’kwanim pini mo ka’thamoŋ gana/ mo. P̱irawn, dhalku/ ki c̱a’bi heka he’k em p̱us mo doḵ e mo mmodiki dhal ’kwani bwayi ii mo mmomii TAP̱A abasa ’cesh mo.
30 Yan’ko’d aMusa a’di yaki’d ka pije/ mo dhali ’thoki TAP̱A mo be. 31 Dhali TAP̱A miiki’d wakan mo me’d jin okin ma Musa a’di mo dhali ḵalki’da buhanya ḵan’thi/ mo ’pena P̱irawn mo dhali ’peni imanmiiya ṯu’c piti mo dhali ’peni ’kwanim piti mo. Jan ’deŋ kamu/ yisa boc̱o’da. 32 Hila P̱irawn ’bi’thki’da dum piti is mo doḵ e ka tente/ yansan gana/ si’da/ mo, dhali diki dhal ’kwani bway mo mmo/ii mo be.