72
Gway ma Sulemaan.
C̱iya maliḵ mo ma ḵar/em pini mo, Ayy Arumgimis,
dhali mo ma ḵar/em pini gom ya/ ma maliḵ mo.
Dhalki a’di dwall ’kwanim pini gwo ki mii ma ḵar/e mo
dhali unim pini kun hatha’ko’d ki mo ma ḵar/e mo.
Dhalki dhan wosha turga/ ḵali mo jin rusu ki rus gom ’kwani mo,
dhali aris wosh si’da/ ḵali mo ma ḵar/e mo.
Dhalki a’di ’ce’d gwo she/ gom to jin raḵi ’kwani kun hatha’ko’d mo.
C̱iyi mo jin ’cuḵuwa ’cuḵ gom ’kwani kun mini mii ta gi to mo,
dhali yap̱i uni gwansan kun siri’ckina siri’c ki sho’k mo.
 
Dhalki a’di di’d ki e mo ka tente/ di’di motim ’kup̱ naskina/ mo,
dhali me’d jin din ma ppe naskina/ gara/ mo, eya risa nyaḵum yil gi ’kwani mo.
Dhalki a’di wana e ka sho’k jin wolki yi’dem piti asho jin ’punyu/ mo,
me’da sho’k jin mii yi’de/ ki puya/ puya/ ap̱owa ’cesh mo.
Eya teem piti jin dina a’di ki e mo tani dhalki mo ma ḵar/e ’twaḵa’d mo,
dhali moŋḵu’th is mmo/ish mo ntaga ppe midi diki di doḵ/e mo.
 
Dhalki a’di ta gi mom’bi’th ’peni ḵumma/ yi’de/ mo ntagi ḵumma/ yi’den tiya mo,
dhali ’peni yi’de/ kun sokin mo ita gi ’pemen gi mony’cesh mo.
Dhalki uni gun ta ’kup̱ ki a’di luŋkini bwambori a’di mo,
dhali ’kwani kun ta ’kup̱ ki a’di mini ’biṯṯ bu’da’cesh mo.
10 Dhalki imaliḵ gi Pan Tarshiish dhali kum pa uḵa ’cesh mo
c̱i a’diya thulp̱a/ mo,
dhali imaliḵ gi Pan Shaba mo dhali Pan Saba mo
ḵal to kun c̱inu ki me’d gom a’di mo.
11 Dhalki aris imaliḵi ’baar mo ṯagkina ’cesh ki jiŋ ’kup̱a’dup̱uni bwambori a’di mo,
dhali dhalka ris kal gi ’kwaniny’cesh si’da/ mii a’di to mo.
 
12 Haali/ a’di ’cuḵki uni gun mini mii ta gi to mo, ki a’di yuḵki’da yuḵ mo,
a’di jin hatha’ko’d mo dhali a’di jin dar gi wathi/ mmowoṯẖ a’di mo.
13 A’di ki hila hil ki e ma ’thime/ ki mo/en ap̱o/ uni gun ’ka’da is mo dhali ap̱o/ uni gun mini mii ta gi to mo,
dhali ta moŋ’koki/em buni is ki me’d mo gom uni gun mini mii ta gi to mo.
14 ’Peni mo jin sirijuwa siri’c ki sho’k mo dhali abujur jin bujuru mo tani a’di wanki moŋ’koki/em buni ’ba/ mo,
dhala bas buni ta yinthoŋ gana/ e jis/em piti mo.
 
15 Dhalki a’di di’d ki e ki sule/ sule/ mo.
Dhalki ’dolkon gana/ jin ta gi Pan Shaba c̱inu a’di mo.
Dhalki mon’tho minu ṯikir ’tho gom a’di ki ṯikir ṯikir mo
dhali mom’bor mii minu ’tho gom a’di ka tee ’baar mo.
16 Dhalki emen tonṯe/ ishin ka enthus e bampa/ mo,
ap̱owa ris ’kuwosha turga/ mo me’d jin yiḵinkina ’tham uni is mo.
Dhalki maman cwam piti wana e ki ji gi Pan Lubnaan mo
dhali dhalki ’kwani ’tu’dina ’tu’d mo ’peni aris ’peŋkuman bampa/ mo
me’da sho gi bwam bunto mo.
17 Dhalki gway piti ’dim ’kup̱ ki sule/ sule/ mo.
Dhalki yir piti di’d ki sule/ sule/ me’da tente/ mo.
Dhalki ’kwani ’bori is buni mii ki a’di mo,
dhali aris kal gi ’kwaniny’cesh yuḵi a’di mo ki a’di jin ’boru mii mo.
 
18 Mom’bor mii midi di gom Tap̱a mo a’di jin ta’da Arumgimis gom ’Kwani ma Israyiil mo,
A’din ’deŋ gana/ imii’da dhan to gi momer mo.
19 Mom’bor mii midi di gom gway gi monycam piti ki sule/ sule/ mo.
Dhalki monycam piti ’tu’d mony’ceshi ’baar mo. Amen dhali Amen.
 
20 Mon’tho ma Dawuu’d mo a’di jin ta ya/ ma Yassa mo a’di ’baarkunu mo.