1 Dhali imantera thulp̱a/ dhali imanmii miinthus mo uni ’kokin mo mmo’dish a’di is mo mmociḵ a’di gwo mo be. 2 Dhali ’Kwani P̱arisiyiin dhali iman’kwar to mo uni miina gumgum mo mmo/o gwo mo ki: Wathi/ yansan a’di buthi imanmii miinthus mo dhali nyaḵ to shwa ki uni mo be.

3 Wakan a’di ki ṯor uni gwo gom gwom ’bi’th/e yansan mo be ki: 4 Ki wathi/ jana ibwam um ta’d gi ḵa’bal issi mudhe’d mo, waḵki/ jan ’de/ this e mo ’peni uni mo tani a’di midi diki dhal uni ka iss ’kwanimpa imudhe’d mmo/aṯẖ ’de/ mo e bwaasho mo dhali ya mo mmoŋap̱ a’di jin thiski e mo ntagi a’di ki gam a’di mo ’taa? 5 Dhali ki a’di gamki a’di mo tani a’di ki kar a’di mo e ’kup̱a bim piti mo dhali ’kuny bwa mo be. 6 Dhali ki a’di p̱u’dki bway pa mo tani a’di ki yuḵ imugum piti mo dhali imannyaḵ ’kom piti mmonṯal ’de/ mo mmo/o uni gwo mo ki: ’Kunyi bwa mo ma, nyaḵki aha/ mo, haali/ aha/ gamkina ḵa’bal pem jin thiski e mo be. 7 Dhali wakan, aha/ ṯora um gwo mo ki mom’bor bwa midi caaca mo ki nyanye/ mo e momis mo ap̱o/ jan ’de/ jin ta’da amanmii miinthus jin ri’cki’da du is mo mmobol uni gun ta iss ’kwanimpa imudhe’d aṯẖka ’de/ e mo kun tana ḵar/e mo uni gun mini mii ’koki ta gi mo gi rica du is mo be.

8 Walla a’bom jana ta gi emena guurush ’dolkon kushi kume’d mo,*Emena guurush ’dolkon kush ’de/ jin wana e ki nasa guurush mo. waḵka yim this jan ’deŋ kamu/ e mo tani mina a’di diki ḵanya lamba/ mo dhali dhi’th gu’b mo dhali ŋap̱ a’di ki burbur mo ntaga yim ki gam a’di mo ’taa? 9 Dhali ka yim gamki a’di mo tani ayim ki yuḵ iyim piti mo dhali imannyaḵ ’kom piti mo mmonṯal ’de/ mo mmo/o gwo mo ki: ’Kunyi bwa mo ma, nyaḵki aha/ mo, haali/ aha/ gamkina emena guurush pem jin thiskika/ e mo be. 10 Dhali wakan si’da/ aha/ ṯora um gwo mo ki moŋ’kuny bwa midi di mo ibwambori iman’doyu gwo ma Arumgimis mo ap̱o/ amanmii miinthus ’de/ jin ri’cki’da du is mo be.

