35
Gway ma Dawuu’d.
Jemi ajem ’kup̱ mo ma, ayy Tap̱a, nyaḵki uni gwansan kun jemki aha/ ’kup̱ mo.
Asi ap̱o/ uni gwansan kun askin ap̱o/ aha/ mo ma.
Bu’thka goŋgoro/ ki me’d mo dhali to mmocesh is mo
dhali cuyi mis gom mowoṯẖ pem mo.
’Deka mee she mis mo dhali ameeny ’ciṯẖ is mo
apo/ uni kun urki aha/ isho’k mo.
Oyi gwo goma ḵashiram pem mo ki:
Aha/ tana man’cuḵ pini mo.
Dhalki uni dhukunu ’te/ ki mo ma ’the is mo dhali ush taḵ mo
uni gwansan kun simmki mondiki/em pem e mo.
Dhalki uni ṯu’kkunu ka nyaŋ’ko’d mo dhali non ’twa/ mo
uni kun p̱ishinki mo gi ’pen mo mmomii tonthus ap̱o/ aha/ mo.
Dhalki uni wana e ka ’pi’b ibwambori ’tham mo
ka man’doyu gwo gi Tap̱a ki ur uni ki sule/ sule/ mo.
Dhalki bway buni ta’da ’tum mo dhali dheresa dheres mo,
ka man’doyu gwo gi Tap̱a ki ur uni isho’k mo.
Ki dar gi ’kup̱ mii mo tani uni bagkina gumem buni gom aha/ mo.
Dhali ki dar gi ’kup̱ mii mo tani uni c̱wanyki jis gom mondiki/em pem mo.
Dhalki mo kun toru sho’k ka pupush p̱u’du’d ap̱o/ uni ki e ka wu mo.
Dhalka gumem buni kun baga uni mo tani bu’th uni mo.
Dhalki uni ṯa’kkin ibwaman uni mmo’ce’d sho’k ka pupush mo.
Dhali yan’ko’d aḵashiram pem ’kunya bwa e Tap̱a mo
mmoyuḵ gway mmomaŋa maŋ gom mony’cuḵ piti mo.
10 Arisa simam pem mini o gwo mo ki:
Ayy Tap̱a, kaja a’di jin waki /e mo,
/e jin ’cuḵ a’di jin ’ka’da is ki ’ka’d mo
’peni a’di jin ’bitha’bi’th gom a’di mo,
dhali a’di jin ’ka’da is dhali a’di jin midi mii ta gi to mo ’peni a’di jin shi/ki a’di is mo.
 
11 Iman/o gwo kun dup̱una dup̱i e mo tani uni cuki mis ap̱o/ aha/ mo.
Uni doṯki aha/ to kun ’koka/ ki mish ’ban mo.
12 Uni ki c̱i aha/ tonthus ka nyaŋ’ko’d gom tom ’borga/ kun miiga/ gom uni mo.
Aḵashiram pem a’di ’bushura/ ’bushur mo.
13 Hili aha/, ki uni ’ba’thkin mo tani –
aha/ hi’thkina burrinyen shawaal mo,
aha/ shi/kina is pem ki moŋga/ to mo.
Aha/ ’thokina ki ’kup̱ pem jin karka/ ka luŋgu’b abor pem mo
14 me’d jin jwakaṯkunu aha/ adu goma mugum pem mo dhala kam pem mo.
Aha/ yakina ka kul is me’d jan ṯal ’de/ jin gwoki’d goma ta’dam piti mo,
mmobiṯ ’kup̱ ka luŋgu’b dhali ko ki gwony jabu’th mo.
15 Hili e mombiṯ pem mo tani uni tulki is mo mmop̱e’th ki ḵuss ḵuss mo,
uni tulki is mmonṯal ’de/ ap̱o/ aha/ mo.
Uni kun ta ŋwol kun molka/ mo tani thu’thki aha/ ’pen ki dar gi mondaḵ mo.
16 Uni c̱i aha/ ṯinya/ ka maḵ mo ki nyanye/ dhali ki nyanye/ mo.
Uni ’pe’dki aha/ shem buni i is mo.
17 Kakasja, ayy Tap̱a, mina /e c̱a’bi gu is mo kan?
’Cwami aha/ mo ’peni mo ma bujur buni kun ’ce’du sho’k mo,
mondiki/em pem ’pena risa dhop̱ mo.
18 Dhali yan’ko’d aha/ mina c̱i /e mom’bor bwa i is e bwaman ma waambuhany ’kwani mo.
Dhali e mom’bi’th ma waambuhany ’kwani mo tani aha/ mina maŋ /e mo.
19 Dhalku/ ki dhal uni gwansan bway mo mmo’kuny bwa ap̱o/ aha/ mo
uni kun mii aha/ ki shi/ kun ta ’kup̱ ki aha/ mo,
dhali dhalku/ ki dhal uni gwansan bway mo mmoshi’b e
kun shi/ aha/ i e ki dar gi miiŋ kamu/ mo.
20 Haali/ uni ’koki o gwo gom moŋḵu’th is mo,
hili ap̱o/ uni gwansan kun ’kon ki biyuu e mony’cesh mo tani
uni bwaaki gwo kun hekuwa he’k e mo.
21 Uni ḵa’dki ’twam buni kun beeyabee ap̱o/ aha/ mo.
Uni oki gwo mo ki: Soso soso.
Em bana p̱arki a’di e mo.
22 /E mishkin mo, ayy Tap̱a. Dhalku/ ki c̱a’b ki shwamm mo ma,
ayy Tap̱a, dhalku/ ki si’d ’peni aha/ mo.
23 Muri is pini mo ma, dhali meri is gom tom pem jin raḵ aha/ mo,
dhali tom pem jin p̱u’du’d mo. Arumgimis pem mo dhali Tap̱am pem mo.
24 Yeyaa/ mo, ayy Tap̱a, Arumgimis pem, isi ki mii ma ḵar/em pini mo,
dhali dhalku/ ki dhal uni bway mo mmo’kuny bwa ap̱o/ aha/ mo.
25 Dhalku/ uni ki dhal bway mo mmo/o gwo e is buni mo ki:
Soo, ana tana gi to kun on ma dum bana mo.
Dhalku/ uni ki dhal bway mo mmo/o gwo mo ki: Ana loskina a’di ki ’kolo’c mo.
26 Dhalki uni dhunu ki mo ma ’the is mo dhali duŋguru/ ka du isi monṯal ’de/ mo
uni kun ’kunykina bwa mo ap̱owa c̱is pem mo.
Dhalki uni kumu is ki mo ma ’the is mo dhali ki mo jin ushuwa taḵ taḵ mo,
uni kun dhu is buni ki ca ap̱o/ aha/ mo.
 
27 Dhalki uni gwansan kun ’kona gwo i bwa gom moyem pem
ḵum cuuwa/ mo gom moŋ’kuny bwa mo dhali mom’bor bwa mo,
dhali o gwo ki sule/ sule/ mo ki:
Tap̱a a’di caaca mo,
a’di jin ’kunya bwa e miin to gi c̱iŋkinam piti jin gama a’di adu is mo.
28 Dhali yan’ko’d ’twa/ pem midi ṯor gwo gom mii ma ḵar/em pini mo
dhali momaŋ pini isa yempa/ isa yempa/ mo.