2
Mombuṯ jin Buṯa ’Kwani kun Yuḵayuḵ mo
Dhali ka Yesus dho’thkunu mo e Pam Beeṯlaham gi Pa Yahuudiyya ka tee ma Hirodus jin ta’da maliḵ mo tani hili ’kwani kun yuḵayuḵ ’peni mom’pesho’k pu’dkin mo e Pa Urushaliim mo mmo/o gwo mo ki: Mane a’di jin dho’thkunu mo mmota maliḵ gi ’Kwani Yahuuda/ mo? Haali/ aman p̱arkina acul piti e mo e mom’pesho’k mo dhali aman iikina mo mmoluŋ a’di mo be. Ka Hirodus jin ta’da maliḵ ciḵki gwo yansan mo tani a’di mur ma du mo dhali aris ’kwani gi Pa Urushaliimi ’baar mo nyaḵki a’di mo be. Dhali a’di ki tul aris igasiis kun can is mo dhali iman’kwar to gi ’kwani mo. A’di ki doṯ uni gwo mo gom mo jin minu dhodha Ḵrisṯẖos nycine/ mo. Dhali uni ki ṯor a’di gwo mo ki: E Pam Beeṯlaham e Pa Yahuudiyya mo, haali/ wakan a’di ta gwo jin ’kwarkin ma manc̱i gwo ma Arumgimis kadhamo/ mo ki:
Dhali /e, ayy Beeṯlaham, e bampa/ Yahuudiyya mo tani
/e yisa p̱isina e bwaman ’kwani gi itap̱a gi ’Kwani Yahuudiyya mo,
haali/ ’peni /e mo tani amanjiya ji midi p̱u’du/ mo,
a’di jin midi hil ’kwanim pem ma Israyiil mo be.
Yan’ko’d Hirodus ki yuḵ ’kwani kun yuḵayuḵ mo ka ḵwal is mo dhali doṯ gwo ’peni uni goma tee jin pikin ma cul mo. Dhali a’di ki hash uni e Pam Beeṯlaham mo mmo/o gwo mo ki: Iiku/ mo ma dhali ŋap̱ gwo ka ḵar/e goma ’ci mo, dhali ki um mini gam a’di mo tani guyaa/ gwo mo ki aha/ si’da/ mina yaku/ mo dhali luŋ a’di mo be. Ki uni ciḵki gwo ’pena maliḵ mo tani uni iikin e bway buni mo, dhali hili, acul jin p̱arkina uni e mo e mom’pesho’k mo tani yaki’di uni ibwambor mo ntagi a’di p̱u’dki’d mo mmodosh ap̱o/ mo jin din ma ’ci nycine/ mo be. 10 Ki uni p̱arkina acul e mo tani uni ’kunykina bwa mo ka daran du ki dhan bwaŋ ’kunyga/ mo. 11 Dhali ki uni iiki bway bwaŋ gu’b mo tani uni p̱arkina ’ci e mo nyaḵka Mariyam jin ta kum mo dhali uni ṯa’kkina ’cesh mo dhali luŋ a’di mo. Dhali yan’ko’d uni ki ḵa’d tom buni gun ish ḵumma/ ’twa/ mo tani uni ki c̱i a’di to kun c̱inu ki me’d mo, ’dolkon gana/ mo dhala ’bicajwahar mo dhala ’bi’c cwa jin yuḵu ka murr mo be. 12 Dhali uni rumkunu ki gwo ki jan mo mmo’koki doḵa Hirodus mo. Uni iikin ki bway bampam buniŋ gana/, mo ki bwaya kamu/ mo be.
Hirodus Palki Mii mo Mmo’kosha Yesus mo
13 Dhali ki uni iikin mo tani hili mo mo ma, aman’doyu gwo gi Tap̱a piki’da Yuusup̱ i is mo ki jan mo dhali o a’di gwo mo ki: Cuyi mis mo ma, dhali susa ’ci dhali kum mo dhali soyi mo e Pam Masir mo dhali ’koyi mmun mo ntagi aha/ mina ṯor /e gwo mo, haala Hirodus muru’di ŋap̱a ’ci mmo’ce’d a’di sho’k mo be. 14 Dhali a’di cuki mis mo dhali susa ’ci mo dhali kum mon’thiny mo dhali ii Pam Masir mo. 15 Dhali uni ’kokin mo mmun ntagi jwa ma Hirodus mo. Yansan miikunu mo mmothim gwo jin ona Tap̱a ka manc̱i gwom piti kadhamo/ mo ki: ’Peni Pam Masir mo tani aha/ yuḵkina ya/m pem mo be.
16 Yan’ko’d ka Hirodus ki a’di p̱arki mo e ki a’di he’kkunu e ki ’kwani kun yuḵayuḵ mo tani a’di daḵ ma nyor bwa me’d mo dhali a’di ki hash gwo mo dhali ’kosh uc̱iŋgwaṯẖ jwa ’baar mo kun ’kon e Pam Beeṯlaham mo dhali e bampa/ kun ’kon ka kukul is mo kun ’kona yil susu/ mo dhali kun ’kona bor mo me’d gwo jin da/arkina a’di ’peni ’kwani kun yuḵayuḵ mo. 17 Wakan a’di thimkunu mo jin okin ma manc̱i gwo ma Arumgimis kadhamo/ mo jin ta’da Irmiya mo ki:
18 ’Twa/ ciḵkunu mo e Pa Rama mo
mmomiiya c̱inthar mo dhali kony jwa jin gwonu ki jabu’th mo,
aRahiil gwoki’d mo gom uc̱i ma yim mo.
Ayim ushki’d mo ki a’di minu malas mo,
haali/ uni mini ’koki ’ko doḵ/e mo be.
19 Hili ka Hirodus wuki’d mo tani hili mo mo ma, aman’doyu gwo gi Tap̱a piki’da Yuusup̱i is ki jan mo e Pam Masir mo mmo/o gwo mo ki: 20 Cuyi mis mo ma dhali susa ’ci dhali kum mo, dhali iiyi e bampa/ gi ’Kwani ma Israyiil mo haali/ uni gwansan kun ŋap̱kina ’ci mondiki/em piti mo mmo’kosh mo tani uni wukin mo be. 21 Dhali a’di cuki mis mo dhali susa ’ci dhali kum mo dhali ii mo e bampa/ gi ’Kwani ma Israyiil mo be. 22 Hili ki a’di ciḵki gwo ka Arḵilaawus ta tap̱a ap̱o/ Pa Yahuudiyya mo e mo gi com ka Hirodus mo tani a’di ḵo/ki is mo mmoya mo dhali a’di rumkunu ki gwo ki jan mo tani a’di yaki’d mo e Pany Jaliil mo be. 23 Dhali a’di yaki’d mo mmoc̱a’b e ’peŋkuman bampa/ jin yuḵu ka Naasira mo. A’di jin ta gwo jin okin ma manc̱i gwo ma Arumgimis kadhamo/ mo ki a’di minu thim mo ki: A’di minu yuḵ ki wathi/ gi Pa Naasira mo be.