1 A’di cic̱ki’d mo e Pa Ariiha mo dhali a’di yaki’d ki tur mo be. 2 Dhali e mun mo tani wathiŋ kamu/ diki’d jin yuḵu gway ka Sakka mo. A’di ta’da ’kaŋ’kup̱ gi imantera thulp̱a/ mo dhali a’di ta pa ki pa mo be. 3 Dhali a’di ŋap̱ki mo mo mmop̱ara Yesus e mo ki a’di ta’da ata mo dhali hili a’di diki p̱ar a’di e mo goma risa waambuhany ’kwani shwa’da nyor mo haali/ a’di kuṯakuṯ ki kuṯ piti mo be. 4 Wakan a’di guski’d iṯwa/a/ mo dhali se mis cwamp̱u/ mo mmop̱ar a’di e mo haali/ a’di yaki’d e bway c̱aan mo be. 5 Dhali ka Yesus p̱u’dki’d mo e mo yan mo tani a’di ki hil ’kup̱ ki mis mo dhali o gwo mo ki: Sakka, thulu/ ka ’cesh ki ’ta’b mo haali/ aha/ mina mii di e gu’b pini shwane/ mo be. 6 Wakan a’di thulki’d mo ise/ dhali yayu/ ka ’cesh mo dhali bu’th a’di ki bwaŋ ’kunyga/ mo be. 7 Dhali ki uni p̱arki a’di e mo tani uni ’baar mo miina gumgum mo mmo/o gwo mo ki: A’di yaki’d mo mmota yilkina/ e gu’b gi wathi/ jin ta’da manmii miinthus mo be. 8 Dhala Sakka doshki’d mo ki mis mo dhali o Tap̱a gwo mo ki: Hili mo mo ma, Tap̱a, ’ban gi tom pem jin taka/ ka dehe/ mo tani miga/ c̱i ’kwani kun hatha’ko’d mo be. Dhali waḵki/ aha/ shwana to ki kup̱ ’peni jan ṯal ’deŋ kamu/ mo tani aha/ mina c̱i a’di ka nyaŋ’ko’d me’di doŋon ap̱o/ mo. 9 Dhala Yesus ki o a’di gwo mo ki: Shwane/ mowoṯẖ a’di p̱u’dki’d mo e gu’b yansan mo me’d jin tana a’di ya/ ma Ibrahiim si’da/ mo be. 10 Haali/ Ya/ gi ’Kwani p̱u’dki’d mo mmoŋap̱a ŋap̱ mo dhali mmowoṯẖa woṯẖ mo gom uni gun thiskunu e mo be.

