5
5-munajat — Israilning rehim tilesh duasi
1 Béshimizgha chüshkenlerni ésingge keltürgeysen, i Perwerdigar;
Qara, bizning reswachiliqta qalghinimizni neziringge alghaysen!
2 Mirasimiz yatlargha,
Öylirimiz yaqa yurtluqlargha tapshuruldi. □«Mirasimiz» — Israilgha tewe qilin’ghan zéminini körsitidu. Xuda ulargha uni miras qilghanidi.
3 Biz yétim-yésirler, atisizlar bolup qalduq;
Anilirimizmu tul qaldi.
4 Ichidighan suni sétiwélishimiz kérek;
Otunni peqet pulgha alghili bolidu.
5 Bizni qoghlighuchilar tap basturup kéliwatidu;
Halsirap, héch aram tapalmaymiz.
6 Jan saqlighudek bir chishlem nanni dep,
Misir hem Asuriyege qol bérip boysun’ghanmiz.
7 Ata-bowilirimiz gunah sadir qilip dunyadin ketti;
Biz bolsaq, ularning qebihlikining jazasini kötürüshke qalduq.
8 Üstimizdin höküm sürgüchiler qullardur;
Bizni ularning qolidin azad qilghuchi yoqtur.□«Üstimizdin höküm sürgüchiler qullardur» — «qullar» belkim mustebit hökümdarliqqa chiqqan qullarni körsitidu; Tewrat «Pend.» 30:21-22ni körüng.
9 Dalada qilich tüpeylidin,
Nénimizni tépishqa jénimizni tewekkul qilmaqtimiz.
10 Térimiz tonurdek qiziq,
Achliq tüpeylidin qizitma bizni basmaqta.
11 Zionda ayallar,
Yehuda sheherliride pak qizlar ayagh asti qilindi.
12 Emirler qolidin dargha ésip qoyuldi;
Aqsaqallarning hörmiti héch qilinmidi.
13 Yash yigitler yarghunchaqta japa tartmaqta,
Oghul balilirimiz otun yüklerni yüdüp deldengship mangmaqta.
14 Aqsaqallar sheher derwazisida olturmas boldi;
Yigitler neghme-nawadin qaldi.□«Aqsaqallar sheher derwazisida olturmas boldi» — adet boyiche aqsaqallar sheher derwazilirida olturup sot-höküm beja keltüretti.
15 Shad-xuramliq könglimizdin ketti,
Ussul oynishimiz matemge aylandi.
16 Béshimizdin taj yiqildi;
Halimizgha way! Chünki biz gunah sadir qilduq!
17 Buning tüpeylidin yüreklirimiz mujuldi;
Bular tüpeylidin közlirimiz qarangghulashti —
18 — Zion téghigha qarap közlirimiz qarangghulashti,
Chünki u chölderep ketti,
Chilböre uningda paylap yürmekte.
19 Sen, i Perwerdigar, menggüge höküm sürisen;
Texting dewrdin-dewrge dawamlishidu.
20 Sen némishqa bizni daim untuysen?
Némishqa shunche uzun’ghiche bizdin waz kéchisen?
21 Bizni yéninggha qayturghaysen, i Perwerdigar!
Shundaq bolghanda biz qaytalaymiz!
Künlirimizni qedimkidek eslige keltürgeysen,
22 — Eger sen bizni mutleq chetke qaqmighan bolsang,
Eger bizdin cheksiz ghezeplenmigen bolsang!
□5:2 «Mirasimiz» — Israilgha tewe qilin’ghan zéminini körsitidu. Xuda ulargha uni miras qilghanidi.
□5:8 «Üstimizdin höküm sürgüchiler qullardur» — «qullar» belkim mustebit hökümdarliqqa chiqqan qullarni körsitidu; Tewrat «Pend.» 30:21-22ni körüng.
□5:14 «Aqsaqallar sheher derwazisida olturmas boldi» — adet boyiche aqsaqallar sheher derwazilirida olturup sot-höküm beja keltüretti.