15
’Ko’di to gwansan mo tani gwo gi Tap̱a p̱u’dki’d mo eya Abraam mo ki tonyjan mo mmo/o gwo mo ki: Dhalki is ki ḵo/ mo ma, Abraam. Aha/ tana goŋgorom pini mo. Adhan to jin ish ḵumma/ jin caaca kagahara mo tani a’di midi ta jim pini mo. Hili Abraam oki gwo mo ki: Ayy Tap̱a Arumgimisa ki to jin ta’da ta imina /e c̱iyaa/ mo? haali/ aha/ ṯikirkina di mo ki dar gi uc̱i mo dhali a’di jin midi ḵal mal gom gu’b pem mo tani a’di ita Eli/aasar gi Pan Dimashk mo. Dhala Abraam oki gwo mo ki: Hili mo mo ma, emena kamu/ yisa c̱ikina /e aha/ mo, dhali c̱iŋkina/ jin dho’thkunu mo e gu’b pem mo tani a’di midi ta a’di jin midi ḵal mal pem mo. Dhali hili mo mo ma, gwo gi Tap̱a p̱u’dki’d mo e a’di mo mmo/o gwo mo ki: Wathi/ yan midi ta amanḵal mal pini mo yisa. Ya/m piniŋ gana/ a’di imidi ta amanḵal mal pini mo be. Dhali a’di suski a’di mo ka pije/ mo dhali oki gwo mo ki: Hilki /e mo ’kup̱ki momis mo, dhali deŋi arisa cul e mo waḵki/ /e mini mish uni deŋ e mo. Dhali yan’ko’d a’di oki a’di gwo mo ki: Wakan be, emen pini kun mini pi ’peni /e mo tani uni imini ’ko mo be. Dhali a’di gamki Tap̱a gwo is mo dhali a’di karki a’di gom a’di mo ki mo ma ḵar/e mo.
Dhali a’di oki a’di gwo mo ki: Aha/ tana Tap̱a mo, a’di jin suski /e mo ’peni Pa Ur ma Kaldaan mo mmoc̱i /e mony’cesh yan mmobu’th mo be. Hili a’di oki a’di gwo mo ki: Ayy Tap̱a Arumgimisa, ki tonta imiga/ mish mo mo ki aha/ mina bu’th a’diya? A’di oki a’di gwo mo ki: ’Doyu/ i aha/ anas bip̱ jin ta’d gi yili kwara mo ma dhali kuman mi jin ta’d gi yili kwara si’da/ mo dhali arasiŋ ḵa’bal jin ta’d gi yili kwara gara/ dhali bimbir gurko/ mo dhali gurko/ jin bap̱ki’d mo. 10 Dhali a’di ’doyi’da ris to gwansan e a’di mo dhali ’ciṯẖki uni bwa mo ka ’ban su/ mo dhali ’bwanu’ba kanu/ ’thikina a’di mo ka p̱ar ’bana kamu/ mo ka ’deṯe/ ’deṯe/ mo. Hili ’dii gwansan ’ciṯẖkina a’di bwa mo ki ’ban su/ mo yisa. 11 Dhali me’d jin p̱u’dkina ’dii kun ’kwar to ka gwap̱i/ mo ka ’cesh mo ap̱o/ buŋgwar isa goŋgoro/ mo tani Abraam ki ur uni asho mo be.
12 Me’d jin din ma tente/ mmoyul mo tani mo jin ’ce’du e kagahara biṯki’da p̱owa Abraam mo. Dhali hili mo mo ma, dhan mondhurumi’d jin deenu ki bir bir biṯki’da ap̱o/ a’di mo. 13 Dhali yan’ko’d Tap̱a oki’da Abraam gwo mo ki: Mishi gwo ’ban mo ma me’d to jin ’tashu ’twa/ mo ki emen pini kun mini pi ’peni /e mo tani uni mini ta uni kun iiki iiŋ ’kus e bampa/ jin diki ta jim buni mo, dhali uni mini ta c̱iŋkina/ e mun mo, dhali uni minu siri’c ki sho’k mo ki yili iss ’kwanimpa i/iss ’de/ mo. 14 Hili aha/ mina dhu uni e mo jin dwallu gwo mo, kal gi ’kwani gwansan jin mina uni mii to mo, dhali ŋ’ko’d mo tani uni mini p̱u’du/ ka pije/ mo mmota gi to kun ish ka enthus mo. 15 Dhali hili gom is pini mo tani /e mini ya e icim mo e moŋḵu’th is mo. /E minu kan mo ki /e mini ta adhan mo ki ’bore/ mo, e mo jin canu ki yil mo. 16 Dhali uni mini doḵu/ mmahan ka nyaŋ’ko’d mo e bwaŋ ’kwani ma nyaḵum yil kun min ma ap̱o/i ’ko/i doŋon mo, haali/ miinthus gi ’Kwani Amuur mo a’di ithimkunu mo yisa naskina/ moyi.
17 Ka tente/ yulki’d mo dhali mo di’d ki mondhurum mo tani hili mo mo ma, ’ku’kus gwansan pekunu ’kup̱ mbwaman mo ka nos jin ’thanu o’d nycine/ mo jin diki’d mo mmoya aku’d mo dhali ki dhantho/ o’d si’da/ jin diki’d mmoshwa ka le’dan mo. 18 Ka tee yin mo tani Tap̱a gamki gwo me’d mo nyaḵka Abraam mo mmo/o gwo mo ki: E emen kun mini pi mo ’peni /e mo tani aha/ mina c̱i bampa/ yan mo ’peni yi’deŋ ḵumma/ ma Masir mo ntagi dhan yi’deŋ ḵumma/ ma Elp̱uraat mo 19 a’di jin ta bampa/ gi ’Kwani Giin mo, dhali ’Kwani Genissi mo, dhali ’Kwani Gadmuun mo, 20 dhali ’Kwani Hiṯẖṯẖa mo, dhali ’Kwani P̱aaris mo, dhali ’Kwani Rap̱a mo, 21 dhali ’Kwani Amuur mo, dhali ’Kwani Kanaan mo, dhali ’Kwani Jirjaash mo, dhali ’Kwani Yabuus mo.