1 Dhalku/ ki c̱a’b ki shwamm mo, ayy Arumgimis gom momaŋ pem mo.

2 Haali/ ’twa/ gi ’kwani kun ta thus ki thus mo dhali kun he’kkina he’k e mo ḵa’dkina uni ap̱o/ aha/ mo,

mmo/o gwo ap̱o/ aha/ ki ’twa/ ma ṯor mo.

3 Uni ṯu’bki aha/ ki gwo jin shinuwa shi/ i e mo

dhali bu’th aha/ ki dar gi mii mo.

4 To kun doḵkina uni aha/ ’peni mo/en pem mo tani uni ki thisi yer aha/ is ki gway mo,

isi kani me’d jin dika/ mmo’tho gom uni mo.

5 Wakan uni ki c̱i aha/ to jin ta thus gom tom ’boro’d mo

dhali mo jin shinuwa shi/ i e mo gom mo/en pem mo.

6 Kari wathi/ jin ta thus ki thus ’pen ka pije/ ap̱o/ a’di mo

dhali dhalka manyer a’di is ki gway susi a’di e mo jin dwallu gwo mo.

7 Ki a’di dwallkunu gwo mo tani dhalki a’di dikina mii i’ba/ mo.

Dhalki mon’thom piti a’di deŋu e ki ta ji miinthus mo.

8 Dhalka teem piti karu ki kuṯ kuṯ mo.

Dhalki wathiŋ kamu/ bu’th mal piti mo.

9 Dhalki uc̱im piti ’kon ki dar gi com mo,

dhali dhalki ashim piti ta’da dhalla/ mo.

10 Dhalki uc̱im piti ii iinyc̱a/ dhali ’tho to mo.

Dhalki uni uru ka pije/ ’peni mo jin kup̱a uni kun ’kona uni mo.

11 Dhalki wathi/ jin dina a’di ka mure/ i’ba/ bu’th tom piti ’baar mo.

Dhalki ’kwanin tiya si’da/ shi/ maman cwam piti is mo jin ’koshkina a’diya ṯu’c ki mii mo.

12 Dhali dhalki wathi/ p̱iyi’d jin midi mii kar bwa jin kushakush gom a’di mo,

walla hil uc̱im piti jin dar gi com ki mii ma ’thime/ gi mo/en mo.

13 Dhalki emen piti kun mini yayu/ i’ko’d ’ciṯẖkunu ’twa/ mo.

Dhalki gway piti si’da/ minu ’kosh ’peni ’kwani ma nyaḵum yil kun min ma p̱o/i ’ko/i su/ mo.

14 Dhalki mii kun ’coḵa’coḵ gi icom kanu e ibwambori Tap̱a mo,

dhali dhalki miinthus gi kum minu ’koki ’kosh ka pije/ mo.

15 Dhalki uni ’koni bwambori Tap̱a ki ṯikir ṯikir mo

dhali dhalki a’di jin dhunu ibwa minu ’ciṯẖ ’twa/ ’peni mony’cesh mo.

16 Haali/ a’di diki ka mii e mo mmoṯor mii gi bwaŋ kush mo

hili a’di ki ur ’kwani kun hatha’ko’di sho’k mo

dhali uni gun mini mii ta gi to mo dhali uni gun ’ce’dkin ma dum buni gom jwam buni mo.

17 A’di en mo jin jeenuwa jee kagahara mo, dhali dhalki mo ma jee p̱u’dki’da p̱o/ a’di mo.

A’di diki en mo jin ’boruwa ’bor mii mo, dhali dhalki a’di si’dasi’d ’peni a’di mo.

18 A’di shumki is piti ki mo ma jee me’d burrinyem p̱om piti jin hitha a’di mo.

Dhalki a’di ’thoḵ buŋgwar is piti me’d yi’de/ mo,

dhali me’da yin eya simam piti mo.

19 Dhalki a’di wana e ki burrinye/ jin ’tampalkina a’di i is mo,

dhali me’d wac̱kan jin hi’thkina a’di e empa’d piti ka yempa/ mo.

20 Dhalki a’di yansan ita to jin gam ma manyer aha/ is ki gway ’peni Tap̱a mo

gom uni gwansan kun oki tonthusa p̱o/ mondiki/em pem mo.

21 Hili, /e, ayy Arumgimis jin ta Tap̱am pem mo,

ṯu/uli mii yan mo ma gom gway pem mo dhali gom gway gi gway pini mo

haali/ mo/en pini jin ṯelu sho’k mo a’di ’boro’d mo mmo’cuḵ aha/ mo.

22 Haali/ aha/ hatha di ’ko’d ki ha’th mo dhali mina mii ta gi to mo,

dhala dum pem a’di ta jama/ ki jama/ e isi aha/ mo.

23 Aha/ ’baara mo, dhali aha/ wana e ka ḵashira/ ma la gi mom’pimpili/ mo.

Aha/ yiḵinkunu is me’da kuyu/ mo.

24 ’Kup̱a’dup̱un pem ’ka’da’ka’d mo gom ga/ jin ga/ka/ to mo.

Buŋgwar is pem lulki’d mo.

25 Aha/ tana kuṯ jin ṯẖunya imanyer aha/ is ki gway ’twa/i is mo.

Ki uni p̱arki aha/ e mo tani uni birki ’kup̱ buni mo be.

26 Woṯẖi/ aha/ mo ma, ayy Tap̱a Arumgimis pem mo.

Tayi aha/ is is ki me’d mo isi ki mo/en pini jin ṯelu sho’k mo.

27 Dhalki uni mishi mo mo ki mii yansan a’di ita mii gi me’d pini mo,

ki /e, ayy Tap̱a, imiiki a’di mo be.

28 Dhalki uni jeena jee mo, hili /e mini mii mo jin ’boru mii mo.

Dhalki uni gwansan kun ṯẖa’th aha/ ki is dhunu ki mo ma ’the is mo. Dhalki c̱iŋkinam pini ’kunya bwa mo.

29 Dhalki imanyer aha/ is ki gway shumu ki mii jin thisuwa taḵ ush taḵ mo.

Dhalki uni i’tampalkina mo ma ’the is buniŋ gana/ e is mo me’d burrinye/ mo.

30 Ki ’twam pem mo tani aha/ mina c̱i mo jin ’boruwa ’bor bwa i is ki Tap̱a mo.

Aha/ mina maŋ a’di e bwaman ma waambuhany ’kwani mo.

31 Haali/ a’di doshki’d ki me’da bim poros mo gom a’di jin midi mii ta gi to mo,

mmota a’di is ki me’d mo ’peni uni gwansan kun waḵki a’di mmowu mo be.