92
92-küy •••• Medhiye
1 Shabat küni üchün bir naxsha-küy: —
Perwerdigargha teshekkür éytish,
Namingni küylesh eladur, i Hemmidin Aliy Bolghuchi! ◼«Shabat küni üchün bir küy-naxsha...» — «shabat küni» — shenbe küni, yeni Xuda Yehudiy xelqige békitken aram élish küni.
2 Özgermes muhebbitingni seherde,
jakarlash heqiqet-sadaqitingni tünlerde,
3 On tarliq saz we rawabni chélip,
Chiltar bilen mungluq ahangda chélish eladur!
4 Chünki Sen Perwerdigar, Öz qilghining arqiliq méni xursen qilding,
Qolliringning qilghanliri bilen men rohlinip naxsha éytimen.
5 Perwerdigar, qilghan ishliring némidégen ulughdur!
Oyliring nahayiti chongqurdur!
6 Bighem kishi buni bilmes,
Hamaqet buni chüshenmes, ◘Zеb. 94:8; Pеnd. 12:1
7 Reziller ot-chöptek aynighanda,
Qebihlik qilghuchilarning hemmisi güllen’gen bilen,
Menggü halak bolup kétidighanlar shulardur! ◼«Menggü halak bolup kétidighanlar shulardur!» — yaki «Bu ularning halak bolushi üchün bolidu!».
8 Lékin Sen, i Perwerdigar, ebedil’ebed üstün turisen.
9 Chünki mana düshmenliring, i Perwerdigar,
Mana düshmenliring yoqilidu;
Barliq qebihlik qilghuchilar tiripiren qiliwétilidu!
10 Münggüzümni yawayi buqiningkidek kötürisen;
Béshimgha yéngi may sürkilip, mesih qilinidu.
11 Méni qest qilghanlarning meghlubiyitini öz közum köridu;
Manga qarshilishishqa qozghalghan rezillik qilghuchilarning ten bergenlikinimu quliqim anglaydu.
12 Heqqaniy adem xorma derixi kebi güllep-yashnaydu;
U Liwandiki kédr derixidek ösidu. ◘Hak. 9:15; Hosh. 14:6
13 Perwerdigarning öyige tikilgenler,
Xudayimizning hoylilirida güllinidu;
14 Ular qérighandimu yene méwe béridu,
Suluq hem yéshil bolar;
15 Shuning bilen ular Perwerdigar durustur, dep ispatlaydu;
U méning qoram téshimdur,
Uningda naheqsizlik yoqtur!