113
Maŋi Tap̱a mo.
Maŋi amaŋ mo, ayy um c̱iŋkina/ gi Tap̱a mo,
maŋi gway gi Tap̱a mo.
Mom’bor mii midi di mo gom gway gi Tap̱a mo
’pena tee yansan mo dhali ki sule/ sule/ mo dhali ki sule/ sule/ mo.
’Peni mo jin sul ma tente/ mo tani dhali mo jin yula a’di mo tani
gway gi Tap̱a a’di iminu maŋ mo.
Tap̱a a’di iḵa’damaḵa’dam ap̱owa ris kal gi ’kwaniny’cesh mo,
dhali monycam piti a’di diki’da p̱o/ momis mo.
Kaja a’di iwakina e ki Tap̱a Arumgimis bana mo,
a’di jin c̱a’bki’d e mo jin ḵa’dama/ ḵa’dam mo,
a’di jin hilki mo ka luŋgu’b
’pena p̱o/ momis mo dhali mony’cesh mo?
A’di ki ’de’k ’kwani kun hatha’ko’d ki ha’th ’peni bu’da’cesh mo
dhali a’di ki ’de’k uni kun mini mii ta gi to mo ’pena duhal ’piny mo,
mmodhu uni mmonyaḵ ’ko ki iya/ gi imaliḵ mo,
dhali nyaḵki iya/ gi imaliḵ gi ’kwanim piti mo.
A’di ki c̱iya ’boma burum pa mo mmoc̱a’b mo,
mmokara yim mmo’kuny bwa ki ’kuny jin shiyi’d mo me’d kum gi uc̱i mo.
Maŋi Tap̱a mo.