16
Monthe Me’d jin Thenu ka Ḵarembuye/ mo
Aha/ ḵana um gwo mo gom ’bwah bana ka P̱ibi jin ta’da mancila to hil goma ḵaniisa gi Paŋ Kanḵariya mo be. Ki um mini bu’th a’diyim mo e Tap̱a me’d mii jin ha a’di me’d me’d kun dhunu ki she/ ki dhelel dhelel mo dhali woṯẖi a’diyim mo ma e ton tiya jin min ma yimi mii ta ’peni um mo haala yim a’di woṯẖki’da woṯẖ ka ris mo dhali buŋgwar is pem gana/ si’da/ mo be.
Theka Piriskilla me’d mo ma dhali Akiila, unim pem kun nyaḵkaa/ aṯu’c mii eya Ḵrisṯẖos jin ta’da Yesus mo be. Uni gun c̱i ’bam buni ki to gom mondiki/em pem mo. E uni mo tani jasi aha/ ’de/ yisa, hili si’da/ eya risa ḵaniisa ’baar mo kun ’koki ta ’Kwani Yahuuda/ mo c̱i mom’bor bwa i is mo be. Theka ḵaniisa me’d mo si’da/ kun ’kon e gu’b buni mo. Theka Abaynitus me’d mo a’di jin enka/ mo ma. A’di ta jan ’de/ jin ṯwa/a/ jin ṯu’kki’da bor mo e Pa Aḵaa/iya goma Ḵrisṯẖos mo be. Theka Mariyam me’d mo ma a’di jin miiki’da ṯu’c jin ’batha’ba’th e bwam um mo. Theka Andaruunikus me’d mo ma dhali Yuniyas jin ta’da bas pem dhali agarr pem jin nyaḵkaa/ c̱a’ba sijin mo. Uni ita uni ibwaŋ ’kwani kun dhunu ki she/ mo dhali uni ’kokin mo eya Ḵrisṯẖos nṯwa/a/ ki aha/ mo be. Theka Ambiliyas me’d mo ma a’di jin enka/ e Tap̱a mo be. Theka Urbanus me’d mo ma a’di jin ta’da mannyaḵ to mii jin ta jim bana eya Ḵrisṯẖos mo. Dhali a’dim pem jin enka/ jin ta’da Isṯaḵis mo. 10 Theka Aballis me’d mo ma a’di jin maŋu eya Ḵrisṯẖos mo. Theki uni gwansan me’d mo ma uni gun tana waḵ ma Aristubulus mo. 11 Theka bas pem me’d mo ma jin ta’da Hirudiyuun mo. Theki uni gwansan me’d mo uni kun ’kon e Tap̱a mo, uni gun tana waḵ ma Narḵissus mo. 12 Theki uni gwansan me’d mo kun miikina ṯu’c e Tap̱a mo uni kun ta iṮarip̱eena dhala Ṯarip̱uusa mo. Theka Barsiis me’d mo ma jin enu mo, a’diyim jin miiki’da ṯu’c jin ’batha’ba’th e Tap̱a mo. 13 Theka Rup̱us me’d mo ma, a’di jin leke’thkunu e Tap̱a mo dhali kum si’da/ jin ta’da ata’dam pem mo. 14 Theka Asinḵiriiṯus me’d mo dhala P̱iliguun mo dhala Harmaas mo dhala Baṯerubaas mo dhala Harmiis mo dhali awaḵ kun nyaḵ ’ko ki uni mo be. 15 Theka P̱iluluugus me’d mo ma dhala Juliya mo dhala Niriyuus mo dhali ’bwaham piti mo dhala Ulumbaas mo dhali aris uni gun dhunu ki she/ ki dhelel dhelel mo kun nyaḵ ’ko ki uni mo be. 16 Theka the me’d ka rem ’kup̱ mo ma ki mo gi gamu ’twa/ ’kup̱ ki ’bore/ mo. Arisa ḵaniisa ma Ḵrisṯẖos theki um me’d mo be.
17 Aha/ yip̱a ’kup̱ ’kup̱ ki um mo iwaḵ ki um mini hil uni gwansan kun dhu bwa ka c̱em bwa mo dhali kun ta imanraḵa raḵ kun kolu kun se gwo i is mo, a’di jin ṯorkunu um mo. ’Cuḵi uni i’kup̱ mo ma. 18 Haali/ ’kwani kun ta thus kan mo tani ’koki mii to gom Tap̱am bana ka Ḵrisṯẖos mo hili uni mii to gom bwam buniŋ gana/ mo. Dhali ki gwom ’borga/ mo dhali ki gwo maŋ mo tani uni he’kki tiya adu e kun aṯẖa/aṯẖ mo. 19 Haali/ ki um ’kon mmoha gwo e mo tani a’di mishkunu e mo ’baar mo dhali gom a’di gi wakan mo tani aha/ ’kunykina bwa gom um mo. Hili aha/ ona ki um mini yuḵayuḵ mo mmomish a’di jin ’boro’d mo dhali ki um mini dar ga maḵi cine/ gom a’di jin ta thus mo. 20 Dhali yan’ko’d Arumgimis jin ta gi moŋḵu’th is midi pucura Seṯaan eya ’cesh ’peni bwam sho’k bum ki ’dishe/ mo. A’the gi Tap̱a Yesus Ḵrisṯẖos bana dhalki a’di di’d e um mo ma.
21 Ṯimuṯẖawuus a’di jin nyaḵki’da ṯu’c mii ki aha/ mo tani theki um me’d mo, wakan si’da/ miikin ma Luḵiyus mo dhala Yasuun mo dhali Susibaṯrus kun tana bas pem mo be.
22 Aha/ jin tana Ṯarṯiyuus jin ’kwarki gwo yansan mo tani aha/ thekina um me’d e Tap̱a mo be.
23 Gayus a’di jin ta’da ’borim bwa gom aha/ mo dhali goma ḵaniisa ’baar mo tani theki um me’d mo. Arasṯus jin cila ’pem pan ton dhu mo dhali akam bana ka Ḵawarṯus theki um me’d mo be. 24 A’the gi Tap̱a Yesus Ḵrisṯẖos bana dhalki a’di di’d e umi ’baar mo. Amen.
Mmoṯe Gwo mo ki Montaḵ mo
25 Dhali shwane/ e a’di jin mish um ’bi’th is mo isi ki gwom ’borgam pem mo dhali ki gwo jin c̱inu goma Yesus Ḵrisṯẖos mo isi ki gwo jin ’ceenu ’peni gwom bag yan mo tani a’di jin karu ki ’twan ’dap̱ ki yil ka ris ’peni kadhamo/ innii mo. 26 Hili shwane/ a’di ṯoru eya tente/ mo dhali ki gwo gi imanc̱i gwo ma Arumgimis kadhamo/ kun ’kwarkunu a’di mishu eya tente/ eya ris kal gi ’kwaniny’ceshi ’baar mo isi ki gwoŋḵan ma Arumgimis jin di ki e ki sule/ ya ye ’ba/ mo mmoḵal mo gi hanu gwo e ki moŋgam gwo is mo be. 27 Dhalki monyca di’d eya Arumgimis mo, a’di jin yuḵi’d a’din ’deŋ gana/ ki sule/ ki sule/ ya ye ’ba/ eya Yesus Ḵrisṯẖos mo. Amen.