49
Eya manyuḵ gway mo. Gway jin yuḵu gom iya/ ma Guurah mo.
Ciḵi gwo yansan mo ma, aris ’kwani ’baar mo.
Dhali c̱iyi ’cem bum mo, aris um gun ’kokin e mony’cesh mo,
um gun gwa’da is mo dhali um gun ’bap̱kin mo,
dhali kun ta pa ki pa mo dhali kun hatha’do’d si’da/ mmonṯal ’de/ mo.
’Twa/ pem midi ṯor gwo gom moyuḵ mo.
Dhali gwom pem jin kulumka/ eya du mo tani minu mish ’ban mo be.
Aha/ mina ḵa’d ’cem pem ki gwom ’bi’th/e mo.
Aha/ mina gam gwom pem jin ’ce’dka/ agagala/ mo ki ko ma dheŋdhenye/ jin ’kon ma shu/i pesu/ mo.
Ki gomatinta imiga/ ḵo/ is goma risa tente/ kun ṯoju aha/ bwa mo,
ki imanmii tonthus kun ṯoci aha/ ’kus mo tani ’kamki aha/ mo?
Uni gun ta ’kwaniŋ gwaṯẖ kun ’ko ki ’kus gom tom buni kun tana uni mo
dhali dhu ’ba/ ki ca gom tom buni kun tana uni kun ishkin ka enthus ki pa jin tana uni mo?
Ka jiŋ gana/ wathiŋ kamu/ p̱iyi’d jin midi wan is piti ’ba/ mo,
walla c̱iya Arumgimis she/ yol gom mondiki/em piti mo,
haali/ mo jin wanu ’ba/ gom mondiki/em piti mo tani a’di ’bitha yol she/ ki ’bi’th mo,
dhali midi mol gam ki sule/ sule/ mo,
ki a’di midi ’taki ṯikir di ki e ki sule/ sule/ mo,
dhali mol jisa ’kulga/ p̱ar e mo.
10 Nye, a’di midi p̱ar e ka jiŋ gana/ ki isi ’kwani kun yuḵayuḵ wukin mo,
uni gun ta p̱us dhali uni gun dar gi bwaŋ’kup̱ mo tani uni mini mii inyaḵ ’ce’d sho’k imonṯal ’de/ mo
dhali dhal tom buni kun tana uni pa ki pa ki unin tiya mo be.
11 Jis jwam buni mo tani a’di ta pam buni jin mina uni ’ko ki sule/ sule/ mo,
a’di jin ta mo jin mina uni i’ko nyaḵka ris ’kwani ma nyaḵum yil buni mo,
ba uni ṯoshki yuḵa ’cesh gway ki jim buni mo.
12 Wathi/ mol c̱a’b ki e e ’penkap̱an piti jin tana a’di mo,
a’di wana e ki tonycuḵ kun ’ce’dki sho’k mo.
13 A’di yansan ta ’pemen gi uni gwansan kun ta p̱us mo kun wuna wuny jwa i is mo,
a’di ta ’pemen gi uni gwansan kun ’bora bwa gom tom buni gun pwaḵkunu uni mo.
Doshi ma dhali ’cunycuri yan mo.
 
14 Me’d ḵa’bal mo tani uni dhukunu ’pen ka pije/ goma Haawiya mo.
Wu a’di midi ta amanhil uni mo,
ka ji sho’k gana/ bway jis jwa mo tani uni thulkunu mo be,
dhala yi’c buni midi shi/ is mo.
AHaawiya a’di midi ta pam buni mo be.
15 Hili Arumgimis midi wana ḵashiram pem ’ba/ mo ’peni mom’bi’th ma Haawiya mo,
haali/ a’di midi bu’th aha/ mo be.
Doshi ma dhali ’cunycuri yan mo.
 
16 Dhalki is ki ḵo/ mo waḵki/ jan ṯal ’deŋ kamu/ ta pa ki pa mo,
ki monyca gi gu’b piti maru is mo.
17 Haali/ ki a’di midi wu mo tani toŋ kamu/ mina a’di ḵal ime’da?
Monycam piti midi diki ya ka luŋgu’b baṯẖ a’di nsho’k mo.
18 Ba, me’dyin dina a’di ki e mo tani a’di ki p̱ar is piti e ki a’di ’bora bwa ki ’bor mo,
dhali ba wathi/ maŋu mo ki a’di ki mii to ki ’bore/ gom is piti mo tani
19 a’di midi ya nyaḵki ’kwani ma nyaḵum yil gi icom mo,
uni gun mini mol moŋkush p̱ar e ki sule/ sule/ mo.
20 Wathi/ mol c̱a’bki e e ’penkap̱an piti jin tana a’di mo,
a’di wana e ki tonycuḵ kun ’ce’dki sho’k mo.