6
Yesus Ṯorki Gwo gom To jin Minu C̱i ’Kwani kun Hatha’ko’d mo
Jiyi miiny jarom bum jin mina umi boṯ mo mbwambori ’kwani mo mmomina uni mish um mo haali/ ŋ’ko’d mo tani um mini ta gi to jin ish ḵumma/ yisa ’pena Ababam bum jin di’d e momis mo.
Wakan si’da/ ki /e mini c̱i to jin c̱inu gom ’kwani kun hatha’ko’d mo tani dhalku/ ki kowa poome/ mo mbwambori /e mo me’d ’kwani kun tana he’k e ka he’k e mo kun miiki to mo e gu’b gi montul is mo dhali e bway tur kun iinu mo ki uni mina ’kwani imaŋ mo. Ka jiŋ gana/ aha/ ona um gwo mo ki uni tan gi tom buni gun ish ḵumma/ mo be. Hili ki /e mini c̱i to gom ’kwani kun hatha’ko’d mo tani dhalku/ ki dhal me’da cam pini mmomish me’da bim poros pini mmomiina a’di to mo wakan ki tom pini kun c̱ina /e gom ’kwani kun hatha’ko’d mo minu mii ki kup̱ mo, dhala Ababam pini jin mishki’da ris to gun miinu ki kup̱ mo tani midi c̱i /e to kun mini ish ḵumma/ mo be.
Yesus Ṯorki Gwo mo gom Mon’tho mo
Dhali ki /e mini ’tho mo tani /e mini mii dhalku/ ki mii me’d ’kwani kun ta imanhe’k e mo haali/ uni eni mondosh mo dhali ’tho mo e gu’b gi montul is mo dhali e mo jin ’ciṯẖa/ bway tur mo ki uni mina ’kwani mish mo. Ka jiŋ gana/ aha/ ona um gwo mo ki uni tan gi tom buni kun ish ḵumma/ mo be. Hili ki /e mini ’tho mo tani yayi gu’b pini mo dhali muthi acampur mo dhali ’thoyi Ababam pini mo, a’di jin ’konuki ṯor eya tente/ mo, dhali Ababam pini, a’di jin mishki to gun ’kon ki kup̱ mo tani midi c̱i /e to gun ish ḵumma/ mo be.
Dhali eya ’thom bum mo tani dhalku/ ki roṯẖ gwo ap̱o/ mo gun ’ko bwa ’te/ mo me’d ’kwani kun ’koki ta ’Kwani Yahuuda/ mo haali/ uni kulumki gwo mbwa mo ki uni minu ciḵ ’twam buni ki gwom buni kun ona uni ka ris mo be. Dhalku/ ki wa e ki uni mo ma haali/ Ababam bum mishki a’di jin mina um mii ta mo nṯwa/a ki um doṯki a’di mo be. ’Thoyi wa cikise/ mo ma:
Ababam bam jin di’di momis,
dhalki gway pini a’di ḵogu mo ma.
10 Dhalki bampam pini a’di yayi’da ’cesh.
Dhali dhalki bwam pini a’di miinu a’cesh mo ma
me’d yan a’di miinu e momis.
11 Ka tee yansan c̱iyi am tonṯem bam jin ta ji gi isa yempa/ mo ma.
12 Dhal am amure/ miinthus bam ’pen mo ma
me’d yan si’da/ dhala aman ’kwani ’pen gun ’kon ka mure/ miinthus bam m’ba/.
13 Dhalku/ ki sus am e mo jin palu mo e miinthus.
Hili woṯẖi/ aman ’peni wathin thus mo ma.
14 Haali/ waḵki/ um mini dhal ’kwani gwon dhaŋ buni ’pen mo tani Ababam bum si’da/ midi dhal um gwon dhaŋ bum ’pen mo be. 15 Hili waḵki/ um ’koki dhal ’kwani gwon dhaŋ buni ’pen mo tani wakan si’da/ Ababam bum midi diki dhal um gwon dhaŋ bum ’pen mo be.
Yesus Ṯorki Gwo mo gom To jin Ga/u mo
16 Dhali ki um mini ga/ to mo tani dhalku/ ki hil mo ki eŋgwamash mo me’d ’kwani kun tana he’k e ka he’k e mo haali/ uni warki jis/em buni mo ki moŋga/ tom buni minu mish ki ’kwani mo. Ka jiŋ gana/ aha/ ona um gwo mo ki uni tan gi tom buni kun ish ḵumma/ mo be. 17 Hili ki /e mini ga/ to mo tani shupuri ’kup̱ pini ka yin mo ma dhali lami bwam/em pini mo 18 ki moŋga/ tom pini minu ’koki mish ki ’kwani mo hili ka Ababam pini, a’di jin dinuki ṯor mo eya tente/ mo, dhali Ababam pini jin mishi to jin di’d ki jiŋ kup̱ mo tani a’di midi c̱i /e to jin ish ḵumma/ mo be.
