1 Eya Yahuuda/ mo tani a’di imish ma Arumgimis mo,

gway piti jin eḵa/ eḵ mo e bwaman ma Israyiil mo.

2 Monyc̱a’b piti a’di ṯelkunu sho’k mo e Pan Saliim mo,

mo jin c̱a’ba a’di mo tani a’di di’d eya Sihyuun mo.

3 E mun mo tani a’di ki ’ce’da thop̱a/ kun shinunu ki o’d ki yuwar yuwar bwa mo,

dhali agoŋgoro/ gi mo/as mo dhali gandal gi mo/as mo dhali aris toŋkan gi mo/as mo.

4 Monyca ta jim pini mo, dhali mo jin eḵu

mmobol dhan wosha turga/ e kun ’kon ki sule/ sule/ mo.

5 ’Kwani kun ’kon ma du ki dhethadhe’th mo tani uni dilkunu tom buni kun dilina uni mo.

Uni cic̱kin e mo jin ishu e mo.

Aris ’kwani gi mo/as mo tani

uni mol me’d buni bu’th mmomii to mo.

6 E mo ma ḵucur pini mo ayy Arumgimis ma Yakuub mo tani

a’di jin mer shumaruma p̱o/ mo dhali shumarum mo uni su/ miikina buye/ ka yiŋkira/ mo.

7 Hili /e, /e tana pure/ mo.

Kaja a’di imidi mish doshi bwambori /e mo

me’d jin min ma nyor pini ’tulu/ ka pije/ mo?

8 ’Peni momis mo tani /e ki bah gwo gom gwon dwall jin toru ’twa/a ’cesh mo.

Mony’cesh ḵo/ki is mo dhali dosh shoka ’cesh mo

9 ka Arumgimis cuki mis mo dhali ṯel gwon dwall piti jin toru ’twa/a ’cesh mo

mmota ris ’kwani gwansan is ki me’d mo kun ’cwarkunu e mony’cesh mo.

10 Ka jiŋ gana/ anyor gi ’kwani midi maŋ /e mo.

Dhali anyor jin boc̱ki’d mina /e non ’twa/ ’pena p̱o/ /e mo.

11 Oyi um gwo is e Tap̱a Arumgimis bum mo dhali thimi uni mo.

Dhalki aris uni ’baar mo kun ’kam a’di is mo tani ’doyu to kun c̱inu ki me’d mo

e a’di jin minu mii ḵo/ mo

12 dhali a’di jin ’ciṯẖki mondiki/e gi iya/ ma maliḵ mo,

a’di jin taki’da pure/ ka pure/ ap̱o/ imaliḵ gi mony’cesh mo.