25
Gwom ’Bi’th/e gom Nyaraŋ ’Kume’d mo
Yan’ko’d Bampa/ gi Momis minu kar ka p̱ar ’ban ki nyara/ kun ’koni ’kume’d mo kun ḵalkina lambam buni mo dhali ii mo mmoraḵ wathinyaŋa’b mbway mo be. Dhali unin tiya kun ’koni mudhe’d mo tani uni ta p̱us mo dhali kun ’koni mudhe’d mo tani uni yuḵayuḵ mo be. Haali/ uni gun ta p̱us ki p̱us mo ḵalkina lambam buni mo tani uni ’koki ḵala yini nyaḵki uni mo. Hili uni gun yuḵayuḵ mo ḵalki tura/ yin nyaḵka lambam buni mo be. Me’d jin tayina wathinyaŋa’ba diiṯe/ mo tani uni ’baar mo ṯo’da e is mo dhali ish e mo be. Hili ki mombwam/eŋ gana/ mo tani cuuwa/ cuuyunu mo ki: Hili mo mo ma. Wathinyaŋa’b a’dan be. Iiyu/ ka pije/ mo mmoraḵ a’di mbway mo. Dhali yan’ko’d aris nyara/ gwansan uni cuki mis mo dhali dhitha lambam buni is mo be. Dhali uni kun ta p̱us ki p̱us mo ki o uni gun yuḵayuḵ gwo mo ki: C̱iyi aman ara yin bum mo ma haali/ alambam bam mur ma yini ḵu’th mo be. Hili uni gun yuḵayuḵ thoḵ uni gwo mo ki: Wariba/ a’di si’da/ midi diki mii ’kosh jwa mo gom am mo dhali gom um mo. Ba dhali mii e i is mo dhali ii mo e imanyol to mo dhali yolu a’di gom is bum mo. 10 Dhali ki uni ’kokin mo mmo/ii mo mmoyol mo tani wathinyaŋa’b p̱u’dki’d mo dhali uni gwansan kun ’kokin mo mmothoson is mo tani uni iiki bway bwaŋ gu’b mo nyaḵki a’di mo e mo ma yuḵ gi momiimash mo. Dhali acampur mu’thkunu mo be. 11 Dhali yan’ko’d nyaran tiya uni p̱u’dkin mo si’da/ mmo/o gwo mo ki: Tap̱a Tap̱a, ḵa’dki aman gu’b mo ma. 12 Hili a’di thoḵ uni gwo mo ki: Ka jiŋ gana/ aha/ ṯora um gwo mo ki: Aha/ mola um mo be. 13 Wakan timi mo mo ma haali/ um moli mo mo walla cim mo walla mo mo be.
Gwom ’Bi’th/e gom Kuluny ’Dolkon mo
14 Haali/ a’di mina e waki wathi/ jin ya ya yilkina/ e bampaŋ kamu/ jin si’dasi’d mo dhali a’di ki yuḵ c̱iŋkinam piti mo dhali a’di ki c̱i uni tom piti mo be. 15 Dhali e jan ’de/ mo tani a’di ki c̱i a’di adhan kuluny ’dolkoni mudhe’d mo dhali e jaŋ kamu/ tani a’di ki c̱i a’di adhan kuluny ’dolkoni su/ mo dhali e jaŋ kamu/ mo tani a’di ki c̱i a’di adhan kuluny ’dolkoni ’de/ mo, e uni ka ’deṯe/ ’deṯe/ mo me’d isi to kun misha uni mii mo be. Dhali yan’ko’d a’di ki ya mo be. 16 A’di jin bu’thki adhan kuluny ’dolkoni mudhe’d mo tani a’di yaki’d mo ki jahanne/ mo dhali yol to ki uni mo dhali a’di ki ṯa/ a’di mo mmota adhan kuluny ’dolkoni mudhe’d ki nyanye/ mo be. 17 Wakan si’da/ a’di jin ta’d gi dhan kuluny ’dolkoni su/ mo tani a’di ki ṯa/ a’di mo doḵ/e mmota adhan kuluny ’dolkoni su/ ki nyanye/ mo be. 18 Hili a’di jin bu’thki adhan kuluny ’dolkoni ’de/ mo tani a’di yaki’d mo dhali c̱wany jisa ’cesh mo dhali ba/a guurush