1 Dhali TAP̱A oki’da Musa gwo mo ki: 2 C̱iyi aha/ arisa bwanyara/ mo ’peni kuŋ gwaṯẖ, uni kun ḵa’dki bwa ma dho’th gi ’kwani ma Israyiil mo ’peni wathiŋ gwaṯh mo dhali to e mo. Uni ta kum pem mo.

3 Dhali aMusa oki ’kwani gwo mo ki: Kayi atee yansan e mo a’di jin pikina um ka pije/ mo ’peni Bampa/ Masir mo, ’peni mo jin miinu um ki miiny c̱iŋkina/ mo. Haali/ ki me’d gi TAP̱A jin ’bitha’bi’th mo tani i suskina a’di um ka pije/ mo ’peni mo yansan mo. Maaŋḵuthu’da kamu/ yisa mina umi shwa jin din ma cumaṯi e mo yisa. 4 Ka ppee jin ṯwa/a/ jin yuḵu ka Abiib*Abiib ta’da ppee ki ’dish ma sho’k mmohe’th mo. mo tani um mini ii ki sule/ suleŋ gana/ mo. 5 TAP̱A oki gwo is gom ibabam bum mmoc̱i ki um a’cesh gi Bampa/ Kanaan mo dhali Bampa/ Hathaṯẖ mo dhali Bampa/ Amuur mo dhali Bampa/ Hawb mo dhali Bampa/ Yabuus mo. Ki a’di midi ’doyu/ um eya ’cesh jin ta pa ki pa mo, um mini mii moshwan to yan ka ppee jin ṯwa/a/ ’ko’di yili ’baar mo be. 6 Goma cimi pesu/ um mini shwa maaŋḵuthu’d jin miinu ki dar ga cumaṯ mo. Dhali ka cim pesu/ mo tani dhan moshwan to midi di mmotaḵ TAP̱A mo be. 7 Maaŋḵuthu’d jin miinu ki dar ga cumaṯ mo tani a’di i minu i shwa ka cim pesu/ mo. Maaŋḵuthu’da kamu/ jin miinu ka cumaṯ yisa minu mii mishi um mo dhali acumaṯ yisa si’da/ minu mii i mishi um eya ris gwayu/ moŋ’kom bumi ’baar mo yisa. 8 Dhali /e mini ṯor iya/m pini gwo ka tee c̱aan mo ki: Mii yan miikika/ gom to jin miina TAP̱A gom aha/ mo ki aha/ pikina ka pije/ ’peni Bampa/ Masir mo be. 9 Dhali a’di midi ta jamas mii e me’d pini mo dhali me’d mo jin kanuwa ka e e buyem pini mo, ki gwoŋḵan gi TAP̱A midi di e ’twam pini mo. Haali/ ki me’da ’bi’thga/ gi TAP̱A mo tani a’di i suski /e ka pije/ mo ’peni Pam Masir mo be. 10 Gom gwo gi wakansan mo tani /e mini kar gwoŋḵan yansan ka ḵanne ka cim jin karu a’di gom ki sule/ ’ko’di yili ’baar mo be.

11 Dhali TAP̱A midi susi /e e Bampaŋ Kanaan mo isi me’d mii jin thulkina a’di gwo me’da p̱o/ mo gom /e mo dhali ibabam pini mo. Dhali ki a’di midi c̱iki /e a’di mo tani 12 /e mini dhu to ki she/ gom TAP̱A mo, uni kun ṯwa/a/ mo kun ḵa’dki bwama dho’th mo. Arisa bwanyaran to em pini mo uni kun tana rasan mo uni ta kun TAP̱A mo be. 13 Eya risa bwanyara ma rasan thuluny mo tani /e mini wan uni ’ba/ ki ḵa’bal mo. Walla waḵki/ /e diki wan uni ’ba/ mo tani ’ce’di a’di ’ba/ piti mo. Dhali arisa bwanyara/ uc̱iŋgwaṯẖ kun dho’thkunu mo e bwaman iya/m pini mo tani /e mini wan uni ’ba/ mo be.

14 Dhali ka tee midi p̱u’du/ mo tani ya/m pini midi doṯ /e gwo mo ki: ’Pemen gwo yan ta’da tinta mo? /E mini thoḵ a’di gwo mo ki: Ki me’d gi TAP̱A jin ’bitha’bi’th mo tani a’di i suskina a’di aman ka pije/ mo ’peni Pam Masir mo ’pena ’cesh gi miiny c̱iŋkina/ mo be. 15 Haali/ ka P̱irawn yan ushki’d ki ’tash mo mmodhal aman bway mo mmo/ii mo tani TAP̱A ki ’kosh arisa bwanyara/ kun dhodhu e Bampa/ Masiri ’baar mo ’peni uc̱iŋ gwaṯẖ kun tana bwanyara/ mo dhali ’pena risa bwanyaran to e mo. Gom gwo gi wakan mo tani aha/ miikina TAP̱A abasa ’cesh mo ’peni aris to e kun ta gwaṯẖan mo kun ḵa’dki bwama dho’th ’twa/ mo. Hila bwanyara/ gi iya/m pem ’baar mo tani aha/ wankina/ uni ’ba/ mo be. 16 A’di midi ta jamas gom /e e me’d pini mo walla e buyem pini mo ki me’da ’bi’thga/ gi TAP̱A a’di i suski aman ka pije/ ’peni Pam Masir mo be.

17 Ka P̱irawn dhalki ’kwani bway mo mmo/ii mo tani Arumgimis diki shu uni bway mo ki bway Pam P̱ilisṯiyiin mo, ba ki a’di ’disha’dish mo kan de. Haali/ Arumgiimis oki gwo mo ki: Waḵki/ uni mini p̱ar mo/as e mo tani uni wari mini rica du is mo dhali doḵ bway Pam Masir ka nyaŋ’ko’d mo ba/. 18 Hili Arumgimis suski ’kwani ka kukul is mo ki bway gi mombwaasho mo ’kup̱ ki ḵumma/ Yi’de/ jin ta gi ’Per mo. Dhali ’kwani ma Israyiil uni iikin ka pije/ mo ’peni Bampa/ Masir mo mmonyaŋ is gom mo ma mee mo be.

19 Dhali aMusa ḵalki’da sima/ ma Yuusup̱ mo nyaḵki a’di mo haala Yuusup̱ ṯeki gwo gom ’kwani ma Israyiil mmo/o is mmomii kan mo be. A’di ki o gwo mo ki: Arumgimis midi yayu/ i woṯẖ um mo. Dhali yan’ko’d mo tani um mini mii ḵala simam pem nyaḵki um mo ’peni mahan mo.

20 Dhali uni joc̱kin mo ’peni Pa Suḵuṯẖ mo dhali bu’th moŋ’ko me’d e Pan Iṯẖaam mo e shemen gi mombwaasho mo be. 21 Dhali TAP̱A a’di i yaki uni ibwambor montee ka raḵ jin wana e ka ḵa’dum ki jamas piti mo mmoshu uni bway ki sule/ sule/ mo. Dhali mon’thiny si’da/ o’d jin wana e ka ḵa’dum ki jamas piti c̱iki uni moŋkush mo ki uni mini mish ii montee dhali mon’thiny mo be. 22 Araḵa ḵa’dum montee dhali araḵa ḵa’dum o’d mon’thiny mo uni ’koki dhal ’kwani ’pen mo ’peni jis em buni mo be.