63
63-küy •••• Hudaƣa intizar bolux
1 Dawut yazƣan küy (u Yǝⱨudadiki qɵl-bayawanda bolƣan qaƣda yezilƣan): —
I Huda, Sǝn mening ilaⱨimdursǝn,
Tǝxnaliⱪ bilǝn Seni izdidim!
Mǝn ⱪurƣaⱪ, qangⱪaⱪ, susiz zeminda turup,
Jenim Sanga intizar, ǝtlirim tǝlmürüp intilarki — ◘1Sam. 22:5; 23:14,15
2 Muⱪǝddǝs jayingda Sanga kɵz tikip ⱪariƣinimdǝk,
Mǝn yǝnǝ zor ⱪudriting wǝ uluƣluⱪungni kɵrsǝm!
3 Ɵzgǝrmǝs muⱨǝbbiting ⱨayattinmu ǝzizdur;
Lǝwlirim Seni mǝdⱨiyilǝydu;
4 Xu sǝwǝbtin tirik bolsamla, Sanga tǝxǝkkür-mǝdⱨiyǝ oⱪuymǝn,
Sening namingda ⱪollirimni kɵtürimǝn.
5 Jenim nazunemǝtlǝrdin ⱨǝm mayliⱪ gɵxlǝrdin ⱪanaǝtlǝngǝndǝk ⱪanaǝtlǝndi;
Aƣzim eqilip hux lǝwlirim Sanga mǝdⱨiyilǝrni yangritidu; ◼«Jenim nazunemǝtlǝrdin ⱨǝm mayliⱪ gɵxlǝrdin ⱪanaǝtlǝngǝndǝk ⱪanaǝtlǝndi» — Yǝⱨudiylar üqün mayliⱪ gɵx intayin esil tamaⱪ ⱨesablinidu.
6 Ornumda yetip Seni ǝsliginimdǝ,
Tün keqilǝrdǝ Seni seƣinip oylinimǝn.
7 Qünki Sǝn manga yardǝmdǝ bolup kǝlgǝnsǝn;
Sening ⱪaniting sayisidǝ xad-huramliⱪta nahxilarni yangritimǝn.
8 Mening jenim Sanga qing qaplixip mangidu,
Sening ong ⱪolung meni yɵlimǝktǝ.
9 Biraⱪ jenimni yoⱪitixⱪa izdǝwatⱪanlar yǝr tǝktilirigǝ qüxüp ketidu.
10 Ularning ⱪeni ⱪiliq tiƣida tɵkülidu,
Ular qilbɵrilǝrgǝ yǝm bolidu.
11 Lekin padixaⱨ Hudadin xadlinidu;
Uning nami bilǝn ⱪǝsǝm ⱪilƣanlarning ⱨǝmmisi roⱨlinip xadlinidu;
Qünki yalƣan sɵzligüqilǝrning zuwani tuwaⱪlinidu. ◼«Uning nami bilǝn ⱪǝsǝm ⱪilƣanlar...» — bǝlkim aldin’ala tilƣa elinƣan padixaⱨning namini kɵrsitidu; xunga Mǝsiⱨning nami boluxi kerǝk.