1 Tayi aha/ is is ki me’d mo ma, ayy Arumgimis.

Haali/ yi’de/ loski aha/ ki ’ba/ ilu/ mo.

2 Aha/ cic̱kina ka ’cesh e bwam boro’th jin ’kula’kul mo,

e mo jin dar gi mo jin miga/ jeṯṯ shoki cine/ mo.

Aha/ p̱u’dkina e yi’de/ jin ’kula’kul mo,

dhali agannu/ yi’de/ a’di kac̱ki’da p̱o/ aha/ mo.

3 Aha/ wukina is e gom kom pem mo,

dhali ’kus pem dhere’di ’baar mo.

Dhali em pem ’ceṯẖki’da ’tum kagahara mo

mmowu e ’kup̱ mmoc̱ora Arumgimis mo.

4 Mmobola mur ’kup̱ pem e mo tani

uni ta uni gwansan kun shi/ki aha/ e mo ki dar gi miiŋ kamu/ mo.

Uni gwansan c̱a’bki dem dem mo kun mini ’ce’d aha/ sho’k moyi,

uni gwansan kun mini bu’th aha/ ki gwo ma ṯor mo.

A’di jin dika/ ki ḵwal naskina/ mo tani

aha/ mina mii doḵ a’di ka nyaŋ’ko’d mowa?

5 Ayy Arumgimis, /e mishki mii ma p̱alim pem mo.

Mii gun ṯẖu’thka/ mii mo tani ’konuki bag ’peni /e mo be.

6 Dhalku/ ki dhal uni gwansan bway kun tan gi mo ma ’teŋ kap̱e/ e /e mo dhunu ki mo ma ’the is gom aha/ mo,

ayy Tap̱a Arumgimis gi momis mo.

Dhalku/ ki dhal uni gwansan bway kun simmki /e e mo jin minu ’doyu/ uni e mo jin minu this uni taḵ gom aha/ mo,

ayy Arumgimis ma Israyiil mo.

7 Haali/ a’di gom gway pini mo tani aha/ ḵalkina mo jin waḵuwa waḵ mo,

dhali mon’the is a’di kumki aha/ bwam/em pem mo.

8 Aha/ wara ki wathi/ gi bampaŋ kamu/ e bwaman ’kwani ma waḵ pem mo,

mmota a’di gi paŋ kamu/ e bwaman iya/ ma ta’da mo.

9 Haala nyor gom gu’b pini a’di shwakaa/ mo,

dhali asor gi uni gwansan kun sorki /e mo tani ṯa’kkina p̱o/ aha/ mo.

10 Ki aha/ karkina is pem ki gwa’d mo eya ḵashiram pem ki moŋga/ to mo tani

a’di warki’d ki mowaḵ pem mo.

11 Ki aha/ hi’thkina burrinye/ ma shawaal e is mmota burrinye/ gom is pem mo tani,

aha/ warkina ki a’di jin miikina uni ka maḵ mo.

12 Aha/ tana a’di jin ṯora uni gwansana ṯor kun ’kon e ’twaŋkala goŋ mo

dhali uni kun ’koshkin ma su mo tani yuḵki gway gom aha/ mo.

13 Hili gom aha/ mo a’thom pem jin ’thoka/ mo tani e /e mo be, ayy Tap̱a.

Eya tente/ jin mishuwa bu’th bu’th mo, ayy Arumgimis,

dhali e mo/ish jin isha mo/en pini jin ṯelu sho’k mo tani /e ’thoḵki aha/ ’twa/ mo.

14 Ki mowoṯẖ pini jin ta isiŋ gana/ mo tani ’cwami aha/ mo

’peni boro’th jin loski aha/ mo.

Dhalki aha/ ’cuḵu mo ’peni ’kwani kun ta ’kup̱ ki aha/ mo

dhali ’peni yi’de/ kun ’kula’kul kun shwana nyor mo.

15 Dhalku/ ki dhala gannu/ yi’de/ bway mo mmodhi’th aha/ sho’k mo,

walla moŋ’kul piti mmolos aha/ mo,

walla jisa ’kulga/ mmomu’th ’twa/ ap̱o/ aha/ mo.

16 ’Thoḵi aha/ ’twa/ mo ma ayy Tap̱a, haali/ mo/en pini jin ṯelu sho’k mo a’di ’bora’bor mo be.

Isi ki gwo gi momiimiim pini jin ishki’d ka enthus mo tani ṯu’kki/ aha/ is mo.

17 Dhalku/ ki bag jis/em pini ’peni c̱iŋkinam pini mo.

Haali/ aha/ dina e mo ma c̱is mo tani huru/ ki jahanne/ mo mmo’thoḵ aha/ ’twa/ mo.