11 Me’d jin ciḵkina uni gwo gwansan mo tani a’di marki uni gwoŋ kamu/ is mo mmoṯorki gwom ’bi’th/e mo haali/ a’di ’dishki Pa Urushaliim is mo dhali haali/ uni ṯoshkin ki Bampa/ ma Arumgimis minu piyu/ ki jahanne/ mo be. 12 Gom gwo gi wakan mo tani a’di ki o gwo mo ki: Wathi/ jin mii’da ṯu’c e bampa/ ma maliḵ tani a’di yaki’d mo e bampaŋ kamu/ jin si’dasi’d mo mmobu’th mom’bi’th ma maliḵ mo dhali doḵu/ ka nyaŋ’ko’d mo. 13 A’di ki yuḵ c̱iŋkinam piti kun ’koni ’kume’d mo. A’di ki c̱i uni kuluny ’dolkoni ’kume’d*Kuluny ’dolkon ’de/ wana e ka riyaal iss ’kwanimpa ikwara mo. mo. Dhali a’di ki o uni gwo mo ki: Miiyi aṯu’c ki uni gwansan mo ma ntagi aha/ mina p̱u’du/ mo. 14 Hili ’kwani gi bampam piti shi/i a’di i e mo dhali hashki a’di ’kwani kun hashu mo mmobaṯẖ a’di isho’k mo mmo/o gwo mo ki: Am ’tena bwa jin mina wathi/ yansan ta tap̱a ap̱o/ am mo be. 15 Ki a’di doḵki’d ka nyaŋ’ko’d mo mmobu’thkina a’di mom’bi’th ma maliḵ mo tani a’di ḵanki c̱iŋkina/ gwansan gwo mo e uni kun c̱ikina a’diya guurush mo ki uni minu yuḵu/ i a’di mo ki a’di midi mish to mo gom nyunycina/ to kun miikunu mo. 16 Jin ṯwa/a/ p̱u’dki’d ibwambori a’di mo mmo/o gwo mo ki: Tap̱a, kuluny ’dolkon pini warki’d ki kuluny ’dolkoni ’kume’d mo be. 17 Dhali a’di ki o a’di gwo mo ki: Mba/ /e ta c̱iŋkina/ jin ’boro’d mo. Haali/ /e ta a’di jin ta isiŋ gana/ mo eya p̱o/ ushi to kun gwa’dan mo tani /e mini ta gi moshirr ap̱o/ ’peŋkuman bampa/ kun ’koni ’kume’d mo be. 18 Dhali jin ’kon ma p̱o/i su/ p̱u’dki’d mo si’da/ mmo/o gwo mo ki: Tap̱a, kuluny ’dolkon pini warki’d ki kuluny ’dolkoni mudhe’d mo be. 19 Dhali a’di ki o a’di gwo mo ki: /e mini ta tap̱a ap̱o/ ’peŋkuman bampa/ kun ’koni mudhe’d mo. 20 Dhali yan’ko’d jaŋ kamu/ p̱u’dki’d mo mmo/o gwo mo ki: Tap̱a, kuluny ’dolkon pini a’dan be, a’di jin karkika/ mo eya mantiil mo. 21 Haali/ aha/ ḵo/ka /e mo haali/ /e ta wathi/ jin ceshi mo mo ki thiṯẖ mo. /e ’de’kki a’di jin dina /e ki kara ’cesh mo dhali /e ’ciṯẖki a’di jin dina /e ki si mo be. 22 A’di ki o a’di gwo mo ki: Aha/ mina waḵ /e mo ’peni gwo gi ’twam piniŋ gana/ mo. /e ta c̱iŋkina/ jin ta thus mo. /e mishin ki aha/ tana wathi/ jin ceshi mo mo ki thiṯẖ, mmo’de’k a’di jin dika/ ki kara ’cesh mo dhali mmo’ciṯẖ a’di jin dika/ ki si mo tani 23 atinta dina /e ki dhuka guurush pem mo e mo jin dhunuwa guurush mo dhali ki yam pem jin miga/ p̱u’du/ mo tani aha/ mina ’taki tul uni is mo nyaḵki nyunycinam piti mo? 24 Dhali a’di ki o uni gwansan gwo mo uni kun doshkin mo ki: Budhi kuluny ’dolkon ’peni a’di mo ma, dhali c̱i a’di jin ta’d gi kuluny ’dolkoni ’kume’d mo. 25 (Dhali uni ki o a’di gwo mo ki: Tap̱a, a’di ta’d gi kuluny ’dolkoni ’kume’d mo be Ayy!) 26 Aha/ ṯora um gwo mo ki, eya ris uni ’baar mo ka ’deṯe/ ’deṯe/ uni kun tan gi to mo tani minu c̱i ki nyanye/ mo be, hili ’peni a’di jin dara’d mo tani a’di si’da/ jin tana a’di mo tani a’di minu war a’di mo be. 27 Hili gom uni gwansan kun ta ’kup̱ ki aha/ mo tani uni kun ’koki ŋap̱ aha/ mo mmota tap̱a ap̱o/ uni mo tani susi uni mmahan mo ma dhali ’kosh uni jwa mo mbwambori aha/ mo.

