48
’Ko’di mii yan mo tani aYuusup̱ a’di ṯorkunu gwo mo ki: Hili mo mo ma, ababam pini a’di ’ba’thki’d mo. Wakan a’di suski iya/m piti isu/ mo iManassa dhala Ep̱rayim mo. Dhali a’di ṯorkunuwa Yakuub mo ki: Ya/m pini ka Yuusup̱ a’di p̱u’dki’di /e mo, dhali yan’ko’da Yakuub iriny is piti mo mmogam mom’bi’th mo dhali c̱a’bki mis mo ap̱owa ci mo. Dhala Yakuub oki’da Yuusup̱ gwo mo ki: Arumgimis jin Eḵa/ Eḵ a’di piki aha/ i is mo e Pan Luus mo e bampa/ Kanaan mo dhali a’di ’borki aha/ mii mo be. Dhali a’di o aha/ gwo mo ki: Hili mo mo ma, aha/ mina kar /e mo mmodho’th maman kagahara mo dhali aha/ mina mar /e amar is mo dhali aha/ mina kar /e mo mmota adhana ŋul’kup̱ ’kwani mo dhali aha/ mina c̱i bampa/ yan ki emen pini mo i’ko’di /e mo mmota mom buni jin mina uni ibu’th ki sule/ sule/ mo. Dhali shwane/ iya/m pini isu/ gwansan uni kun dho’thkunu /e mo e bampa/ Masir mo nṯwa/a/ ki aha/ dinaki p̱u’di /e e Pa Masir mo tani uni ta kum pem mo Ep̱rayim dhala Manassa uni imini ta kum pem mo me’d jin tan ma Ra/ubiin dhala Shim/uun kum pem mo. Dhali uni kun minu c̱is ki /e ’ko’di uni mo tani uni a’di imini ta kum pini mo. Uni minu yuḵ gway gi ikam buni mo e mal buni mo. Haali/ me’d jin p̱u’dkika/ mo ’peni Pam P̱addaan mo tani aRahiil ki bwan diṯi’d pem mo tani a’di wukaa/ mo e Paŋ Kanaan mo e bway jin iiyina ana mo ki ŋaṯgin si’dasi’d naskina/ mo mmo’taki ii bway Pan Ap̱raatah mo dhali aha/ kankina ayim imun mo e bway tur gi Pan Ap̱raatah mo (a’di jin ta Pam Beeṯlaham mo).
Ka Israyiil p̱arki iya/ ma Yuusup̱ e mo kun ’koni su/ mo tani a’di oki gwo mo ki: Ija anni’dan mo? Yuusup̱ oki com gwo mo ki: Uni ta iya/m pem mo uni kun c̱ikin ma Arumgimis aha/ imahan mo. Dhali a’di oki gwo mo ki: Susi uni i aha/ mo ma, aha/ ’thona /e mo, ki aha/ mina ’bor uni mii mo. 10 Dhali e ma Israyiil a’di dhuruma/ dhurum mo goma dhan piti mo, wakan a’di imolkina a’di mmop̱ar e ki ’bore/ mo. Wakana Yuusup̱ suski uni mmo’dish a’di is mo dhali a’di ki p̱i uni ’twa/ mo dhali dhu uni mmota isa kony mo. 11 Dhala Israyiil oki’da Yuusup̱ gwo mo ki: Aha/ dara ki gwo ibwa mo me’dyin mo mmo’taki p̱ar jis/em pini e mo dhali hili mo mo ma, Arumgimis ki dhal aha/ bway mo mmop̱ar uc̱im pini e mo si’da/ mo. 12 Dhali yan’ko’da Yuusup̱ shorki uni is mo ’peni ’kup̱a’dup̱un piti mo dhali a’di goŋki is piti mo dhali kar jis/em piti ka ’cesh mo. 13 Dhali aYuusup̱ bu’thki uni isu/ mo, Ep̱rayim ki me’da bim poros piti mo ’kup̱ki me’da biny cam ma Israyiil mo, dhala Manassa ki me’da biny cam piti mo ’kup̱ki me’da bim poros ma Israyiil mo dhali suski uni mmo’dish a’di is mo. 14 Dhala Israyiil he’thki me’da bim poros piti mo dhali ’thi a’di i’kup̱ ma Ep̱rayim a’di jin gwa’da’d mo dhali me’da biny cam piti di’di ’kup̱ ma Manassa mo mmo/aḵ abi e mo haala Manassa a’di ta’da bwanyara/ mo. 15 Dhali a’di ’borki’da Yuusup̱ mii mo dhali o gwo mo ki:
Arumgimis a’di jin iikina ibabam pem ka Ibrahiim dhala Is/hak mo
dhali Arumgimis jin shuki aha/ bway eya ris mondiki/em pem mo ntagi shwanesan mo,
16 aman’doyu gwo a’di jin wanki aha/ ’ba/ mo ’pena ris tonthus mo, ’bori uc̱i mii mo.
Dhali e uni mo tani dhalki gway pem lu/ki’d mo dhali gway gi ibabam pem ka Ibrahiim dhala Is/hak mo.
Dhali dhalki uni can mo mmota dhana buhany ’kwani mo e bwaman mony’cesh mo.
17 Ka Yuusup̱ p̱arki com e mmokar me’da bim poros piti i’kup̱a Ep̱rayim mo tani a’di ishi/ki a’di bwa mo, dhali a’di ki bu’th com ime’d mo dhali shor a’di me’d piti mo ’peni ’kup̱ ma Ep̱rayim mo mmokar a’di i ’kup̱ ma Manassa mo be. 18 Dhala Yuusup̱ ki o com gwo mo ki: Yisa ababam pem haali/ a’di yansan ita’da bwanyara/ mo. Kari me’da bim poros pini i’kup̱ piti mo. 19 Hili ababam piti a’di i/ushki’d mo dhali o gwo mo ki: Aha/ misha mo ya/m pem mo, aha/ misha mo. A’di si’da/ midi war ki ’kwani mo dhali a’di si’da/ midi caaca mo. Bahili ara kam jin gwa’dagwa’d a’di imidi caaca kagahara mo mmobol a’di e mo dhali emen piti midi ta abuhany kal ’kwaniny’cesh ka ris mo. 20 Wakan a’di ’borki uni mii ka cim c̱aan mo dhali o gwo mo ki:
Ki um mo tani Israyiil a’di imini bah mom’bor mii mo mmo/o gwo mo ki:
Arumgimis midi kar /e me’da Ep̱rayim mo dhali me’da Manassa mo.
Dhali wakan a’di karki’da Ep̱rayim nṯwa/a/ ka Manassa mo be. 21 Dhali yan’ko’da Israyiil oki’da Yuusup̱ gwo mo ki: Hili mo mo ma, aha/ ’dishkina ’twa/ mmowu mo, hili Arumgimis midi nyaḵ di ki /e mo dhali a’di midi susi /e bway pa ka nyaŋ’ko’d e mony’cesh gi ibabam pini mo. 22 Ba aha/ c̱ikina /e tony caaga/ mmobol ikan e mo a’di jin ta ’ban ’de/ ka wosha turga/ mo a’di jin bu’thka/ ’peni me’d gi ’Kwani Amuur ki gandala turgam pem mo dhali ki bwam pem mo be.