18 ’Dishi aha/ is mo dhali wani aha/ ’ba/ mo,

dhali kari aha/ ki ’kus ’peni ’kwani kun ta ’kup̱ ki aha/ mo.

19 /E mishi mowaḵ pem jin waḵu aha/ mo,

dhali mo ma ’the is pem mo dhali mo jin ’konuki taḵ aha/ mo.

Aris uni gun ta ’kup̱ ki aha/ misha /e mo.

20 Asor ’ce’dkina dum pem bwa mo,

wakan a’di itaka/ buṯkan ki buṯkan mo.

Aha/ ŋap̱a mo jin minu ’taki hil aha/ ki mo ma ’thime/ ki mo/en mo tani hili aha/ gama wathiŋ kamu/ yisa.

Dhali aha/ ŋap̱a ’kwani mmo’taki malas aha/ mo tani, hili aha/ dinaki gam jaŋ kamu/ mo.

21 Uni c̱iki aha/ aṯi’d tonthus e tonṯe/ mo,

dhali gom yi’de/ jin bu’thki aha/ mo tani uni c̱iki aha/ yiman tom’pac̱a’d mmop̱i mo be.

22 Dhalki tonṯem buni jin shwana uni atharabeesa mo warki’d ka gume/ ibwambori uni mo.

Dhalki tom buni kun ’ciṯẖu/ ’kus mmomiiya bas goma yuḵ jin yuḵu ka tul ’kup̱ mo warki’d ka gume/ mo.

23 Dhalki em buni a’di dhurumkunu mo mo, wakan ki uni mini ’koki p̱ar mo e mo

dhali dhu ki uni empa’d buni mmodee ki sule/ sule/ mo.

24 Woli anyor pini jin deḵkina /e ap̱o/ uni mo,

dhali dhalka nyor buni jin pura /e ki o’d kumki uni ’twa/a ’cesh mo.

25 Dhalki gu’ba’kum buni taki bwam ma’du/ mo.

Dhalku/ ki dhal jan ṯal ’deŋ kamu/ bway mo mmoc̱a’b e gu’b burrinyem buni mo.

26 Haali/ uni ṯo’cki a’di bwa mo a’di jin dorkina /e mo,

dhali a’di jin taḵkina /e jama/ mo tani uni ’kon naskina/ mmoṯo’c a’di bwa ki nyanye/ mo.

27 Dhuki uni ajisa i is mo.

Dhalku/ ki dhu uni mmodhu ka p̱o/ ’peni /e mo.

28 Dhalki uni ’koshu gway buni ’pena warka/ gi mondiki/e mo,

dhali uni minu ’koki ’kwar gway buni e bwamana warka/ nyaḵki ’kwani kun tana ḵar/e mo.

29 Hili aha/ wo’ckunuwa du she/ mo dhali ’kaa du she/ mo,

Dhalki bwaya ḵar/em pini, ayy Tap̱a Arumgimis, kar aha/ e mo jin ḵa’dama/ ḵa’dam mo.

30 Aha/ mina maŋ gway ma Arumgimis ki gway jin yuḵu mo.

Aha/ mina eḵ a’di ki bwa jin ’boruwa ’bor i is mo.

31 Mii yansan a’di imidi ’bor Tap̱a bwa kagahara mmobola morbip̱ e mo,

walla rasim bip̱ jin ’kana je mo dhala cuḵ mo.

32 Dhalki uni gwansan kun siriju/ ki sho’k p̱ar mii e mo dhali ’kuny bwa mo.

Dhali um gwansan gun simmkina Arumgimis e mo tani dhalka dum bum tashu e mo doḵ/e.

33 Haali/ Tap̱a a’di ciḵki gwo mo ’peni uni gun mini mii ta gi to mo,

dhali a’di diki waḵ uni gun ta unim piti kun deḵkunu mo.

34 Dhalki momis dhali mony’cesh maŋ a’di mo,

dhali dhan ḵumma/ yi’de/ dhali aris to ’baar mo kun ḵalki ya e bwaman a’di mo.

35 Haali/ Arumgimis midi ta Sihyuun is is ki me’d mo

dhali nyaŋ ka Yahuuda/ ’peŋkuman bampam piti doḵ/e mo.

Dhali uni gun ta c̱iŋkinam piti mo tani mini ’ko e mo yan mo dhali bu’th a’di mo

36 dhali uc̱i gi c̱iŋkinam piti mo tani midi ta mal piti mo,

dhali uni gwansan gun eni gway piti mo tani mini ’ko e bwaman a’di mo.