78
Gway jin yedhu sho’k goma Asap̱ mo.
Dhuyi ’ce, ayy ’kwanim pem, ki gwo jin ṯorka/ mo.
Ḵa’di bwany’cem bum mo ki gwo ki ’twam pem mo.
Haali/ aha/ mina ḵa’d ’twam pem ki gwom ’bi’th e mo.
Aha/ mina bah gwo mmo/o gwo kun mini ’koki ’ko eya tente/ ’peni gwon dhamo/ mo,
’peni to gwansan kun ciḵkina ana gwo mo dhali mish mo,
uni gun ṯorkina ibabam bana ana mo.
Ki ana mina ’koki bag uni ’peni uc̱im buni mo,
hili a’di minu ṯor ka nyaḵum yil jin mini yayu/ i’ko’d mo
mii gi monyca gi Tap̱a mo dhali mo ma dem dem piti mo
dhali momer jin wagaskina a’di mo.
 
A’di ṯelki gwonyc̱i sho’k eya Yakuub mo,
dhali kar gwoŋḵan ’pen ka pije/ jin c̱inu eya Israyiil mo,
a’di jin ḵankina a’di ibabam bana mo
mmoṯor uc̱im buni gwo mo
ki uc̱i ma nyaḵum yil kun min ma p̱o/i ’ko isu/ ki uni mini mish uni mo
dhali uc̱i kun ’konuki dho’th naskina/ mo,
dhali cu mis mo dhali ṯor uc̱i kun ta uc̱im buni mo
wakan ki uni mini dhu mo ma ’teŋ kap̱em buni eya Arumgimis mo
dhali ’koki this mii ma Arumgimis e mo,
hili mmodhu gwoŋḵan piti kun ’kwarkunu mo
dhali ki uni mini ’taki ’koki waki ibabam buni mo,
mmota ga du jin tana wa’ba/ mo dhali ta anyaḵum yil kun mini pish is ka le’d mo,
uni gun mini ta anyaḵum yil kun min ma du ṯel shoka ’cesh mo,
uni gun mini ta ga ḵashira/ kun mini ’koki ta ku isiŋ gana/ goma Arumgimis mo.
 
’Kwani ma Ep̱rayim uni takin ka bwaa gi mo/as mo,
dhali uni doḵkin ka nyaŋ’ko’d mo ka tee jin asuwa mee mo.
10 Uni ’koki dhu Gwo ma Arumgimis jin gamu me’d mo,
hili uni ushkin ki ’tash mo mmo/ii isi ki gwoŋḵan piti jin c̱inu mo.
11 Uni ŋaki mii kun miikina Tap̱a mo
dhali miimer jin ṯorkina a’di uni mo.
12 E jis/e gi ibabam buni mo tani a’di wagaski momer mo
dhali e Pam Masir mo dhali e bwam bunto ma Suu/an mo.
13 A’di ki ḵwa/ dhan ḵumma/ yi’de/ bwa mo dhali dhal uni bway mo mmo/ii icine/ mo
dhali a’di ki kar yi’de/ mmodosh me’da gap̱ mo.
14 Dhali montee mo tani a’di ki shu uni bway ka raḵ mo,
dhali mon’thiny isa yempa/ mo tani a’di ki shu uni bway ka dhan o’d jin kushi mo mo.
15 A’di ki tawan wosh e ki cwa e mombwaasho mo
dhali a’di ki c̱i uni yi’de/ jin kasha e ki kash mmop̱i mo me’d mo jin ’kula’kul mo.
16 A’di ki dhal yi’de/ bway mmo’thonthoru/ ’peni ’kuwosh mo,
dhali a’di ki raḵ yi’de/ mmogac̱u/ ka ’cesh me’d a’di jin guski’d e bwaagap̱ mo.
 
