5
Yiṯ jin ’Kuc̱u Is mo dhali Ari Ḵa’bal mo
1 Dhali aha/ mishkina ki me’da bim poros gi a’di jin c̱a’bki’da p̱owa ḵursi ma maliḵ mo tani a’di ta’d gi yiṯ jin ’kuc̱kunu is mo jin ’kwarkunu gwo nycine/ mo dhali ap̱om piti mo si’da/, a’di jin ’dap̱kunu ’twa/ ka ’diŋkila/ kun ’dap̱ a’di ’twa/ kun ’koni pesu/ mo. 2 Dhali aha/ p̱arkina man’doyu gwo e mo jin ’bitha’bi’th mo jin bahki gwo mo ki ’twa/ jin caaca mo jin o gwo mo ki: Aja a’di jin ha me’d ki haŋ gana/ mo mmobene’d gwo jin ’kwaru ap̱o/ yiṯ yansan mo dhali ḵaca ’diŋkilam piti mo? 3 Dhali jan ṯal ’deŋ kamu/ yisa di’di momis mo walla ap̱o/ mony’cesh mo walla e bwaŋ’kwariny mony’cesh mo jin midi mish a’di ḵa’d mo, yiṯ yansan jin ’kuc̱u is mo walla mmohil gwo jin ’kwaru e bwaman a’di mo be. 4 Dhali aha/ gwokina kagahara mo haali/ ṯal ’deŋ kamu/ yisa gamkunu mo jin ha me’d mo mmoḵa’d gwo yansan jin ’kuc̱kunu is mo walla mmohil gwo kun ’kwarkunu ibwaman a’di mo be. 5 Dhali yan’ko’d wathin ṯal ’de/ ’peni ’kwaniŋ gwanyjaḵa/ oki aha/ gwo mo ki: Dhalku/ ki ko mo ma. Hili mo mo ma, Adhop ma waḵ ma Yahuuda/ dhali Abirman ma Dawuu’d, a’di p̱iki mii e mo be. Wakan a’di, a’di imidi mish yiṯ yansan jin ’kuc̱u is ḵa’d ’twa/ mo dhala ’diŋkila/ kun ’koni pesu/ kun ’dap̱kunu a’di ’twa/ mo.
6 Dhali mbwaman ma ḵursi ma maliḵ mo dhali to/e kun ’koni doŋon kun ’kon ki e mo dhali ibwaman ’kwaniŋ gwanyjaḵa/ mo tani aha/ p̱arkina Ari Ḵa’bal e mo mmodosh mo. A’di wana e ki a’di jin ’koshkunu mo, ki ce kun ’koni pesu/ ime’d mo dhali ka pinya/ e kun ’koni pesu/ mo, uni gun ta shi/in ma Arumgimis kun ’koni pesu/ mo, uni gun hashkunu mo eya ris mony’ceshi ’baar mo. 7 Dhali a’di yaki’d mo dhali bu’thki yiṯ yansan jin ’kuc̱kunu is mo ’peni me’da bim poros gi a’di jin c̱a’bki’d eya ḵursi ma maliḵ mo. 8 Dhali ki a’di bu’thki yiṯ yansan jin ’kuc̱u is mo tani to/e kun ’kon ma p̱o/i doŋon kun ’kon ki e mo dhali ’kwaniŋ gwanyjaḵa/ kun ’koni iss ’kwanimpa ’de/ i’ce’dka doŋon mo tani ṯa’kkina ’ceshi bwambori Ari Ḵa’bal mo. Uni ’baar ka ’deṯe/ ’deṯe/ bu’thkina dheŋdhenye/ mo dhali toŋ’kul bwa kun tana sahan ’dolkon gana/ mo kun ’tu’dkunu mo ka ’bicajwahar mo jin ta mon’tho gi uni kun dhunu ki she/ ki dhelel dhelel mo. 9 Dhali uni yuḵki gway this mo mmo/o gwo mo ki:
/E a’di ta a’di jin ha me’d mo mmobu’th yiṯ yansan jin ’kuc̱u is mo dhali mmoḵa’da ’diŋkilam piti jin ’dap̱u a’di ’twa/ mo,
haali/ /e ’koshkunu jwa mo, dhali ka bas pini mo tani /e wanki ’kwani ’ba/ mo goma Arumgimis mo
’peni arisa waḵ kun ’ko ’kwani e ki she/ ki
she/ mo dhali ’peni aris ’twa/ kun wala ’kwani ki she/ ki she/ mo dhali ’peni ’kwani kun ’kona e ki she/ ’peni tiya mo dhali ’peni kal gi ’kwaniny’cesh/ mo
10 dhali /e ki nyoŋ uni ki ’peŋkuman bampa/ mo dhali /e ki dhu uni ki igasiis goma Arumgimis bana mo
dhali uni mini ta tap̱a mo e mony’cesh yansan mo.
11 Yan’ko’d aha/ ki hil mo mo dhali aha/ ciḵkina rakin jin rayunu/ mo ka kul is ’pena ḵursi ma maliḵ mo dhali to/e kun ’kon ki e mo dhali gwanyjaḵaŋ ’kwani mo tani ’twa/ gi iman’doyu gwo ka ris dhali ka ris uni ka ris kun molu deŋ e mo dhali ’twaŋ ’kwani alip̱ alip̱ mo, 12 mmo/o gwo ka dhan ’twa/ kun caaca mo ki: A’di ta a’di jin ha me’d mo. A’di jin ta Ari Ḵa’bal jin ’koshkunu mo mmobu’th mom’bi’th mo dhali pa mo dhali moyuḵ mo dhali mo jin eḵa/ eḵ mo dhali montaḵ mo dhali monyca mo dhali mom’bor mii mo. 13 Dhali aha/ ciḵkina ris to ’baar mo ka ’deṯe/ ’deṯe/ kun uḵkunu mo kun ’kon e momis mo dhali kun ’kon e mony’cesh mo dhali kun ’kon e bwaŋ’kwariny mony’cesh mo dhali e bwaŋ ḵumma/ yi’de/ mo dhali aris uni ’baar mo kun ’koni bwaman mo tani o gwo mo ki: E a’di jin c̱a’bki’da p̱owa ḵursi ma maliḵ mo dhali e Ari Ḵa’bal mo ki mom’bor mii midi di mo dhali montaḵ mo dhali monyca mo dhali mo/eḵ mo gom ki sule/ mo dhali ki sule/ mo. 14 Dhali to/e kun ’kon ma p̱o/i doŋon mo kun ’kon ki e mo tani o gwo mo ki: Amen, dhali ’kwaniŋ gwanyjaḵa/ ṯa’kkin mo dhali luŋ a’di mo be.