gi tap̱am piti mo be. 19 Dhali yan’ko’d mmosi’dkina tap̱am buni c̱a’b’ko’d ki si’d mo tani tap̱a gi c̱iŋkina/ gwansan a’di p̱u’dki’d mo dhali thoson gwo gom ton deŋ nyaḵki uni mo be. 20 Dhali a’di jin bu’thki adhan kuluny ’dolkoni mudhe’d mo tani p̱u’dki’d kadhoŋ mo mmoḵal adhan kuluny ’dolkoni mudhe’d ki nyanye/ mo mmo/o gwo mo ki: Tap̱a, /e c̱iki aha/ adhan kuluny ’dolkoni mudhe’d mo tani aha/ miikina to mmoṯa/ uni mmota adhan kuluny ’dolkoni mudhe’d ki nyanye/ mmahan mo be. 21 Dhali tap̱am piti ki o a’di gwo mo ki: Mba/ c̱a/. /E ta c̱iŋkina/ jin ’boro’d mo dhali jin ta isiŋ gana/ mo be. /E ta a’di jin ta isiŋ gana/ ap̱o/ ushi to kun gwa’dan mo. Aha/ mina kar /e ap̱owa ris to ki nyanye/ mo. Huri /e mo ’te/ ma e moŋ’kuny bwa gi tap̱am pini mo. 22 Dhali a’di si’da/ jin ta’d gi dhan kuluny ’dolkoni su/ mo p̱u’dki’d kadhoŋ mo mmo/o gwo mo ki: Tap̱a, /e c̱iki aha/ adhan kuluny ’dolkoni su/ mo. Aha/ miikina to ki uni mo dhali ṯa/ adhan kuluny ’dolkoni su/ ki nyanye/ mmahan mo be. 23 Dhali tap̱am piti ki o a’di gwo mo ki: Mba/ c̱a/. /E ta c̱iŋkina/ jin ’boro’d mo dhali jin ta isiŋ gana/ mo. /E ta a’di jin ta isiŋ gana/ ap̱o/ ushi to kun gwa’dan mo. Aha/ mina kar /e ap̱owa ris to ki nyanye/ mo. Huri /e mo ’te/ ma e moŋ’kuny bwa gi tap̱am pini mo. 24 A’di si’da/ jin bu’thki adhan kuluny ’dolkoni ’de/ mo p̱u’dki’d kadhoŋ mo mmo/o gwo mo ki: Tap̱a, aha/ misha ki /e ta wathi/ jin c̱inthira c̱inthir mo haali/ /e ’ciṯẖi to jin dina /e ki si mo dhali tul to is jin dina /e ki ’dash mo. 25 Wakan aha/ ḵo/ka is mo dhali aha/ yakina mo dhali ba’k adhan kuluny ’dolkon pini eya ’cesh mo. Dhali a’di a’dan be. Guyi a’di jin ta jim pini mo ma. 26 Hili tap̱am piti ki thoḵ a’di gwo mo ki: /E ta thus ki thus mo dhali /e ta c̱iŋkina/ jin ta’da p̱iny is ka p̱iny is mo. /E mishkin ki aha/ tana man’ciṯẖ to jin dika/ ki si mo? dhali tul a’di jin dika/ ki ’dash is mowa? 27 Dhali yan’ko’d /e ḵa ba/ mini ’taki dhuka guurush pem mo e imandhuwa guurush mo dhali ki yamp̱u’d pem jin miga/ ’taki bu’th a’di jin ta jim pem gana/ mo dhali nyunycinam piti mo be. 28 Wakan buthi adhan kuluny ’dolkon ’peni a’di mo ma dhali c̱iki a’di jin ta’d gi dhan kuluny ’dolkoni ’kume’d mo. 29 Haali/ aris uni ka ’deṯe/ ’deṯe/ kun ta gi to mo tani minu c̱i to ki nyanye/ mo dhali uni mini ta gi to kun mini ur ’kup̱ mo. Hili ’peni a’di jin dara’d mo tani hili a’di jin tana a’di mo tani minu bu’th ’peni a’di mo be. 30 Dhali bu’th c̱iŋkina/ jin ush me’d ki ’tash mo dhali biṯ a’di mo e mo jin ta’da ’tum ka ’tum mo. Dhali e mo yin mo tani a’di ita mo jin mina ’kwani ’pe’d shem buni mo be.