17 Naskina/ uni ’kon mmomii miinthus ap̱o/ a’di mo,
mmopish is ka le’d ap̱o/ a’di jin Caa e ki Ca mo e bwam ma si’b mo.
18 Uni ki pal Arumgimis ka dum buni mo
ki gwom buni jin ’theḵkina uni gom tonṯe/ mo ka dum buni kun purki uni mo.
19 Uni ki o gwo ap̱owa Arumgimis mo mmo/o gwo mo ki: A/Arumgimis mishi c̱i ana tonṯe/ mmoshwa e bwaashowa?
20 A’di ki mush wosh ki cwa mo, wakan yi’de/ kolki ’kus mo,
dhali yi’de/ ’thonthorki’d kagahara mo.
Gara/ mina a’di diki c̱i tonṯe/
walla dina a’di gara/ ki c̱i shum ki ’kwanim piti mo?
 
21 Wakan ki Tap̱a ciḵki gwo mo tani, a’di ’tu’dkunu ka nyor mo.
O’d a’di ’thakunu ap̱owa Yakuub mo,
anyor piti a’di caki’da p̱owa Israyiil mo
22 haali/ uni dar gi moŋgam gwo is eya Arumgimis mo
dhali ’koki gam gwo is gom mom’bi’th piti jin tana a’di ata is ki me’d mo.
23 Naskina/ a’di ki ḵan momis jin di’di mis mo,
dhali a’di ki ḵa’c acampur gi momis mo
24 dhali a’di ki hethu a’cesh ap̱o/ uni amanna mmoshwa mo,
dhali a’di ki c̱i uni pos ’peni momis mo.
25 ’Kwani shwaki tonṯe/ gi iman’doyu gwo mo.
A’di hashki uni tonṯe/ ka enthus mo.
26 A’di ki raḵ ’tham gi mom’pesho’k mmoposhu e momis mo,
dhali ki mom’bi’th piti mo tani a’di ki shu ’tham ma biny cam bway mo.
27 A’di ki he’th shum ap̱o/ uni me’d bu’da ’cesh mo,
dhali ’dii kun ’kan ma bi me’d emena si’b kun ’kon e bwaman ma gap̱ mo.
28 A’di ki dhal uni bway mo mmoṯa’k e bwaman gu’b c̱iŋŋam buni mo,
mmo’kama ris mom buni kun ’kona uni is mo.
29 Dhali uni ’kaki uni mo ntagi uni kap̱kin ki kap̱ gana/ mo,
haali/ a’di c̱iki uni to jin ’thona bwa uni ki gor gor mo.
30 Hili nṯwa/a/ ki uni dhu to kun gora bwa uni mo tani,
ki tonṯe/ di’d e ’twam buni mo tani,
31 anyor ma Arumgimis cuki mis ap̱o/ uni mo
dhali a’di ki ’kosh uni gun ’bitha’bi’th ’peni bwam uni mo
dhali a’di ki ’thi uni gwahan a’cesh uni gun dhunu ’pen ka pije/ gom mom’bor buni ’peni ’Kwani ma Israyiil mo.
 
32 Bahili ap̱owa ris to gwansan kun miinu mo tani uni ’kon naskina/ mmomii miinthus mo.
Dhali bahili ki a’di mii momer piti mo tani uni ’koki gam a’di gwo is mo.
33 Wakan a’di dhalki’da teem buni mmop̱uu mo me’da wulp̱e/ mo
dhali yil buni ta’da pure/ ka pure/ mo.
34 Ki a’di ’koshki uni mo tani uni ŋap̱ki a’di mo.
Uni ri’ckina du is mo dhali ŋap̱a Arumgimis ka duŋ gana/ mo.
35 Uni kaki gwo e ka Arumgimis a’di ta wosh buni mo,
a’di jin ta’da Arumgimis buni jin Caa e ki Ca jin wanki’da wan ’ba/ mo.
36 Hili uni ṯorkina ṯor ki a’di ki ’twany jarom buni ka maḵ mo.
Uni takina ṯor ka ṯor gom a’di ka le’d buni mo.
37 Adum buni yisa ṯelu shoka ’kup̱ ki a’di mo.
Uni ’koki ha me’d gom gwoŋ ganam piti jin gamu me’d mo.
38 Hili a’di di’d naskina/ mmohila hil ki e ma ’thime/ ki mo/en mo,
dhali gwam uni ’peni tonthus buni kun miikina uni mo,
dhali diki ’ce’d uni sho’k mo.
A’di ’tumki’da nyor piti is ka nyaŋ’ko’d me’d ka ris mo,
dhali a’di diki mura nyor piti ’baar mo mmoshwa a’cesh ki sho’k mo.
39 A’di kaki gwo e mo ki uni ta jasi shuman is gi buŋgwar is mo,
me’d ’tham yin jin poshki’d mo dhali diki wuṯulu/ ka nyaŋ’ko’d mo.
 
