106
1 Maŋi Tap̱a mo.
Ayy c̱iyi mo jin ’boruwa ’bor bwa i is gi Tap̱a mo, haali/ a’di ’bora’bor mo,
haali/ mo/en piti jin ṯelu sho’k mo tani a’di i’dimki ’kup̱ ki sule/ sule/ mo.
2 Kaja a’di jin midi mish bah gwo gom miin to ma dem dem gi Tap̱a mo,
walla ṯora ris momaŋ piti mo?
3 Mom’bor mii gom uni gwansan kun miiki mii ma ḵar/e mo,
uni kun mii miiŋḵar/e isa yempa/ mo.
4 Kayi aha/ e mo, ayy Tap̱a, ki /e din mmoṯor mii ma ’them pini e ’kwanim pini mo.
Woṯẖi/ aha/ mo me’d jin mina /e ’cuḵ uni mo,
5 ki aha/ mina p̱ar mo jin rusa/ rus gi unim pini kun kwanya /e e mo,
ki aha/ mina bwa ’kuny mo e mo jin ’kunya bwaŋ ’kwani gi kal pini mo,
ki aha/ mina ca mo e mal pini mo.
6 Am dhali ibabam bam mo, ’thissa/ niin mo tani miikina miinthus mo.
Aman miikina mii kun ’coḵa’coḵ mo, am miikina to kun ta thus ki thus mo.
7 Ibabam bam, ki uni ’kokin e Pam Masir mo tani,
uni ’koki hil gwo i e gom tom pini kun miina /e ki momer mo.
Uni ’koki ka mo/en pini e jin ṯelu sho’k jin ishki’d ka enthus mo,
hili uni pishki is ka le’d ap̱o/ a’di jin Caa e ki Ca e Ḵumma/ Yi’de/ jin ta gi ’Per mo.
8 Naskina/ a’di ki ta uni is ki me’d gom gway gi gway piti mo,
ki a’di midi ṯor mom’bi’th ma dem dem piti mo.
9 A’di ḵucurki Ḵumma/ Yi’de/ jin ta gi ’Per mo dhali a’di warki’d ki mo jin ḵuthaḵu’th mo.
Dhali a’di suski uni e bwaman moŋ’kulga/ mo me’d jin miikina a’di e bwaman ma si’b mo.
10 Wakan a’di taki uni is ki me’d mo ’peni ’kwaniŋ ’kup̱ buni mo,
dhali ’cuḵ uni mo ’peni mom’bi’th gi ’kwaniŋ ’kup̱ buni mo.
11 Dhali yi’de/ kumki uniŋ ’kup̱ buni ’twa/a ’cesh mo.
Jaŋkamu/ di’d jin boc̱o’d ’peni uniya?
12 Dhali yan’ko’d uni gamki gwom piti is mo.
Uni yuḵki gway gom momaŋ piti mo.
13 Hili ki jahanne/ uni ŋaki miim piti mo.
Uni ’koki c̱or gwom piti jin logoma a’di mo.
14 Hili uni cana bwa en’dap̱ mo mmogora bwa ki gor e mombwaasho mo,
dhali kara Arumgimis mo mmonyo/ a’di e bwam ma si’b mo.
15 A’di c̱i uni to jin doṯkina uni mo,
hili a’di ki hash ’ba’th jin shi/ uni is e bwaman uni mo.
16 Ki ’kwaniŋ gwas kun ’kon e mo ma yuukam buni mmoṯa’c bwa ki ṯa’c ap̱owa Musa mo
dhala Haruun, a’di jin ta jan ’de/ gi Tap̱a jin ḵogu mo tani
17 mony’cesh ḵa’dki ’twa/ mo dhali losa waḵ ma Daṯẖan mo
dhali kum ’kwani kun nyaḵ ii ka Abiram ’twa/a ’cesh mo.
18 O’d si’da/ du’dushki’da p̱o/ imannyaḵ iim buni mo
dhala le’dan o’d shwaki ’kwani kun ta thus ki thus mo.
19 Uni uḵki ari bip̱ e ’kuwosh ma Hurib mo
dhali uni ki luŋ tomp̱inycon jin ṯo’du/ mmo/uḵ a’di jin ta p̱inycon mo.
20 Uni aḵki monyca ma Arumgimis e mo
gom jamas to jin uḵu mo me’da morbip̱ jin shwa’da sho mo.
21 Uni ŋakina Arumgimis mo, a’di jin ta’da Manwoṯẖ uni mo
a’di jin miiki dhan to jin caaca e Pam Masir mo,
22 ki mii gi momer mo e bampa/ ma Haam mo,
dhali dhana puren to e Ḵumma/ Yi’de/ jin ta gi ’Per mo.
23 Wakan a’di oki gwo mo ki: A’di midi ’ce’d uni sho’k moyi,
dhala Musan ’dem piti jin kwanya a’di mo tani
dina a’di ki doshi bwambori a’di mo
ntagi a’di doḵki’da nyor piti jin midi ’taki ’ce’d uni sho’k mowa?
24 Yan’ko’d uni ki waḵ mony’cesh jin ’bora’bor mo,
dhali dar gi moŋgam gwo is gom gwom piti jin ona a’di is mo.
