20
Dhali ’peni maṯṯaan mo tani Ibrahiim yaki’di yam pe mo ’kup̱ ki bampa/ jin di’d e ’ko’d gwar ga biny jam mo dhali a’di c̱a’bki’d mo ibwaman gi Paŋ Kaadish mo dhali gi Pan Shur mo dhali a’di p̱u’dki’d ki yaŋ’kus e Pan Jaraar mo. Dhala Ibrahiim oki gwo mo goma Saarah jin ta ashim piti mo ki: Ayim ita ’bwah pem mo. Dhala Abimaalik jin ta maliḵ gi Pan Jaraar mo karki’da kar ’pen mo dhali bu’thki’da Saarah mo. Hili Arumgimis p̱u’dki’d eya Abimaalik gi tony jan ki mon’thiny mo dhali oki a’di gwo mo ki: Hili mo mo ma, /e ta wathiŋ gwaṯẖ jin wana e gi wathi/ jin wu’d mo goma ’bom jin bu’thkina /e mo haali/ ayim ita ash gi wathiŋ kamu/ mo. Hili Abimaalik a’di i’dishkin ma yimi is yisa dhali a’di oki gwo mo ki: Tap̱a a/mina /e i’kosh kal gi ’kwaniny’cesh gun daran gi mii m’ba/ si’da/ moyi? Dina a’di ki o gwo mo ki is pitiŋ gana/ ki aha/ mo ki: Ayim ita ’bwah pem mowa? Dhala yim si’da/ ayim ki is pitiŋ gana/ o gwo mo ki: A’di ita’da kam pem mo. E mo jin dika/ ki mii ki ŋadhum eya dum pem mo dhali e mo jin dika/ ka p̱o/ gi me’d pem mo tani a’di imiikika/ mii yan mo be. Dhali yan’ko’d Arumgimis oki a’di gwo mo ki tony jan mo ki: Nye, a’di imishka/ mo ki mii yan a’di imiikina /e mo ki mii jin miikunu mo ki dar gi ŋadhum eya dum pini mo. Dhali a’di ita aha/ si’da/ jin nonkina /e mo ’peni mo jin miikunu miinthus ap̱o/ aha/ mo. Haali/ a’di gi wakan mo tani a’di dika/ ki dhal /e bway mo mmota ayim is ki me’d moyi. Hili shwane/ mo tani doḵki/ /e e wathiŋ gwaṯẖ ashim piti ka nyaŋ’ko’d mo ma, haali/ a’di ita aman/o gwo mo dhali a’di midi ’tho gom /e mo, dhali /e mini di ki e mo. Hili waḵki/ /e mini diki doḵa ayim ka nyaŋ’ko’d mo tani mishi /e mo mo ma ki /e mini mii wu mo ka jiŋ gana/ mo, /e dhala ris uni ’baar mo gun ta kum pini mo be.
Wakan be Abimaalik la cuki mis mo mon’thamo/ mo dhali a’di yuḵki imanmiiya ṯu’c piti i’baar mo dhala ris to gwansani ’baar mo iṯorkina a’di mo e ’cem buni mo. Dhali ’kwaniŋ gwas gwansan uni ḵo/kina ḵo/ is kagahara mo. Dhali yan’ko’d Abimaalik yuḵki’da Ibrahiim mo dhali oki a’di gwo mo ki: To gi wakatinta imiikina /e mo ap̱o/ aman mo? Dhali ton shigga/ gi wakata si’da/ imiikika/ ap̱o/ /e mo mmo’doyina /e dhan miinthus caaca ap̱o/ aha/ mo dhali ap̱o/ bampam pem si’da/ mo. /E be imiiki to ap̱o/ aha/ mo kun ḵa ba/ iminu ’koki mii mii mo be. 10 Dhala Abimaalik ki owa Ibrahiim gwo mo ki: Atinta c̱aan jin kulumkina /e ibwa mo mmomiikina /e mii yan mo? 11 Dhala Ibrahiim ki o gwo mo ki: A’di imiikika/ kan haali/ a’di iṯoshkika/ mo mmo/o gwo mo ki: Ka jiŋ gana/ moŋḵo/ isa kamu/ yisa di’da goma Arumgimis e mo yansan mo dhali uni mini ’kosh aha/ jwa mo gom gway gi ashim pem mo. 12 Dhali bahili ayim ka jiŋ gana/ ita ’bwah pem mo, a’di jin ta ’bwa/ ma babam pem mo, hili ayim diki ta ’bwa/ ma ta’dam pem mo. Dhali ayim warki’d ki ashim pem mo. 13 Dhali ki aha/ raḵkin ma Arumgimis mo mmo/ii ki ii ma c̱a/ mo ’peni gu’b ma babam pem mo tani aha/ okina yim gwo mo ki: A’di yansan ta miim pini jin mina /e ikar bwa jin kushakush gom aha/ mo. Eya ris mo i’baar mo jin mina ana ip̱u’du/ mo tani oyi gwo gom aha/ mo ki: A’di ita’da kam pem mo. 14 Dhali yan’ko’d Abimaalik bu’thki ḵa’bal mo dhala morbip̱ mo dhali ’kwani kun miina ṯu’c mo dhali up̱ kun miina ṯu’c mo dhali c̱iki uni ka Ibrahiim mo dhali warki a’di aSaarah i is mo, ayim jin ta ashim piti mo be. 15 Dhala Abimaalik ki o gwo mo ki: Hili mo mo ma, bampam pem di’di bwambori /e mo. C̱a’bi /e mo mo ma e mo jin midi ’bor /e bwa mo. 16 Dhali eya Saarah a’di oki gwo mo ki: Hili mo mo ma, aha/ c̱ikina akam pini gabul ’dolkon kushi alip̱ mo. A’di ita mom pini jin yenuwa ye mo e jis/e gi uni ’baar mo kun nyaḵ ’ko ki /e mo. Dhali ibwambori aris ’kwani ’baar mo tani /e minu kar ki mo ma ḵar/e mo be. 17 Dhali yan’ko’d Ibrahiim ’thoki’d ka Arumgimis mo. Dhali Arumgimis ki wac̱a Abimaalik mo dhali ashim piti si’da/ wac̱kunu mo dhali aris up̱ kun miina ṯu’c mo ki uni ki dho’thki uc̱i mo be. 18 Haali/ aris bwa gi gu’b ma Abimaalik molona dho’th mo mmomu’thkina Tap̱a uni mo gom gway ma Saarah mo a’di jin ta ash ma Ibrahiim mo.