1 Aha/ yuḵkina /e mo, ayy Tap̱a. Layu/ ki jahanne/ e aha/ mo.

C̱iyi ’cem pini ki ’twam pem mo, ki aha/ yuḵkina /e mo.

2 Dhalki mon’thom pem a’di deŋu e me’da ku’da ’bicajwahar ibwambori /e mo,

dhali mo jin ’de’kka/ me’d pemi mis mo me’d to jin ’ciṯẖu/ ’kus mom’pimpili/ mmomiiya bas mo.

3 Kari mo jin jinuwa ji ap̱o/ ’twam pem mo, ayy Tap̱a,

doshi mmotima campur gi ’twam pem mo.

4 Dhalku/ ki ḵa’da dum pem ki ma tonthusa kamu/ mo,

mmoshwa pibi/ anyor ki is pem gom tonthus mmomii mo

mmonyaḵ ya ki ’kwani kun mii to kun ’coḵa’coḵ mo,

dhali dhalku/ ki dhal aha/ bway mo mmoshwa tonṯem buni kun ṯawusaṯawus mo.

5 Dhalki wathi/ jin ’boro’d idor aha/ mo walla ḵucur aha/ ki bwaŋkush mo,

hili dhalku/ ki dhala yin gi ’kwanin thus ki a’di minu ’kosh ’kup̱ pem ki sule/ sule/ mo.

Haali/ mon’thom pem ṯikirkika/ ap̱o/ tonthus buni kun miina uni mo.

6 Me’d jin c̱ikunu uni e me’d gi uni gwansan kun mini waḵ uni mo tani

dhali yan’ko’d uni mini da/ar gwo ki gwon Tap̱a a’di ita gwoŋ gana/ mo.

7 Me’d wosh jin koṯẖkina jan ṯal ’de/ me’d mo dhali shaṯ uni ap̱owa ’cesh mo tani

wakan asimam buni minu ’kwaḵar bwa mo e ’twa/ ma Haawiya mo.

8 Hili em pem di’d ’kup̱ ki /e mo, ayy Tap̱a Arumgimis.

E /e mo tani aha/ simmkina mo jin hurga/ jwa e mo.

Dhalku/ ki dhal aha/ me’d wathi/ jin dar gi mo jin ceshuwa cesh ka p̱o/ mo.

9 Noni aha/ ’twa/ mo ’pena gume/ jin ’thikina uniya ’cesh gom aha/ mo,

dhali agume/ gi uni kun mii tonthus mo.

10 Dhalki imanmii tonthus ṯa’kkini monṯal ’de/ agumem buni mo

ki aha/ dina mmoye mo.