25 Uni miikina gumgum e bwaŋ gu’b burrinyem buni mo,
dhali ush gwo gi ’twa/ gi Tap̱a ha e mo.
26 Wakan a’di ’de’kki me’d piti mo dhali thul gwo me’da p̱o/ gom uni mo
mmo/o ki a’di midi dhu uni mo mmoṯa’k mo e mombwaashoyi,
27 dhali ḵwa/ emen gi uc̱im buni bwa mo e bwaman kal gi ’kwaniny’cesh mo,
mmoc̱ekerki uni bwa mo e bampany ’ceshi ’baar mo.
28 Wakan uni ’tampalki is buni ka rum ma Baal jin ta ji Pam P̱aguur mo,
dhali ’ka to jin ’ciṯẖu/ ’kus mmothe tomp̱inycon gom jwa gi ’kwani kun wun mo.
29 Uni rukunyki Tap̱a mmomiiya nyor mo gom miim buni mo,
dhali ’ba’th jin wo’cki ’kwani is she/ du’dushki’d e bwaman uni mo.
30 Dhali yan’ko’d P̱inahaas doshki’d ki mis mo dhali woṯẖ gwo is mo,
dhali ’ba’th jin wo’cki ’kwani is she/ c̱a’bki’d mo.
31 Dhali a’di ikarkunu a’di ki mo ma ḵar/e mo
’pena nyaḵum yil jin tanu mo mmotana nyaḵum yil ki sule/ sule/ mo.
32 Uni raḵ a’di isa nyor mo gom gwo yi’de/ e mo ma Mariiba mo,
dhala Musa c̱inu isi jwa mo gom gway buni mo,
33 haali/ uni ki raḵa ḵashiram piti c̱a’bki ŋah ŋah mo,
dhali a’di ki o gwo ki mony’cwar mo.
34 Uni ’koki ’ce’d ’kwani sho’k mo
me’d gwo jin ḵankina Tap̱a uni mo,
35 hili uni ceki e ki kal gi ’kwanin tiya mo
dhali da/ar mii kun miina uni mo.
36 Uni ki mii to gom tomp̱inycon buni mo,
a’di jin warki’d ka gume/ gom uni mo.
37 Uni ki c̱i iya/m buni mmo’ciṯẖ ’kus mmomiiya bas mo
dhali i’bwa/ buni si’da/ ka rum thus kun nyo/anyo/ mo.
38 Uni ki wol tiya bas kun ’kon ma bas ka p̱o/ mo,
uni kun tana bas gi iya/m buni mo dhali i’bwa/ mo,
uni kun c̱ikina uni mmo’ciṯẖ ’kus gom tomp̱inycon kun luŋu gi Paŋ Kanaan mo,
dhali bampa/ shi/kunu is ka bas ’kwanimpa mo.
39 Wakan uni taki ’kwani kun nyo/anyo/ ki miim buni mo,
dhali lo’bi gwonyc̱al ki miim buni mo.
40 Dhali yan’ko’d anyor gi Tap̱a a’di ’thakunu ki ligi/ ligi/ ap̱o/ ’kwanim piti mo
dhali a’di ki shi/ mal piti i e mo.
41 A’di ki c̱iki uni mo e me’d gi kal gi ’kwanin tiya mo,
wakan ki uni gwansan kun shi/ki uni i e mo tani mii miin tap̱a ap̱o/ uni mo.
42 ’Kwaniŋ ’kup̱ buni siri’cki uni ap̱o/ ki sho’k mo,
dhali uni ’doyunu mo mmodila bora ’cesh e bwaŋ’kwariny mom’bi’th buni mo.
43 Me’d ka ris a’di ki ’cuḵ uni mo,
hili uni pishki is ka le’d ki ṯas ṯas gom ’kup̱ gwom buni mo
dhali uni ’doyunu ka luŋgu’b e miim buni kun ’coḵa’coḵ mo.
44 Bahili a’di ki c̱iya hirdhe/ ki mo ma c̱is buni mo,
ki a’di ciḵki kom buni mo.
45 A’di ki ka gwo e gom gway buni gom gwom piti jin gama a’di me’d mo,
dhali a’di ki biṯ bwam piti me’d mo isi ki gwo gi mo/en piti jin ṯelu sho’k mo jin ishki’d ka enthus mo.
46 A’di ki raḵ uni gwahan mmohila hil ki e ma ’thime/ ki mo/en mo
ki uni gwansan kun bu’th uni mmota habuus mo.
47 Tayi aman is ki me’d mo, ayy Tap̱a Arumgimis bam mo,
dhali tulu/ aman is mo ’pena ris bwaman gi kal gi ’kwaniny’cesh mo,
ki am mina c̱i mo jin ’boruwa ’bor bwa i is ki gway pini jin ḵogu mo,
dhali ca mo e momaŋ pini mo.
48 Mom’bor mii gom Tap̱a mo, a’di jin ta’da Arumgimis ma Israyiil mo,
’peni mo jin ’konuki/e ki sule/ sule/ ya ye ’ba/ mo itan mo jin ’konuki/e ki sule/ sule/ ya ye ’ba/ mo.
Dhali dhalka ris ’kwani ’baar mo o gwo mo ki: Amen.
Maŋi Tap̱a mo.