40 Me’d wana risa kun pisha uni is ka le’da p̱o/ a’di e mombwaasho mo
dhali jwakaṯ a’di adum piti e bwam ma si’b mo.
41 Uni palki a’di doḵ/e dhali doḵ/e mo
dhali rukuny A’din ’De/ jin Ḵogu jin ta jima Israyiil mo.
42 Dhali uni yisa dhu mom’bi’th piti eya dum buni yisa,
walla atee yin si’da/ me’d jin wankina a’di uni ’ba/ ’peni ’kup̱ buni mo,
43 me’d jin wagaskina a’di jamas miim piti e Pam Masir mo,
dhali miimer piti e bunto ma Suu/an mo.
44 A’di ki ṯu’k yi’dem buni mmota abas mo,
wakan ki uni mini ’koki p̱i yi’dem buni kun sokin mo.
45 A’di ki hash dhana buhanya ḵanthi/ e bwaman uni mo a’di jin loski uni mo,
dhali adhana buhanya ’dwa/ jin ’ce’dki uni sho’k mo.
46 A’di ki c̱i tonṯem buni kun sina uni ka jirsaŋ mmoshwa mo,
dhali maman buni jin miina uniya ṯu’c mo tani shwan ma kuyu/ mo.
47 Dhali a’di ki ’ce’d cwalman tom buni sho’k ka wasa/ mo
dhali cwamp̱u/ buni ki jap̱e/ jin wuna uni me’d manyandhe/ mo.
48 Dhali a’di ki c̱i bip̱ buni cwa ki me’d ka wasa/ mo,
dhali ma’diny ḵa’bal buni uni dorkunu ki dhan o’d jin dhwa/a’dki’d mo ’pena wara sho’k mo.
49 A’di ki ’cuḵa nyor piti jin c̱a’bki wur wur ap̱o/ uni mo,
anyor jin ta’da nyor piti jin deḵ a’di mo dhali mo ma c̱is mo,
uni gun ’doyina iman’doyu gwo kun ’ce’dkina ’ce’d sho’k mo.
50 A’di ki kar bway tur goma nyor piti mo.
A’di ’tash uni ’twa/ ’peni mowuwa?
Hili a’di ki kar ’kup̱ki ṯa’kki moŋ’koki/em buni ki mom’ba’th jin wo’cki uni is she/ mo.
51 A’di ki musha risa bwanyara/ gi ’Kwani gi Pam Masir ki cwa mo,
mom’bi’th jin ta jim buni jin gac̱ki’d e gu’ba’ku/ ma Haam mo.
52 Dhali yan’ko’d a’di ki shu ’kwanim piti bway ka pije/ me’d ḵa’bal mo,
dhali a’di ki shu uni bway e mombwaasho me’da ma’diny ḵa’bal mo.
53 A’di ki sus uni ki ’dantar mo, wakan uni ’koki ḵo/ is mo.
Hili dhan ḵumma/ yi’de/ a’di ’ce’dki ’kup̱ buni sho’k mo.
54 Dhali a’di ki sus uni ka pije/ e mony’cesh piti jin ḵogu mo,
dhali e ’kuwosha turga/ jin ta’da bim poros piti mo jin gamkina a’di adu is mo.
55 A’di ki ura ris kal gi ’kwani ka pije/ ibwambori uni mo.
A’di ki dhu mo ki she/ gom uni jin mina uni mii bu’th mo,
dhali thoson mo kun minu ’ko goma waḵ ma Israyiil e gu’ba’kum buni mo.
 
