1 Dhali yan’ko’d Tap̱a ki owa Nuuh gwo mo ki: Yaku/ bwaa ḵur mo, /e dhala risa waḵ gi gu’b pini mo, haali/ aha/ misha ki /e ta wathiŋ ḵar/e ibwambori aha/ ki nyaḵum yil gi ’kwani gwansan mo. 2 Susi nyaḵki /e to/e kun ’koni pesu/ ka pesu/ pesu/ mo kun mishu shum ’ka mo, kun ta gwasan dhali kuman buni mo, dhali to/eŋ kamu/ si’da/ kun molu shum ’ka mo, arasan dhali kuman mo, 3 dhali ’dii kun ’koni pesu/ ka pesu/ pesu/ mo kun p̱en e mis si’da/ mo, rasan dhali kuman mo, mmodhu uni ki e ki jamas buni ki she/ ki she/ e bwam/e gi mony’ceshi ’baar mo. 4 Haali/ ka cim pesu/ mo tani aha/ mina hasha sho’k ap̱o/ mony’cesh mo acim ma iss su/ montee mo dhali acim ma iss su/ mon’thiny mo. Dhali aris to/e ’baar mo kun ’kon ki e mo kun uḵka/ mo tani aha/ mina ḵal uni sho’k ka pije/ ’peni bwam/e ga ’cesh mo. 5 Dhala Nuuh a’di mii’da ris to kun ḵana Tap̱a a’di mo.

6 Dhala Nuuh ’koni yil iss ’kwanimpa i/iss ’de/ i’ce’dki iss ’kwanimpa i’kume’d mo me’d jin p̱u’dkin ma gannu/ yi’de/ ap̱o/ mony’cesh mo. 7 Dhala Nuuh dhali iya/m piti dhali ash dhali i/ash gi iya/m piti nyaḵki a’di mo tani uni iikin e bwaa ḵur mo mmoye ’pena gannu/ yi’de/ mo. 8 To/e kun mishu shum ’ka mo dhali to/e kun molu shum ’ka mo, dhali ’dii mo dhala ris to kun parana ’cesh mo 9 ka susu/ susu/ mo, gwasan dhali kuman mo, iikin e bwam ma ḵur nyaḵka Nuuh mo me’d gwo jin ḵankin ma Arumgimisa Nuuh mo. 10 Dhali ’ko’da cim pesu/ thimkin mo tani agannu/ yi’de/ p̱u’dki’da p̱o/ mony’cesh mo.

11 Ka yil iss ’kwanimpa i/iss ’de/ i’ce’dki iss ’kwanimpa i’kume’d jin ta yil mondiki/e ma Nuuh mo tani, ka ppe jiŋ ’ko’d mo jin ta’da cim ’kume’d i’ce’dka pesu/ ma appe mo, dhali ka cim c̱aan mo tani aris yi’de/ kun kasha e ’peni jisa ’kulga/ uni ’twaḵkin mo dhali campur gi momis a’di ḵa’dkunu ’twa/ mo. 12 Dhala sho’k wolki ’twa/a p̱o/ mony’cesh ka cim iss su/ montee mo dhali ka cim iss su/ mon’thiny mo. 13 Dhali ka tenteŋ gana/ yan mo tani Nuuh dhali iya/m piti jin ta’da Saam dhala Haam dhala Yap̱aṯẖ dhali asha Nuuh dhali up̱ gi iya/m piti kun ’koni kwara nyaḵki cic̱ ki uni e bwam ma ḵur mo, 14 uni dhali aris tombwaasho ’baar mo isi ki jamas buni ki she/ ki she/ mo, dhali aris bip̱ mo isi ki jamas buni ki she/ ki she/ mo, dhali aris to jin parkin mo kun parana ’cesh mo isi ki jamas buni ki she/ ki she/ mo, dhali aris ’dii ’baar mo isi ki jamas buni ki she/ ki she/ mo, aris ’dii ka warom buni ki she/ ki she/ mo. 15 Uni iikin nyaḵka Nuuh e bwam ma ḵur mo, ka susu/ susu/ mo, aris to kun ta ga shuman is mo e uni kun p̱inu shush buni mmo’ko ki e mo. 16 Dhali uni gwansan kun ta gwasan mo dhali kuman mo kun ta shuman isi ’baar mo, uni cic̱kin mo me’d gwo jin ḵankin ma Arumgimis a’di mo. Dhali Arumgimis ki mu’thki a’diya campur mo.

17 Agannu/ yi’de/ a’di ṯikirki’d ka cim iss su/ ap̱o/ mony’cesh mo dhali yi’de/ marki is mo dhali a’di ki ’deka ḵur mo dhali a’di ki cu mo mmobola ’cesh ka p̱o/ mo. 18 Dhali yi’de/ a’di p̱iki mii e mo dhali mar is kagahara ap̱o/ mony’cesh mo dhali aḵur a’di hashki’d e ’kup̱an yi’de/ mo. 19 Dhali yi’de/ a’di p̱iki mii e ki mo ma dem dem mo ap̱o/ mony’cesh wakan mo, dhali aris wosha turga/ kun ’kokin e bwaŋ’kwariny momis mo tani uni hac̱kina yi’de/ ki ’peny ’ce i e mo. 20 Dhali yi’de/ p̱iki mii e mo ap̱owa ris wosha turga/ mo mmolos uni mo ki eŋgula kun ’koni ḵarpa’c ki ’kul piti mo. 21 Dhali aris buŋgwar is wukin mo dhali to kun ’koni mmoḵal ya ap̱o/ mony’cesh mo, ’dii dhali bip̱ dhali tombwaasho, dhali aris to kun tana ris kun yan ka ŋul ’kup̱ kun ’kona p̱o/ mony’cesh mo dhali aris ’kwani ’baar mo, 22 aris to kun ’kon eya ’cesh jin ḵuthaḵu’th mo kun p̱inu shush buni mmo’ko ki e mo tani uni wukin mo be. 23 A’di ḵalki’da ris to ’baar mo sho’k ka pije/ mo kun ’kon ki e ’peni bwam/e ga ’cesh mo, ’kwani dhali to/e dhali to kun parana ’cesh mo dhali ’dii kun p̱en e momis mo tani uni iḵalkina a’di sho’k ka pije/ ’peni mony’cesh mo. Jasa Nuuh a’di ’de/ idhalkunu mo dhali uni gwansan kun nyaḵ ’ko ki a’di eya ḵur mo. 24 Dhali yi’de/ p̱iki mii e ap̱o/ mony’cesh mo ka tee iss ’kwanimpa ipesu/ i’ce’dka ’kume’d mo.