7
Ko ma Dawuu’d mo a’di jin yuḵkina a’di gway e Tap̱a mo isi ki gwo goma Kuush mo jin ta’da waḵ ma Benyamiin mo.
1 Ayy Tap̱a Arumgimis pem, e /e mo tani aha/ budha mo jin huru jwa mo,
tayi aha/ is ki me’d ’pena ris unim pem kun uri aha/ isho’k mo, dhali ’cuḵi aha/ mo ma,
2 isi ciki/ ki uni mini ’koki dher aha/ bwa me’da dhop̱ mo,
mmodir aha/ mo mmodar gi jan ṯal ’de/ mmowoṯẖ aha/ mo.
3 Ayy Tap̱a Arumgimis pem waḵki/ aha/ miina yansankan mo,
dhali waḵki/ toŋ kamu/ di’d jin miiga/ ki me’d pem jin shiyi’d mo tani
4 dhali waḵki/ aha/ ri/a amugum pem ki tonthus mo tani
walla dil a’di jin ta ’kup̱ pem to ka wuny is mo tani
5 dhalki a’di jin ta ’kup̱ gi aha/ uri aha/ mo dhali bu’th mo,
dhali dhalki a’di pucur mondiki/em pem ’twa/a ’cesh mo,
dhali ’thi/a ḵashiram pem e bwam bu’d mo.
Doshi ma dhali ’cunycuri yan mo.
6 Cuyi mis mo ma, ayy Tap̱a, eya nyor pini mo,
’deki is pini ki mis ap̱o/ uni gwansan kun ta ’kup̱ pem kun puri mii ki o’d mo,
meri is mo, ayy Arumgimis pem, /e ṯorki gwon dwall jin toru gwo ’twa/a ’cesh mo.
7 Dhalki montul is gom ’kwani uni itul is gom /e mo,
dhali ap̱o/ a’di mo tani budhi monyc̱a’b pini jin eḵa/ eḵ mo.
8 Tap̱a dwalli ’kwani gwo mo,
dwalli aha/ gwo mo ayy Tap̱a, isi ki mii ma ḵar/em pem mo
dhali isi ki gwo jin di’di aha/ jin dika/ ki mii ki ŋadhum mo.
9 Ayy dhalki tonthus gi imanmii miinthus daḵu ka bwa i’ba/ mo ma,
hili ṯeli /e imanmii ka ḵar/e sho’k mo,
/e jin nyo/ki bwaŋ ’kwani mo dhali aduŋ ’kwani mo,
/e jin tana Arumgimis jin ta’da ḵar/e mo.
10 Agoŋgorom pem a’di di’d eya Arumgimis mo,
a’di jin ta uni is ki me’d mo, uni kun dhelel ma du mo.
11 Arumgimis ta’da ḵar/e jin dwalli gwo mo,
dhali Arumgimis jin deḵ ma nyor mo isa yempa/ mo.
12 Waḵki/ wathi/ diki rica du is mo tani
Arumgimis midi cil gandal piti ki ŋar ŋar mo.
A’di ric̱ki’da shum bwam piti mo.
13 A’di thosonki to gi mo/as piti gom mo gi ’koshuwa ’kosh mo,
mmodhala thop̱a/ o’d piti me’d mo jin c̱a’bki wur wur mo.
14 Hili mo mo ma, amanmii tonthus mo tani a’di bwaaki’da ris tonthus mo,
dhali di’d ka ’ci ibwa mo jin ta’da pibi ka pibi mo,
dhali a’di ki ḵala ṯor ka pije/ mo.
15 A’di ki c̱wany jis mo tani dhali tor a’di ḵarash ka pije/ mo,
dhali biṯi jis piti jin c̱wanykina a’di mo be.
16 Mo ma pibim piti ṯu’kki’d e ’kup̱ pitiŋ gana/ mo,
dhali mombujur piti thulu’d e bwaŋ ’kup̱ pitiŋ gana/ mo.
17 Aha/ mina c̱i Tap̱a mo jin ’boruwa ’bor bwa i is mo jin ha me’d ki mo ma ḵar/em pitiŋ gana/ mo
dhali aha/ mina yuḵ gway mmomaŋ gway gi Tap̱a mo, a’di jin Caa e ki Ca mo.