140
140-küy •••• Ahanetchiler hem zomigerler arisida
1 Neghmichilerning béshigha tapshurulup oqulsun dep, Dawut yazghan küy: —
Rezil ademdin, i Perwerdigar, méni azad qilghaysen;
Zorawan kishidin méni saqlighaysen.
2 Ular könglide yamanliqlarni oylimaqta;
Ular her küni jem bolushup urush chiqarmaqchi.
3 Tilini yilanningkidek ittik qilidu;
Kobra yilanning zehiri lewliri astida turidu;
Sélah.■Zeb. 58:4-5; Rim. 3:13
4 Rezil ademning qolliridin méni aman qilighaysen, i Perwerdigar;
Putlirimni putlashni qestleydighan zorawan kishidin saqlighaysen.
5 Tekebburlar men üchün qiltaq, tanilarni yoshurup teyyarlidi;
Yol boyida tor yaydi,
Men üchün tuzaqlarni saldi;
Sélah.■Yer. 18:22
6 Men Perwerdigargha: «Sen méning Tengrimdursen» — dédim;
Yélinishlirim sadasigha qulaq salghaysen, i Perwerdigar;
7 Perwerdigar Reb nijatliqimning küchidur;
Sen jeng künide béshimni yépip qoghdighansen.
8 Rezil ademning ümidini ijabet qilmighaysen, i Perwerdigar;
Ularning hiylilirini aqquzmighaysen;
Bolmisa özlirini chong tutuwalidu.
Sélah.
9 Méni qorshiwalghanlarning bolsa,
Lewliridin chiqqan shumluq ularning öz béshigha chüshsun;□«Méni qorshiwalghanlarning bolsa, lewliridin chiqqan shumluq ularning öz béshigha chüshsun» — bashqa birxil terjimisi: «Méni qorshighanlarning bashlamchilirigha bolsa, öz lewliridin chiqqan shumluq özlirige chüshsun».
10 Üstige choghlar yaghdurulsun;
Ular otqa,
Qaytidin chiqalmighudek hanglargha tashliwétilsun;
11 Tili chéqimchi ademning yer yüzide orni bolmisun;
Balayi’apet zorawanlarni tügeshküche owlaydu;
12 Men bilimenki, Perwerdigar ézilgenlerning dewasini soraydu,
Yoqsulning heqqini élip béridu;
13 Berheq, heqqaniylar naminggha teshekkür éytidu;
Köngli duruslar huzurungda yashaydu.
□140:9 «Méni qorshiwalghanlarning bolsa, lewliridin chiqqan shumluq ularning öz béshigha chüshsun» — bashqa birxil terjimisi: «Méni qorshighanlarning bashlamchilirigha bolsa, öz lewliridin chiqqan shumluq özlirige chüshsun».