Mom’bor Mii dhali ’Kwani kun Jeenu mo
31 Ki Ya/ gi ’Kwani midi p̱u’du/ mo e monycam piti mo tani dhali ka ris iman’doyu gwom piti ilu/ mo tani dhali yan’ko’d a’di midi c̱a’b ap̱owa ḵursim piti gi monyca mo be. 32 Aris kal gi ’kwaniny’ceshi ’baar mo minu tul isi bwambori a’di mo, dhali a’di midi ḵwa/ uni bwa mo ’peni tiyan tiya mo me’d jin ḵwa/ ma manhil ḵa’bal ḵa’bal bwa mo ’peni mi mo be. 33 Dhali a’di midi dhu ḵa’bal ki me’da bim poros piti mo, hili mi mina a’di dhu ki me’da cam piti mo be. 34 Dhali yan’ko’d aMaliḵ midi o uni gwansan kun ’kon ki me’da bim poros piti gwo mo ki: Iiyu/ mo ma, ayy um kun ’bor ma Ababa mii mo mmogam mal gi Bampa/ gi Momis jin thosonkunu mo gom um mo ’peni mo jin ḵa’bkunuwa ’cesh sho’k mo be. 35 Haali/ me’d jin ’kosha ṯe/ aha/ mo tani dhali um ki c̱i aha/ tonṯe/ mo. Dhali ki aha/ butha yi’de/ mo tani dhali um ki c̱i aha/ yi’de/ mmop̱i mo. Dhali ki aha/ yana ya yilkina/ mo tani dhali um hanki aha/ mo be. 36 Dhali ki aha/ dina is ’te/ mo tani dhali um hi’thki aha/ burrinye/ i is mo. Dhali ki aha/ ’ba’thkina mo tani dhali um iiyini buṯi aha/ mo. Dhali ki aha/ dina eya sijin mo tani dhali um p̱u’dkini aha/ mo be. 37 Dhali yan’ko’d uni kun ta kuŋ ḵar/e mini thoḵ a’di gwo mo ki: Tap̱a, kakasjana mp̱arkina aman /e e mo mmo’kosha ṯe/ /e mo dhali mmoc̱i /e tonṯe/ mo? walla butha yi’de/ /e mo dhali aman ki c̱i /e a’di mmop̱i mo? 38 Dhali kakasja mp̱arkina aman /e e mo mmoya ya yilkina/ mo dhali aman ki han /e mo? walla dina /e is ’te/ mo dhali aman ki hi’th /e burrinye/ i is mo? 39 Dhali kakasja mp̱arkina aman /e e mo mmo’ba’th mo walla dina /e eya sijin mo dhali aman ki buṯi /e mo? 40 Dhali aMaliḵ ki thoḵ uni gwo mo ki: Ka jiŋ gana/ aha/ ṯora um gwo mo ki: Me’d jin miina um a’di gom a’din ’deŋ kamu/ jin p̱isi’d mo ’peni ushi uni gwansan kun tana waḵ pem mo tani um miiki a’di gom aha/ mo be. 41 Dhali yan’ko’d a’di midi o uni gwansan gwo mo kun ’kon ki me’da cam piti ki: Iiku/ ’peni aha/ mo ma, um kun jeekunu mo e mo ma al o’d jin midi diki us ki sule/ sule/ mo, a’di jin thosonkunu mo gom tap̱a ma ruma ’cesh mo dhali iman’doyu gwon thus piti mo be. 42 Haali/ aha/ ’kosha ṯe/ mo ka jiŋ gana/ dhali um ’koki c̱i aha/ tonṯe/ mo, dhali aha/ butha yi’de/ ka jiŋ gana/ mo dhali um ’koki c̱i aha/ yi’de/ mmop̱i mo be. 43 Dhali aha/ ka jiŋ gana/ yana ya yilkina/ mo tani dhali um ’koki han aha/ mo. Dhali aha/ dina is ’te/ mo tani um ’koki hi’th aha/ burrinye/ i is mo be. Dhali ki aha/ ’batha mo tani dhali di eya sijin mo tani um ’koki buṯi aha/ mo be. 44 Dhali yan’ko’d si’da/ uni mini thoḵ gwo mo ki: Tap̱a, kakasjana mp̱arkina aman /e e mo mmo’kosha ṯe/ /e mo walla butha yi’de/ /e mo walla ya ya yilkina/ mo walla di is ’te/ mo walla ’ba’th mo walla di eya sijin mo dhali ’kona aman ki mii to gom /e mo? 45 Dhali yan’ko’d a’di midi thoḵ uni gwo mo ki: Ka jiŋ gana/ aha/ ṯora um gwo mo ki: Me’d jin ’kona um ki mii a’di gom jan ṯal ’deŋ kamu/ ’peni uni gwansan kun p̱isin mo tani um ’koki mii a’di gom aha/ mo be. 46 Dhali uni mini ii mo e mo jin ’konu ki mii ’ba/ ki sule/ mo, hili uni kun miin ka ḵar/e mo tani mini cic̱ mo e moŋ’koki/e ki sule/ sule/ ya ye ’ba/ mo be.