28 Dhali ki a’di oki gwo gwansan mo tani a’di yaki’d nṯwa/a/ mo mmoya ka gagamis mo e Pa Urushaliim mo be. 29 Ki a’di ’dishki Pam Beeṯp̱aji is mo dhali Pam Beeṯaniya mo tani e ’kuwosh c̱aan jin yuḵu ka Seṯuun mo tani a’di ki hash uni su/ ’peni imanciḵ a’di gwo mo 30 mmo/o uni gwo mo ki: Iiku/ bampa/ mo ma jin di’d ka p̱ar ’twa/ mo. E mo jin cic̱kina umi cine/ mo tani um mini gam ari thuluny jin shi’dkunu mo, a’di jin dina wathin ’deŋ kamu/ ki mera p̱o/ mo ki sule/ mo. ’Cuḵi a’di mo ma dhali susi a’di mmahan mo. 31 Waḵki/ jan ’deŋ kamu/ doṯi um gwo mo ki: Atinta ’cuḵa um a’di mo tani um mini o gwo mo cikise/ ki: Tap̱a midi mii ta gi a’di mo be. 32 Wakan uni gwansan kun hashkunu mo tani iikin mo dhali gam a’di me’d jin ṯorkina a’di uni gwo mo be. 33 Dhali me’d jin ’cuḵkina uni ari thuluny mo tani icom gi ari thuluny o uni gwo mo ki: Atinta ’cuḵa um ari thuluny mo? 34 Dhali uni thoḵ uni gwo mo ki: Tap̱a midi mii ta gi a’di mo be. 35 Dhali ki uni suski a’di aYesus mo tani uni ṯa’kki burrinyem buni ap̱o/ ari thuluny mo dhali uni ki kara Yesus ap̱o/ a’di mo be. 36 Dhali ki a’di merki’d ki tur mo tani uni p̱a’dki burrinyem buni e bway tur mo be. 37 Dhali me’d jin ’dishkina a’di mo is mo tani e mo jin thulkina Wosh ma Seṯuun ’twa/ ka luŋgu’b mo tani awaambuhany ’kwani kun ta imanciḵ a’di gwo mo tani uni ṯelki mii ’pen mo mmo’kuny bwa mo dhali mmomaŋa Arumgimis mo ki ’twa/ jin caaca mo gom miim ’bi’thga/ kun p̱arkina uni e mo 38 mmo/o gwo mo ki: Mom’bor mii goma maliḵ mo, a’di jin p̱u’dki’d mo ki gway gi Tap̱a mo. Moŋḵu’th is e momis mo, dhali monyca e mo jin ca e ki ca mo be. 39 Dhali ’Kwani P̱arisiyiina tiya uni ’kokin mo e bwaman ma waambuhany ’kwani mo mmo/o a’di gwo mo ki: Manṯor Gwo, ḵucuri imanciḵ /e gwo gwo mo ma. 40 A’di thoḵ uni gwo mo ki: Aha/ ṯora um gwo mo waḵki/ uni mini ’ko ki shwam mo tani wosh gwahan uni mini ’taki ’ther cuuwa/ mo be.

41 Dhali ki a’di ’dishki mo is mo dhali p̱ar ’peŋkuman bampa/ e mo tani a’di gwoki’d ap̱o/ a’di mo be 42 mmo/o gwo mo ki: Waḵki/ /e mini ’taki mish shwane/ to gi ta jim moŋḵu’th is mo tani hili shwane/ uni bagkunu mo ’peni em pini mo be. 43 Haali/ atee mini p̱u’du/ ap̱o/ /e mo ki uni kun ta ’kup̱ gi /e mini nyaŋa goŋ mo mmo’kam /e is mo dhali uni mini ’kam /e ’kup̱ mo dhali /e minu hem mo ki ’twaŋkal kuku/ mo be 44 dhali /e minu mu/i ’baar mo eya ’cesh mo, /e dhali uc̱im pini kun ’koni bwam/e mo dhali uni mini ’koki dhal wosha kamu/ ka maḵamp̱o/ e /e mo haali/ /e diki nyiṯẖ mo mo gom mowoṯẖ pini mo be.

45 Dhali a’di cic̱ki gu’b gi mondheleladhelel mo dhali ṯelki mii ’pen mo mmo/ur ’kwani gwansan ka pije/ kun yoli to mo 46 mmo/o uni gwo mo ki: A’di ’kwarkunu mo ki: Gu’b pem midi ta gu’b jin miinu ’tho mo. Hili um mii a’di me’d gu’b gi ’kwanin ’di/ mo be.

47 Dhali a’di rashki uni gwo ṯor ka yempa/ mo e gu’b gi mondheleladhelel mo. Igasiis kun can dhali iman’kwar to mo dhali ’kwaniŋ gwanyjaḵa/ uni ŋap̱ki bway mo mmo’ce’d a’di sho’k mo be. 48 Hili uni ’koki gam toŋ kamu/ jin mina uni mii mo be haali/ aris ’kwani ’baar mo uni laki gwom piti me’d ki ḵwap̱ ḵwap̱ mo be.