18
Pam Baabil jin Biṯki’doo
1 Dhali yan’ko’d aha/ p̱arkina man’doyu gwoŋ kamu/ e mo mmothulu/ ka ’cesh ’peni momis mo. A’di ta gi dhan moshirr mo dhali mony’cesh ’twaḵki mo mo ki mo ma ra/ ra/ piti mo be. 2 Dhali a’di yuḵki’da yuḵ ki ’twa/ jin eḵa/ eḵ mo mmo/o gwo mo ki:
Pam Baabil biṯi’doo. Pam Baabil biṯi’doo. A’di jin caaca mo.
A’di jin warki’d ki mo jin ’kon ma ruma ’cesh nycine/ mo,
mo ma alanyjoro’c gom shi/ini ’baar ka ’deṯe/ ’deṯe/ mo kun ’thena’then mo,
mo ma alanyjoro’c gom ’dii ’baar ka ’deṯe/ ’deṯe/ mo, kun ’thena’then mo dhali kun bulabul mo.
3 Haali/ aris kal gi ’kwaniny’ceshi ’baar mo p̱iki yimana mura’th jin ḵa/u mo ki ŋah ŋah mo ’peni e ma yim jin karkina a’di ki ’thir ’thir mo goma ḵanthi/ jin ’kan ma yim mo.
Dhali aris imaliḵ kun ’koni mony’cesh mo tani uni miiki miinyc̱al ap̱owa yim mo
dhali aris uni gun yoli to e mony’cesh mo tani uni sekina ’pen ka pije/ mo gom pam buni jin tana uni mo ’peni mii ma yim kun cana bwa en’dap̱ a’di mo.
4 Yan’ko’d aha/ ciḵkina ’twaŋ kamu/ ’peni momis mo mmo/o gwo mo ki:
Iiyu/ ka pije/ ’pena yim mo, um gun ta ’kwanim pem mo,
isi ciki/ ki um mini ’koki bu’th miinthus ma yim mo,
isi ciki/ ki um mini ’koki pwaḵ isa nyor ma yim kun mini wo’c ’kwani is she/ mo.
5 Haali/ miinthus ma yim uni su’kkin ka maḵamp̱o/ ntagi momis mo,
dhali Arumgimis kaki mii ma yim kun ’koki ta kuŋ ḵar/e e mo.
6 Raḵa yim to ibway mo me’da yim ki is piti raḵki to ibway mo
dhali raḵa yim to ibway mo ka ’buḵum ’ban mo gom miin to ma yim mo.
P̱oka yim to jin cena a’di e ka ’buḵum ’ban nṯwa/a/ mo ka ḵubbaaya jin cen ma yim to e mo.
7 Me’da yim mmokarkina a’di ’baki ca ki is piti mo dhali lo’b e mii gi bwa en’dap̱ mo tani
wakan c̱ika yim isa nyor jin midi wo’c a’di is she/ mo dhali koki kony jabu’th mo ki mii jin nyaḵa e ki ji gi bar ma yim mii mo.
Haali/ eya du ma yim mo tani ayim o gwo ki is piti mo ki: Ahayi itana maliḵ jin ta’da yim mo,
aha/ yisa tana adhalla, dhali ko jin gwonu ki jabu’th mo tani miga/ p̱ar eya?
8 Wakan to ma yim jin midi wo’c a’di is she/ mo tani midi p̱u’du/ ka tenteŋ gana/ mo,
mo/isa nyor ’peni to kun shi/kin mo, dhali ko jin gwonu ki kony jabu’th mo dhali ṯe/ jin midi ’kosha ’kosh mo,
dhali ayim minu c̱i’th ki o’d mo
haali/ Tap̱a Arumgimis jin dorki’da yim gwon dwall ’twa/a ’cesh mo tani a’di eḵa/ eḵ mo be.