11 Dhali a’di ki o gwo mo ki: Wathi/ di’d jin ta gi iya/i su/ mo be. 12 Dhali a’di jin gwa’da’d ki uni mo, o com gwo mo ki: Ababa, c̱i aha/ to jin minu pwaḵ bwa mo gom aha/ mo. Dhali a’di ki pwaḵki uni to bwa mo be. 13 Dhali ka cim ’koki ta aris ŋ’ko’d mo tani a’di ya/ jin gwa’da’d mo tulki’da ris to isi ’baar mo dhali a’di ki bu’th moyam piti mo e bampa/ jin si’dasi’d mo, dhali e mun mo tani a’di ki la mii tom piti ka burbur mo dhali a’di diki butha shure/ mo. 14 Dhali ki a’di ’baarki tom piti ’baar mo tani adhan ṯe/ cuki mis mo e bampa/ c̱aan mo dhali a’di ṯelki mii ’pen mo mmohar to mo be. 15 Wakan a’di yaki’d mo mmogam is piti gi wathin ’de/ gi ’peŋkuman bampa/ c̱aan mo. A’di ki hash a’di mo e bwam buntom piti mo mmoc̱i ḵuthar to mmoshwa mo. 16 Dhali a’di imina bwa ’bor mmoshwa ḵwarma’c maman cwa mo kun c̱inu ḵuthar mo mmoshwa mo be. Dhali jan ’deŋ kamu/ yisa di’da jin c̱i a’di to mo. 17 Hili ki a’di kulumki gwo ibwa mo ki is piti mo tani a’di o gwo mo ki: Hili c̱iŋkina/ ma baba wana risa kun c̱ikina a’di aguurush mo dhali kun ta gi tonṯe/ kun ’koshi jwa mo dhali kun uri ’kup̱ mo, hili aha/ ’ce’dkunu sho’k ki ṯe/ mmahan mo be. 18 Aha/ mina cu mis mo dhali ya ababam pem mo dhali aha/ mina o a’di gwo mo ki: Ababa, aha/ miikina miinthus ap̱o/ momis mo dhali ibwambori /e mo be. 19 Aha/ mina mish ta ji gi ha me’d mo doḵ/e yisa ki aha/ minu yuḵ ki ya/m pini mo. Kari aha/ ki c̱iŋkina/ jin midi mii to ka guurush mo ma. 20 Dhali a’di cuki mis mo dhali p̱u’d mo eya ababam piti mo. Dhali hili ki a’di si’dasi’d mo mbway naskina/ mo tani ababam piti mishki a’di mo dhali a’di ki hil a’di ka ’thime/ mo dhali a’di ki gus mo dhali koṯẖ a’di me’d mo dhali p̱i a’di ’twa/ mo be. 21 Dhali ya/ ki o a’di gwo mo ki: Ababa, aha/ miikina miinthus ap̱o/ momis mo dhali ibwambori /e mo. Aha/ dinaki ta ji gi ha me’d mo jin minu yuḵ ki ya/m pini mo be. 22 Hili com ki o c̱iŋkinam piti gwo mo ki: Guyu/ burrinye/ jin ’boro’d ki jahanne/ mo ma dhali hi’th a’di mo, dhali hi’th a’di ki tome’d mo dhala p̱p̱a/ e sho’k piti mo. 23 Dhali guyu/ ara morbip̱ mo jin ’thiḵa’thiḵ mo dhali ’kosh a’di mo dhali dhalki ana ’kana a’di mo dhali ’bor bwa mo. 24 Haali/ ya/m pem yansan a’di wuki’d mo dhali a’di piki’d mo shwane/ doḵ/e. A’di thiski e mo tani, dhali a’di gamkunu mo. Dhali uni ṯelki mii ’pen mo mmo’bor bwa mo be.

25 Dhali ya/ jin ta’da bwa nyara/ mo tani a’di di’d e bwam bunto mo. Dhali ki a’di p̱u’dki’d mo dhali ’dish gu’b is mo tani a’di ciḵki gway jin yuḵu mo dhali sa jin sana ’kwani mo be. 26 Dhali a’di ki yuḵ c̱iŋkinaŋ kamu/ ’de/ mo dhali a’di ki doṯ a’di gwo gom ’pemen mii yansan mo. 27 Dhali a’di ki o a’di gwo mo ki: Akam pini p̱u’dki’d mo dhali ababam pini a’di ’koshki a’di ara morbip̱a ’thiḵga/ mo haali/ a’di bu’thki a’di ka nyaŋ’ko’d ki ’dantar mo dhali ki ’bore/ mo. 28 Hili a’di shwaki’da nyor mo dhali ush bway bwaŋ gu’b ya mo be. Ababam piti yaki’d/ ka pije/ mo dhali malas a’di mo. 29 Hili a’di thoḵki com gwo mo ki: Hili mo mo ma, ka ris yili ’baar mo tani aha/ miikina /e to mo dhali aha/ dinaki ush gwoŋḵan pini e mo. Hili /e diki c̱i aha/ ari mi mo ki aha/ mina ’taki ’bor bwa mo nyaḵki imugum pem mo. 30 Hili ki ya/m pini yansan p̱u’dki’d mo tani a’di jin loski tom pini ki miinthus jin ta miinyc̱al mo dhali /e ki ’koshki a’di amor bip̱a ’thiḵga/ mo. 31 Dhali a’di ki o a’di gwo mo ki: Ya/uma, /e nyaḵ di ki aha/ isa yempa/ mo dhali aris to gwansani ’baar mo kun ta kum pem mo tani uni ta kum pini mo be. 32 A’di ha me’d ki haŋ gana/ mo mmo’bor bwa mo dhali mmo’kuny bwa mo goma kam pini yansan jin wuki’d mo dhali a’di di’d ki e mo, a’di jin thiskunu e mo dhali a’di gamkunu mo be.