Mmo/ish Ḵumma/ e Momis mo
19 Dhalku/ ki sug to gom is pini mo ma mmo/ish ḵumma/ mo e mony’cesh yan mo, e mo gun ’kon ma dhurany mo dhali mo gun wuna to gure/ mo mmoshwa mo dhali mo gun ’kona ’kwanin ’di/ mo mmo’ce’d mo mo dhali mmoḵwal to mo be. 20 Hili suki is pini ki to kun ish ḵumma/ mo e momis mo e mo jin dar ga dhurany mo walla mo jin wuna to gure/ mo mmoshwa to mo dhali e mo jin daru gi ’kwanin ’di/ mo mmo’koki ’ce’d to mo dhali ḵwal to mo. 21 Haali/ mo jin isha tom pini ḵumma/ mo tani a’di ta mo jin min ma dum pini idi si’da/ mo be.
Alamba/ gi Buŋgwar Is mo
22 E, a’di ta’da lamba/ gom buŋgwar is mo. Wakan waḵki/ em pini midi c̱a’bki ḵwany ḵwany mo tani buŋgwar is pini ’baar mo ka ’bimpil mo tani minu ’tu’d mo ki moŋkush mo be. 23 Hili waḵki/ em pini diki c̱a’bki ḵwany ḵwany mo tani buŋgwar is pini ’baar mo ka ’bimpil mo tani minu ’tu’d mo ki mondhurumi’d mo be. Waḵki/ moŋkush jin di’d e /e dhurumi’d mo kan tani dhan mondhurumi’d ’ka’da miiya!
Mmo/anan Is mo
24 Wathin ’deŋ kamu/ yisa di’da jin midi mish miiya ṯu’c gom tap̱a isu/ mo: haali/ a’di midi mii shi/ jan ṯal ’deŋ kamu/ i e mo dhali ena kamu/ mo walla ilu/ a’di midi bu’th jan ’deŋ kamu/ ka bor mo dhali waḵ jaŋ kamu/ mo be. Um moli mii Arumgimis to mo dhali mii to gun tanu pa ki pa mo.
25 Wakan aha/ ṯora um gwo mo ki dhalku/ is ki anan mo gom moŋ’koki/em bum mo ma walla gom tonṯe/ jin mina umi shwa mo walla gom to jin mina umi p̱i mo walla gom buŋgwar is bum mo gom to jin mina umi hithi is mo. Dina mondiki/e ki bol tonṯe/ e mo ’taa? Dhali buŋgwar is ki bol burrinye/ e mo ’taa? 26 Hili ’kup̱ ki ’dii kun p̱en e mis mo ma. Uni ’koki si to mo walla ’koki ’ciṯẖ to mo walla ’koki tul to is mo e bwan themes mo tani dhali hili Ababam bum jin di’di momis mo tani a’di thip̱ki uni mo be. ’Kona um ki ta ’kwani kun ’bitha yol she/ ki ’bi’th mo mmobol uni e mo ’taa? 27 Dhali wathi/ jana di’di bwam um mo jin midi anan is mo dhali jin midi mish ganan mondiki/em piti ’ba/ mo? 28 Dhali atinta anana um is mo gom burrinye/ mo? Kulumi gwo ibwa mo ma gom jandin to kun ’kona pije/ mo mmocakina uni mo. Uni ’koki miiya ṯu’c mo walla sura thus mo be. 29 Hili aha/ ṯora um gwo mo, goma Sulemaan e monycam piti ’baar mo tani a’di dinuki hi’th ki burrinye/ jin waki jandin ’de/ ’peni uni gwansan mo be. 30 Hili waḵki/ Arumgimis ki hitha sho ki burrinye/ wakan mo e bwaasho mo tani uni gun ’kokin mo shwane/ dhali ka’thamo/ ’kwani ki ṯa’k uni e mo/o’d mo tani bakata ’te/ mmina a’di diki hi’th um ki burrinye/ ki nyanye/ mo, ayy um ’kwani kun gwa’da moŋgam gwo is ki gwa’d mo kan? 31 Wakan dhalku/ is ki anan mo ma mmo/o gwo mo ki: Atinta mmina ana ishwa mo? walla, Atinta mmina ana ip̱i mo sa/? walla, Atinta mmina ana ihithi is mo sa/? 32 Haali/ ’kwani kun ’koki ta ’Kwani Yahuuda/ ŋap̱kina ris to gwansani ’baar mo, dhali Ababam bum jin di’di momis mo tani a’di mishki a’di jin mina umi mii ta gi uni ’baar mo be. 33 Hili simmi bampam piti e nṯwa/a/ mo ma dhali mo ma ḵar/em piti mo, dhali aris to gwansani ’baar mo tani uni mini ta kum bum si’da/ mo be.
34 Wakan dhalku/ is ki anan mo gom ka’thamo/ mo haala ’thamo/ midi anan is mo gom is piti mo. Dhalka tee ki is pitiŋ gana/ ṯoci bwa mo mmoṯeya tee mo.