115
1 Yisa e am, ayy Tap̱a, yisa e am,
hili gom gway pini mo tani c̱iyi monyca mo,
gom gway gi mo/en pini jin ṯelu sho’k mo dhali mii ma isiŋ ganam pini mo.
2 Ki ton ta’da tinta imina kal gi ’kwaniny’cesh i/o gwo mo ki:
Mane Arumgimis buni mane?
3 Arumgimis bana a’di diki’d e momis mo.
A’di ki mii a’diyin jin ’bora bwa a’di mo.
4 Tomp̱inycon buni kun luŋa uni mo tani ta ’dolkon kush mo dhali ’dolkon gana/ mo
kun uḵu ki me’d gi ’kwani mo be.
5 Uni ta gi ’twa/ mo, hili uni o gwoŋ kamuwa?
Dhali uni ta gi e mo, hili uni p̱arki toŋ kamu/ eya?
6 Uni ta gi ’ce mo, hili uni ciḵ toŋ kamuwa?
dhali uni ta gi shush mo, hili uni cic̱kina shim toŋ kamuwa?
7 Uni tan gi me’d mo, hili uni ta toŋ kamu/ is ki me’da?
Uni tan gi sho’k mo, hili uni mishi ii ki shoka?
Dhali uni misha isa kamu/ mur e ’kus buniya?
8 Uni gwansan kun uḵ uni mo tani uni wana e ki uni mo.
Wakan si’da/ aris uni gwahan kun gamki gwo is e tomp̱inycon buni mo.
9 Ayy Israyiil, gami gwo is e Tap̱a mo.
Haali/ a’di ita mowoṯẖ buni mo dhali agoŋgorom buni mo.
10 Ayy gu’b ma Haruun, kari moŋgam gwo is e Tap̱a mo.
Haali/ a’di ita mowoṯẖ buni mo dhali agoŋgorom buni mo.
11 Um kun ḵo/ki Tap̱a mo tani gamki gwo is e Tap̱a mo.
Haali/ a’di ita mowoṯẖ buni mo dhali agoŋgorom buni mo.
12 Tap̱a tana bwa pa ki pa gom ana mo. A’di midi ’bor ana mii mo.
A’di midi ’bor gu’b ma Israyiil mii mo.
Dhali a’di midi ’bor gu’b ma Haruun mii mo.
13 A’di midi ’bor uni gwansan mii kun ḵo/ki Tap̱a mo
’peni uni kun gwa’da is mo dhali uni kun cakin mo.
14 Dhalki Tap̱a c̱i um mo jin maruwa mar is mo,
um dhali uc̱im bum mo.
15 Dhalki um ’boru mii ki Tap̱a mo,
a’di jin uḵki momis mo dhali mony’cesh mo.
16 Momis uni ta momis gi Tap̱a mo,
hili mony’cesh c̱ikina a’di ki iya/ gi ’kwani mo.
17 Uni kun wukin mo tani mishi Tap̱a maŋ yisa,
walla uni gwansan kun iikin ka luŋgu’b e mo ma shwamm mo.
18 Hili ana mina ’bor Tap̱a mii mo
’pena tee yansan shwane/ mo dhali ki sule/ sule/ ya ye ’ba/ mo.
Maŋi Tap̱a mo.