9 Dhali aris imaliḵ kun ’koni mony’cesh mo, uni gun miiki miinyc̱al ap̱o/ a’di mo dhali uni gun mii mii kun ta bwa en’dap̱ nyaḵka yim mo tani uni mini ko mo dhali wol kony jwa mo goma yim mo ki uni mini p̱ara ku’d e mo mmo’kuṯa p̱owa yim mo be. 10 Uni mini dosh isa dhana/ nnii mo mmoḵo/ isa nyor ma yim jin midi wo’c a’di is she/ mo dhali o gwo mo ki:
Ayy/ayy/ayy, ayy/ayy/ayy. /E jin ta dhan ’peŋkuman bampa/ mo,
/e jin ta dhan ’peŋkuman bampa/ gi Pam Baabil jin eḵa/ eḵ mo.
Ka tenten ’de/ mo tani gwon dwall jin toru gwo ’twa/a ’cesh ap̱o/ /e p̱u’dki’d mo.
11 Dhali uni kun yoli to e mony’cesh mo gwokin mo dhali koki kony jabu’th goma yim mo, haali/ wathin ṯal ’deŋ kamu/ yisa di’da jin midi yol tom buni kun suka uni ki sule/ sule/ mo. 12 To kun suka uni mo kun ta ’dolkon gana/ mo dhali ’dolkon kush mo, dhali wosh dhel mo dhali dhema/ mo, dhali burrinyen dhiny e mo dhali burrinyem buhe/ mo dhali burrinye/ jin na’bulana’bul mo dhali burrinyen duḵ is mo dhali aris cwa kun ’kona e ki she/ ki she/ mo kun ’kon ma kulus nycine/ mo dhali aris to kun uḵu ’peni sheny je kun ’kona e ki she/ ki she/ mo, dhali aris to kun p̱a/u ’peni cwa kun ’bitha yol she/ ki ’bi’th mo, dhala koroḵ mo dhali toŋḵuthu’da ’bi’thga/ mo dhali dhan wosh jaro/ jin miina e ki wa’c wa’c mo, 13 dhali aḵur cwa jin wana e ka kwaṯṯan jin ḵuyi mo mo, dhali cwa jin uḵuwa p̱i’dna/ ’peni cine/ mo dhali a’bicajwahar mo dhali cwa jin yuḵu gway ka murr mo dhali a’bicajwahar jin cenu e ki to jin ḵuyi mo mo, dhali yimana mura’th jin ḵa/u ki ŋah ŋah mo dhali ayin mo dhali adip̱anya ’tiga/ mo dhali pos bunyan mo dhali bip̱ mo dhali ḵa’bal mo, dhali aris shumarum mo dhali arisa arabiya kun dira shumarum mo dhali ’kwani kun ta c̱iŋkina/ kun yolu mo, uni gwansan kun tana ḵashira/ gi ’kwanimpa en’thi/ mo.
14 Dhali maman to jin ’kosh ma ḵashiram pini ṯe/ mo tani a’di yaki’d ’peni /e mo,
dhali aris tom pini kun ṯawusaṯawus mo dhali mo ma wa’c wa’c pini mo, uni thiski /e e mo, dhali minu gam doḵ/eya?
15 Dhali uni gun yolki to gwansan kun sugu mo, uni gun gamki mii adu is ki pa jin tana uni ’pena yim mo tani, uni mini dosh isa dhana/ mo e moŋḵo/ is mo gom isa nyor ma yim mo jin midi wo’c a’di is she/ mo, dhali wol ko mo dhali koki kony jabu’th kagahara mo, mmo/o gwo mo ki:
16 Ayy/ayy/ayy, ayy/ayy/ayy, gom dhan ’peŋkuman bampa/ mo
a’di c̱aan jin hi’thkunu is ki burrinyen dhiny e mo dhali burrinyem buhe/ mo dhali burrinyen duḵ is mo,
dhali nyoŋkunu is ki ’dolkon gana/ mo dhali ki wosh dhel mo dhali ki dhema/ mo.
