4
A/Ibrahiim Ta She/mm mo
Dhali ki gwonta imina ana i/o mo goma Ibrahiim mo, jin ta’da babam bana jin di’di ṯwa/a/ mo isi ka yi’c ki buŋgwar is mo? Haali/ waḵka Ibrahiim karu ki mo ma ḵar/e gom ’kup̱ gwo jin miinu to mo tani a’di ta toŋ kamu/ jin kara a’di is ki ca mo gom a’di mo, dhali hili yisa ibwambor ma Arumgimis mo. Haali/ gwo wakata jin ’kwarkunu mo e Gwo ma Arumgimis mo mmo/o ka: Ibrahiim gamki’da Arumgimis gwo is mo, dhali a’di kar a’di ki mo ma ḵar/e mo be. Hili a’din ’de/ jin miiki mii mo tani tom piti jin gama a’di mo gom mii mo yisa karu ki to jin c̱inu ki me’d mo yisa. Hili a’di karu ki to jin mina a’di mii gam mo gom miim piti jin miikina a’di mo be. Hili a’din ’de/ jin diki mii mii mo tani hili a’di gamki a’di gwo is mo jin karki a’di ki mo ma ḵar/e mo, a’di jin ta’da Arumgimis a/ushiŋ gwo mo tani, moŋgam gwo is piti karu ki mo ma ḵar/e mo be. Wakan si’da/ aDawuu’d c̱iki ’twa/ maŋ ki mom’bor mii ap̱o/ wathi/ jin kar ma Arumgimis ki mo ma ḵar/e mo ki dar gi mii mo be mmo/o gwo mo ki:
Mom’bor mii gom uni gwansan uni gun dhalkunu adhiŋ gwom buni ’pen mo, dhali miinthus buni si’da/ kumkunu ’kup̱ mo be.
Mom’bor mii ap̱o/ wathi/ jin mina Tap̱a Arumgimis diki kar miinthus piti mo be.
Mom’bor mii yan a’di c̱inu ’twa/ maŋ ap̱o/ uni ’cena gun ’ciṯẖuwa munyjal yis mowa? walla ap̱o/ uni si’da/ kun ’konuki ’ciṯẖa/ munyjal yis mo. Haali/ ana ona gwo ki moŋgam gwo is karki’da Ibrahiim ki mo ma ḵar/e mo be. 10 Dhali a’di kar a’di kata mo? A’di karkunu nṯwa/a/ mowa? walla ŋ’ko’d ki a’di ’ciṯẖuwa munyjal yis mo. A’di yisa ŋ’ko’da, hili nṯwa/a/ ki a’di ’ciṯẖuwa munyjal yis mo be. 11 Dhali a’di bu’thki mo jin ’ciṯẖuwa munyjal yis mo me’d jamas mii mo walla to jin ’dap̱a’d ki mo ma ḵar/e gi moŋgam gwo is jin takina a’di ki a’di di’d ka munyjal yis i e naskina/ mo be. Ki a’di midi ’taki ta adhana baba ka ris ’kwani ’baar mo kun gamki gwo is mo be, uni gwansan kun darkin ki mo ma munyjal yis jin ’ciṯẖu naskina/ mo, ki mo ma ḵar/e minu ’taki kar gom uni mo be. 12 Dhali ki a’di midi ’taki ta adhana baba gom ’kwani kun ’ciṯẖuwa munyjal yis mo jasi ’te/ yisa, hili gom uni gun ta ku gi ’ciṯẖuwa munyjal yis mo si’da/ dhali kun baṯẖi she/mm mii gi moŋgam gwo is jin ta jim ma babam bana ka Ibrahiim jin takina a’di nṯwa/a/ ki a’di ’ciṯẖuwa munyjal yis mo be.
Gwo jin Onu Is Yayi’d ki Moŋgam Gwo Is mo
13 Dhali gwo jin onu is goma Ibrahiim mo dhali emen piti jin mina uni ’taki ta gi mal mo e mony’cesh mo tani, diki yayu/ gom gwoŋḵan jin c̱inu mo, hili gom mo ma ḵar/e gi moŋgam gwo is mo be. 14 Haali/ waḵki/ uni gun ta gi gwoŋḵan jin c̱inu mo mini ta gi mal mo tani moŋgam gwo jin gamu gwo is mo tani minu war ki jin onu ka wuny is mo dhali gwo jin onu is mo si’da/ minu war mo ki gwo jin minu p̱uu mo be. 15 Haali/ gwoŋḵan jin c̱inu mo a’di ḵalki’da nyor mo be. Hili ki gwoŋḵan p̱iyi’d mo tani gwo molu dhiŋ si’da/ mo.
16 Haali/ gom gwo gi wakan mo tani a’di ta ji gi gamu gwo is mo, ki gwo jin onu is min ma ’the cil mo dhali ki a’di minu ṯel sho’k mo gom emen piti ’baar mo, yisa gom jasi uni gun ha gwoŋḵan jin c̱inu e mo, uni ’cena yisa, hili gom uni si’da/ kun nyaḵ gwo gam is ka Ibrahiim mo be. Haali/ a’di ta’da adhana baba gom ana ’baar mo be. 17 Me’d Gwo jin ’kwarkunu mo mmo/o gwo mo ki: /E karkika/ mo mmota adhana baba gi kal gi ’kwaniny’cesh ka ris mo – e buŋ’kus ma Arumgimis mo, a’di jin gama a’di gwo is mo jin c̱iki moŋ’koki/e mo gom uni gun wukin mo dhali yuḵa yuḵ ki to gun ’koki ’ko mo me’d to gun ’kokin mo be. 18 Dhali ki mo ma ’teŋ kap̱e/ jin peki’d mo tani a’di gamki gwo is naskina/ mo ka ’teŋ kap̱e/ mo ki a’di midi ’taki ta adhana baba gom kal gi ’kwaniny’cesh ka ris mo me’d gwo jin ṯorkunu a’di mo ki: Wakan be emen pini mini ’ko mo be. 19 A’di diki ’ka’d mo e moŋgam gwo is mo ki a’di kulumki gwo ibwa mo gom buŋgwar is pitiŋ gana/ jin wana e ki jin wu’d mo haali/ a’di ta’d gi yil jin wana e ki issi mudhe’d mo ka dhan piti mo walla ki a’di kulumki gwo ibwa mo si’da/ goma Saarah jin dina bwan dho’th piti jin taki’da burum naskina/ mo be. 20 A’di diki aṯẖ mo jin gamu gwo is ki sule/ mo be. A’di dina a’di ki dumbul mo gom gwo jin okin ma Arumgimis is mo. Hili a’di ’bi’thkunu is mo e moŋgam gwo is mo me’d jin karkina a’di Arumgimis ki ca mo be. 21 Dhali a’di ṯelu sho’k mo ki gwo eya du mo ka Arumgimis mishi mii a’di jin okina a’di is mo be. 22 Dhali wakan mo tani moŋgam gwo is piti karki a’di ki mo ma ḵar/e mo be. 23 Dhali hili, gwo jin okunu mo ki: a’di karki a’di mo tani, gwo gwansan uni ’kwarkunu mo gom jasi a’di a’di ’de/ yisa, 24 hili gom ana si’da/ mo. A’di minu kar ka ḵar/e gom ana kun gama gwo is e a’di mo jin piki a’di ’peni mowu mo jin ta’da Yesus Tap̱am bana mo be. 25 A’di jin karkunu mo mmowu mo goma adhiŋ gwom bana ’baar mo dhali jin pikunu mo ki ana minu dhu ki mo ma ḵar/e mo be.