Muqeddes Kalam (latin yéziq) Ayup 8

Shuxaliq Bildad sözleydu — Ilgiriki dewrlerdiki azab-oqubetler toghruluq guwahliq

1 Andin Shuxaliq Bildad jawaben mundaq dédi: —

2 «Sen qachan’ghiche mushularni sözleysen?

Aghzingdiki sözler küchlük shamaldek qachan’ghiche chiqidu?

3 Tengri adaletni burmilighuchimu?

Hemmige Qadir adilliqni burmilamdu?■

4 Séning baliliring Uning aldida gunah qilghan bolsa,

U ularnimu itaetsizlikining jazasigha tapshurghan, xalas.□

5 Biraq eger özüng hazir chin könglüngdin Tengrini izdisengla,

Hemmige Qadirgha iltija qilsangla,■

6 Eger sen sap dil hem durus bolghan bolsang,

Shübhisizki, U sen üchün oyghinidu,

Choqum séning heqqaniyliqinggha tolghan turalghungni güllendüridu.

7 Sen deslepte étibarsiz qaralghan bolsangmu,

Biraq sen axirida choqum téximu güllinisen.

8 Shunga sendin ötüneyki, ötkenki dewrlerdin sorap baqqin,

Ularning ata-bowilirining izdinishlirigimu köngül qoyghin■

9 (Chünki biz bolsaq tünügünla tughulghanmiz;

Künlirimiz peqet bir saye bolghachqa, héchnémini bilmeymiz).□ ■

10 Sanga körsetme bérip ögeteleydighan ular emesmu?

Ular öz könglidikini sanga sözlimemdu?

11 Latqa bolmisa yékenler égiz öselemdu?

Qomushluqtiki ot-chöpler susiz öselemdu?

12 Ular yéshil péti bolup, téxiche orulmighan bolsimu,

Herqandaq ot-chöptin téz tozup kétidu.■

13 Tengrini untughan kishilerning hemmisining aqiwetliri mana shundaqtur;

Iplaslarning ümidi mana shundaq yoqqa kéter.■

14 Chünki uning tayan’ghini chürük bir nerse, xalas;

Uning ishen’gini bolsa ömüchükning toridur, xalas.

15 U öz uwisigha yölinidu, biraq u mezmut turmaydu;

U uni ching tutuwalghan bolsimu, biraq u berdashliq bérelmeydu.

16 U quyash astida kökligen bolsimu,

Uning pilekliri öz béghini qaplighan bolsimu,

17 Uning yiltizliri tash döwisige chirmiship ketken bolsimu,

U tashlar arisida orun izdigen bolsimu,

18 Lékin Xuda uni ornidin yuliwetse,

Ashu yer uningdin ténip: «Men séni körmigen!» — deydu.□

19 Mana uning yolining shadliqi!

Uningdin kéyin ornigha bashqiliri tupraqtin ünidu.

20 Qara, Xuda durus ademni tashlimaydu,

Yaki yamanliq qilghuchilarning qolini tutup ularni yölimeydu.□

21 U yene séning aghzingni külke bilen,

Lewliringni shadliq awazliri bilen tolduridu,

22 Sanga nepretlen’genlerge shermendilik chaplinidu,

Eskilerning chédiri yoqitilidu».

Ayup
<
8
>

■8:3 Qan. 32:4; 2Tar. 19:7; Dan. 9:14

□8:4 «Séning baliliring Uning aldida gunah qilghan bolsa, U ularnimu itaetsizlikining jazasigha tapshurghan, xalas» — Bildadning bu bayani rehimsizlik bilen qilin’ghan sözlerdur; bu sözler Ayupning yarisigha tuz sépip uni téximu azabqa salidu. Chünki Ayupning hesriti del mushu ish tüpeylidin boluwatatti; biraq Bildadning Ayupning balilirining ötküzgen birer gunahi toghrisida héchqandaq ispati yoqtur. Biz bolsaq, uning balilirining emeliyette öz gunahi sewebidin ölmigenlikini bilimiz.

■8:5 Ayup 22:23

■8:8 Qan. 4:32

□8:9 «Künlirimiz peqet bir saye...» — Bildadning bu dégini, uning u dewridiki ata-bowilirining (özining zamani bilen sélishturghanda) intayin uzun ömürlük bolghanliqini körsitishi mumkin. (Tewrattiki «Yaritilish» qismigha asasen, Adem’atimizdin bashlap Nuh peyghemberning dewrigiche nurghun ademler birnechche yüz yil yashighanidi).

■8:9 Yar. 47:9; 1Tar. 29:15; Ayup 7:5, 6, 7; Zeb. 39:5, 13; 102:11; 144:4

■8:12 Zeb. 129:5-6; Yer. 17:6

■8:13 Ayup 11:20; 18:14; Zeb. 112:10; Pend. 10:28

□8:18 «... Lékin Xuda uni ornidin yuliwetse, ashu yer uningdin ténip: «Men séni körmigen!» — deydu» — mushu yerlerde Bildad Ayup uchrighan balayi’apetni shu birnechche ishqa oxshatqan bolushi mumkin: — awwal -15-ayette, u «yamanlarning öyining ghulap kétishi» toghruluq sözleydu; ikkinchi, 16-ayettiki «pilekler» dégen söz, ibraniy tilida «perzentler»nimu körsitidu. Üchinchi, mushu ayette belkim «ashu yer» dégen söz Ayupning yurtdashlirini körsitidu; ular uni chetke qéqip: «Sendek Xuda lenet qilghan ademni tonumaymiz» dégen menilerdimu éytilghan bolushi mumkin.

□8:20 «... yamanliq qilghuchilarning qolini tutup ularni yölimeydu» — yaki «...yamanliq qilghuchilarni qoligha küch bermeydu».