56 Naskina/ uni ’kon mmopal a’di mo dhali pish is ka le’da p̱o/ a’di jin Caa e ki Ca jin ta’da Arumgimis mo,
dhali ’koki dhu gwonyc̱im piti mo,
57 hili uni ṯu’kkin mo dhali ’dap̱ e ki miiny dac̱ara/ mo me’d ibabam buni mo.
Uni ṯoshkin me’da bwaa jin he’kki’da he’k e mo.
58 Haali/ uni rukunyki a’di mo mmomii anyor mo ki mom buni kun eḵa/ eḵ mo.
Uni ki raḵ a’di joc̱u/ ki mo jin ’thoṯẖu/ bwa ki miin dhap̱an mo gom tomp̱inycon buni kun uḵa uni mmoluŋ mo.
59 Ka Arumgimis ciḵki gwo mo tani a’di ’tu’du ka nyor mo,
dhali a’di ki waḵa Israyiil ka bor ’deŋ gana/ mo.
60 A’di ki dhal mom piti ’pen jin c̱a’bkina a’di jin ta Pan Shilu mo,
e gu’ba’ku/ jin c̱a’bkina a’di e bwaŋ ’kwani mo,
61 dhali a’di ki ’cuḵ mom’bi’th piti ap̱o/ uni gun bu’thkunu mo mmota c̱iŋkina/ mo,
dhali monyca gi me’d piti ap̱o/ ’kwani kun ta ’kup̱ mo.
62 A’di ki c̱i ’kwanim piti e me’d gi uni kun ḵal gandal mo,
dhali kuma nyor piti mo ap̱o/ uni kun ta mal piti mo.
63 O’d shwaki ’kwani kun ta dhuru’c buni mo,
dhali nyaram buni uni dar gi gway gi momash mo.
64 Igasiis buni ṯa’kkina ’cesh gom shemen gandal mo,
dhali up̱a dhalla/ gi igasiis mo, moŋkamu/ gwona uniya?
 
65 Dhali yan’ko’d Tap̱a merki e mo ’peni mo jin wana e ki mo jin ishkina a’di e mo,
me’d wathi/ jin ’bitha’bi’th jin ’therki cuuwa/ gom yimana mura’th jin p̱ina a’di jin ḵa/u ki ŋah ŋah mo.
66 Dhali a’di ki dhu ’kup̱ piti mmoḵwa/ bwa mo.
A’di ki dhu uni e mo ma ’the is ki sule/ sule/ mo.
67 A’di ki waḵ gu’ba’ku/ ma Yuusup̱ mo,
dhali a’di diki kwanya waḵ ma Ep̱rayim mo.
68 Hili a’di ki kwany awaḵ ma Yahuuda/ mo,
a’di jin ta ’Kuwosha Sihyuun, a’di jin ena a’di mo.
69 A’di ki nyaŋ mom piti jin ḵogu mo me’d mo jin eḵa/ eḵ e momis mo,
dhali me’d mony’cesh jin ṯelkina a’di sho’k ki sule/ sule/ mo.
70 Dhali a’di ki kwanya Dawuu’d jin ta c̱iŋkinam piti mo,
dhali sus a’di mo ’peni mo jin hila a’di ḵa’bal mo,
71 ’peni mo jin hila a’di ushi nas ḵa’bal kun bwan mo tani
a’di ki sus a’di mo mmota amanhil ḵa’bal gom ’Kwani ma Yakuub mo,
a’di jin ta’da Israyiil jin ta mal piti mo.
72 Ka du jin ta a’di pa ki pa mo tani a’di ki hil uni mo,
dhali a’di ki shu uni bway ki me’d piti jin ta gwocon mo.