1 ’Kunyi bwa mo ma e Tap̱a, ayy um ’kwani kun tana ḵar/e mo.

Maŋa maŋ jin ’dap̱a’d gom uni kun dhelel ma du mo.

2 Maŋi Tap̱a ka dheŋdhenye/ jin buḵu/ mo,

dhali yuḵi gway gom a’di ka dheŋdhenye/ jin ’kon ma shu/i ’kume’d mo.

3 Yuḵi gway gom a’di, gway jin ta jin this mo,

buḵa shu/ ki me’d jin ta gwocon mo, ki ’kus jin caaca mo.

4 Haali/ gwo gi Tap̱a mo tani uni ha me’d mo.

Dhali aris miim piti uni miikunu ki mii ma isiŋ gana/ mo.

5 A’di enki momii ma ḵar/e mo dhali mo jin miinu ki dar gi mo ma gwar ’de/ mo.

Mony’cesh a’di ’tu’du/ mo ki mo/en gi Tap̱a jin ṯeli sho’k mo.

6 Ki gwo gi Tap̱a mo tani momis uḵkunu mo

dhali aris to kun ’koni bwaman uni ki shi/in jin shi/ini’d ’peni ’twam piti mo.

7 A’di ki tula ris yi’de/ is mo dhali ḵumma/ yi’de/ mo me’d jin ’thuṯẖu/ uni ibwaman ma gasaas mo.

A’di ki dhu yi’deŋ ’kulga/ e mo kun dhunu to mo.

8 Dhalki aris ’kwani ’baar kun ’kon e mony’cesh ḵo/ Tap̱a mo.

Dhalki aris ’kwani ’baar kun ’kon e mony’cesh doshon ki moŋḵo/ is gom a’di mo.

9 Haali/ a’di ṯorki gwo mo tani dhali a’di p̱u’dki’d kan mo.

Dhali a’di ḵanki gwo mo tani dhali gwo doshki’d mo.

10 Tap̱a ki ḵal gwo kun logoma kal gi ’kwaniny’cesh mo mmota gwo jin di bwa ’te/ mo.

A’di ki non mo jin thosona ’kwani ’kup̱ ’twa/ mo.

11 Gwo logom gi Tap̱a mo tani a’di doshki’d ki sule/ mo.

Gwoŋ kulum eya dum piti mo tani a’di diki’d ki sule/ goma risa nyaḵum yil gi ’kwani mo.

12 Mom’bor mii gom kal gi ’kwani jin tan ma Arumgimis Tap̱a mo,

’kwani kun kwanykina a’di mo mmota mal piti mo.

13 Tap̱a hilki mo ka luŋgu’b ’peni momis

mmop̱ara ris iya/ gi ’kwaniny’cesh e mo.

14 ’Peni mo jin c̱a’bkina a’di eya ḵursi ma maliḵ mo tani a’di ki hil mo mo

ap̱owa ris ’kwani gi mony’cesh mo.

15 A’di ta a’di jin aḵki’da dum buni e ’baar mo,

dhali a’di ki hila ris miim buni kun miina uni mo.

16 Amaliḵ a’di ’konuki ta is ki me’d ki dhan ’kwani ma meem piti mo.

Wathi/ gom mo ma mee mo tani a’di ’konuki ’cuḵ ki dhan mom’bi’th piti mo.

17 Shumarum gi mo ma mee mo tani a’di ta tom p̱e’th gi mo ma ’teŋ kap̱e/ gi mo jin p̱inu mii e mo.

Dhali ki dhan mo ma ’bi’th ma dem dem piti mo tani a’di molu ta is ki me’d mo.

18 Hili mo mo ma, e gi Tap̱a a’di di’d ap̱o/ uni gwansan kun ḵo/ki a’di mo,

ap̱o/ uni gwansan kun takin gi mo ma ’teŋ kap̱e/ gi mo/en piti jin ṯelkunu sho’k mo,

19 ki a’di midi ’cuḵa ḵashiram buni ’peni mowu mo,

dhali dhu uni ki e mo e yil jin ’kosha ṯe/ mo.

20 Aḵashiram bana a’di c̱orki Tap̱a mo.

A’di ta’da Manwoṯẖ gom ana mo dhali agoŋgorom bana mo.

21 Nye, adum bana ’kunykina bwa mo e a’di mo

haali/ ana gamkina gwo is e gway piti jin ḵogu mo.

22 Dhalki mo/en pini jin ṯelu sho’k, ayy Tap̱a, di’d eya p̱o/ aman mo,

isi kani, me’d jin tana aman ka ’teŋ kap̱e/ e /e mo.