57
Eya manyuḵ gway mo, isi ki gwo jin minu ’koki ’ce’d sho’k mo. Gway jin karu ki kup̱ jin ta jima Dawuu’d mo me’d jin guskina a’di mo ’pena Shawuul mo e jurum wosh mo.
1 Miiyi mii e aha/ mo, ayy Arumgimis, dhali miiyi mii e aha/ mo,
haali/ e /e mo tani aḵashiram pem bu’thki mo jin huru jwa mo.
Dhali eya la ma bim pini mo tani aha/ bu’thkina mo jin hurga/ jwa mo,
ntagi ’thama p̱unthar jin ’ce’di’da ’ce’d sho’k peki’d mo be.
2 Aha/ gwokina ’twa/ Arumgimis jin Caa e ki Ca mo,
eya Arumgimis jin thimki ’kup̱ miim ’boro’d piti gom aha/ mo.
3 A’di midi hasha hash ’peni momis dhali ta aha/ is ki me’d mo,
dhali a’di midi dhu uni gwansan ki mon’the is mo, uni gun yap̱ki aha/ ki sho’k mo.
Doshi ma dhali ’cunycuri yan mo.
Arumgimis midi hashi mo/en piti jin ṯelu sho’k mo dhali mii ma isiŋ ganam piti mo.
4 Aha/ isha e bwaman ma risa dhop̱ mo
uni gun pitilki iya/ gi ’kwani bwa ki she/ mo.
Shem buni waka mee mo dhala thop̱a/ mo,
dhali ale’d buni kaaka me’d gandal mo be.
5 Dhalki /e karu ki ca mo, ayy Arumgimis, ap̱owa ris momisi ’baar mo.
Dhalki monycam pini a’di di’da p̱o/ mony’ceshi ’baar mo.
6 Uni karkina kume/ gom ŋaṯgin sho’k pem kun dhuka/ mo,
aḵashiram pem a’di di ki ’kup̱ ka luŋgu’b mo.
Dhali uni c̱wanyki jis e bway pem jin yaka/ mo,
hili uni ki is buni uni iṯa’kkin e jis buni jin c̱wanya uni mo.
Doshi ma dhali ’cunycuri yan mo.
7 Adum pem ṯelkunu sho’k mo, ayy Arumgimis,
adum pem ka jiŋ gana/ a’di ṯelkunu sho’k mo.
Aha/ mina yuḵ gway mo dhali nann gway mo.
8 Meri e mo ma, aḵashiram pem.
Meri e mo ma, ayy adheŋdhenye/ dhali adheŋdhenye/ jin ’kon ma shu/i pesu/ mo.
Aha/ mina mer mo gi mon’thamo/ e mo.
9 Aha/ mina c̱i mo jin ’boruwa ’bor bwa i is ki /e mo, ayy Tap̱a, e bwaman ma ris ’kwani mo.
Aha/ mina yuḵ gway mo dhali maŋ /e mo e bwaman ma ris kal gi ’kwaniny’cesh mo.
10 Haali/ mo/en pini jin ṯelu sho’k mo tani a’di caaca kagahara e momis mo,
dhali mo ma isiŋ ganam pini jin tana /e mo e bwaman ma risa raḵ mo.
11 Dhalki /e karu ki ca mo, ayy Arumgimis mo, ap̱owa ris momisi ’baar mo.
Dhalki monycam pini a’di di’da p̱o/ mony’ceshi ’baar mo.