17 Ka tenten ’deŋ gana/ mo tani aris to gwansan kun ta pa ki pa mo tani shi/kunu is mo be.
Dhali aris uni gwahan kun ta tap̱a ma ḵur yi’de/ mo dhali aris ’kwani kun ’ceṯẖkina ḵur yi’de/ mo dhali uni kun ta imanbora ḵur mo dhali aris uni gwansan kun yolki to mo ap̱o/ ḵumma/ yi’de/ mo tani, uni doshkin isa dhana/ mo 18 dhali ḵum cuuwa/ mo me’d jin p̱arkina uni aku’d e mo mmo’kuṯa p̱owa yim mo, mmo/o gwo mo ki:
Ki ’peŋkuman bampa/ jana sa/ wana e gi dhan ’peŋkuman bampa/ yan mo?
19 Dhali uni yeḵki bu’da ’ceshi ’kup̱ buni mo me’d jin gwokina uni mo, dhali koki kony jabu’th mo, mmoḵum cuuwa/ mo ki:
Ayy/ayy/ayy, ayy/ayy/ayy, gom dhan ’peŋkuman bampa/ mo,
e mo jin ’kona uni ’baar kun tan ga ḵur mo kun ishkin ki kana’d kana’d mo gom pa jin tan ma yim mo.
Ka tenten ’deŋ gana/ mo tani ayim shi/kunu is mo be.
20 ’Kunyi bwa mo ma, ap̱owa yim mo, ayy um ’kwani kun ’koni momis mo,
ayy um kun dhunu ki she/ ki dhelel dhelel mo dhali um kun dhunu ki she/ mo dhali imanc̱i gwo mo,
haali/ Arumgimis c̱iki um gwon dwall jin minu tor gwo ’twa/a ’cesha p̱owa yim mo.
21 Dhali yan’ko’d aman’doyu gwo jin eḵa/ eḵ mo bu’thki wosh jin wana e ki dhan wosh jin yoru to mo dhali biṯ a’di e ḵumma/ yi’de/ mo mmo/o gwo mo ki:
Wakan Pam Baabil jin ta dhan ’peŋkuman bampa/ mo tani minu biṯ ka ’cesh ki mombujur mo,
dhali a’di minu gam doḵ/e yisa.
22 Dhali ko ma dheŋdhenye/ jin buḵa imanbuḵ uni mo dhali uni kun tana ’twa/ gwocon ki gwocon gom gway jin yuḵu mo dhali uni kun mishkina ṯẖaṯẖar p̱i mo dhali uni kun mishkina apoome/ p̱i mo tani uni minu ciḵ doḵ/e yisa e /e ki sule/ sule/ mo.
Dhali ’kwani kun ta iman/uḵ to ’peni ton tiya gunn kun uḵu mo tani
uni minu gam doḵ/e yisa e /e ki sule/ sule/ mo.
Dhali ko ma yo jin yoru to mo tani minu ciḵ doḵ/e yisa e /e ki sule/ sule/ mo.
23 Dhali moŋkush ma lamba/ mo tani
midi diki doḵ/e kush mo mo e /e ki sule/ sule/ mo.
Dhali ’twa/ gi wathinyaŋa’b dhali nyaranyaŋa’b mo tani minu ciḵ doḵ/e yisa e /e ki sule/ sule/ mo.
Haali/ ’kwani kun yoli to e /e mo tani uni ta ’kwani kun caaca e mony’cesh mo
dhali aris kal gi ’kwani gi mony’ceshi ’baar mo tani uni he’kkunu e mo ki mii ma rum pini kun miina /e mo.
24 Dhali eya yim mo tani abas gamkunu mo, a’di jin ta’da bas gi imanc̱i gwo mo dhali imandhunu ki she/ ki dhelel dhelel mo dhali aris uni gwansan gun ’koshkunu ap̱o/ mony’cesh mo be.