2
Feas We Ye Molow Mo Fuluwe Ye Santus
1 Ha hachuyaloh pangal wegdeg ka yael moniyan le tayikof; ha towe ma kachepar ngo ha towe ma foriyeg, ngo ha towe ma loltemay, hare ha hapatpat tayikof irel yarmat. 2 Ha mel le habe wochog yalwich kowe re moch subdoh, we rema dipli chog bo rebe yul melik; ila be wol ila sangmi bo habe yul melik la yebe hakkela ngulmi bo ha bela palengdah ngo habe daor.2:2–25; Is 53:5–6 (LXX) 3 Bo iwe babior we ye santus ye sor bo, “Hami hasa spegil gola lepal momayel hagiyeg la yael Samol.”Ps 34:8
4 Ha budoh irel Samol, le iy mele faes we ye molow, ngo yarmat re tolpagili loh bo tor pelal. Iwe ngo Deus ye duwley bo ila mala ye paleng pelal. 5 Ha budoh le habe wochog feas kala Deus ye foru le ye molow bo yebe tapelugmi irel yal fatleha sew templum le be kkel, ngo ha mel bo tot temarong kowe re santus. Jesus Kristus mele ye hayaho bo habe fang maligach kala ye kkemal ngo ye fel depel Deus iyang. 6 Bo iwe babior we ye santus ye sor bo,
“Isa duwley feas la ye hartael
paleng pelal isa itol wol Zion;
ngo te tugul semal le yebe chepar irel, ngo towe yeyewal depal.”Is 28:16 (LXX)
7 Feas le ila ye palleng fal ngalugmi rechokla yesa tugul lal dipmi. Iwe ngo rechokla ye ted tugul lal deper ila tor fal ngalir.
“Feas we chol hassul imw kowe re ppedaloh bo tor pelal,
ila sala mel le ila mala ye hartael palleng fal.”Ps 118:22
8 Iwe ngo ye wol mel solboy mo lal babior we ye santus we ye sor bo,
“Iye feas we yebe sug pecher yarmat iyang,
ngo iye feas we rebe cheprag iyang.”
Re cheprag bo fael mala rete chepar irel babior we ye santus we ila mele Deus ye dipli le rebe mel iyang.Is 8:14–15
9 Iwe ngo hami ila Deus yesa duwlehmi bo habe mel bo temarong, bo habe yengang ngali le iy King. Iwe ngo ha mel le sew fuluy le ye santus, ngo ha mel bo lol Deus. Yesa duwlehmi bo habe kapta ngalir panger yarmat pangal mekla ye momay le Deus yesa foru. Yesa hachuyahmi wey mo luwul ruchupung bo habe mel luwul teram la ye momay.Ex 19:5–6; Is 43:20 (LXX); Ex 19:5; Dt 4:20; 7:6; 14:2; Titus 2:14; Is 43:21; Is 9:2 10 Ye mel fael sew yad le te hami lol Deus, iwe ngo yela igla ngo hasa mel bo lol; ngo ye mel fael sew yad le ha togla ffaho la yael Deus, iwe ngo yela igla ngo yesa yoh ngalugmi.Ho 2:23
Slave Kala Lol Deus
11 Re wol maryarey, ikekefal pechehmi bo hami ila wasola ngo tor bugtami lal faileng le. Ha towe dabey chog depel mekla holongmi le ye keketayikofa mekla ngulmi. 12 Habe hamomayu wegdegmi luwulur rechokla rete chepar irel Deus. Bo yodla re sor bo yor tayikof le hasa foru, iwe ngo rebe wiri mekla wegdegmi le ye momay. Ila ngo rebe hapingpinga Deus irel ralla iy yebe budoh iyang.
13 Yagel mala hami re dabeyel Samol mele habe taelenga pangal yabor tamol iyang: Ha taelenga yalol mala Llulupal Roma le iy mele ye hartal tagiyet mo luwulur panger yarmat. 14 Iwe ngo ha taelenga yalor governor kala le iy mele ye hatugulur bo rebe fang hagerger ngalir rechoka tayikof wegdegir, iwe ngo re hapingpingar rechokla rema foru mekla ye momay. 15 Bo Deus ye dipli bo habe ma foru mekla ye momay, ila ngo rechokla re buch rebe ppoloh mo irel hapatpat kala yar le tor pelal. 16 Ha mel le habe tal; ha towe sor le mala hasa tal ila ye bele yor kelmi le habe foru meka ye tayikof. Ha mel le habe yengang ngal chog Deus. 17 Ha hasrowur panger yarmat ngo hasa hachangir mekla wochilami. Iwe ngo hasa hasrowu Deus ngo hasrowu mala Llulupael Tamol Roma.
Sibe Dabey Igegel Hafohoy We Yael Kristus
18 Hami boy kala ha taelenga yalol yami masta ngo ha hasrowur, le te rechokla chog re momay ngalugmi ngo re luluwalehmi, bo wol rechokla re tayikof ngalugmi. 19 Deus yebe holbuwahmi irel mele, igle hami ha yedamgel luwul hafohoy kala tor pelal le rebe faor ngalugmi bo fael mala ha gola mekla Deus ye dipli. 20 Meda fal le rebe hapingpingah gel semal irel yam yedamgel luwul hafohoy kala yam le fael mekla ye tayikof le ho foru? Iwe ngo hare ho yedamgel luwul hafohoy le fael yam foru mekla ye momay, ila ngo Deus yebe holbuwah iyang. 21 Deus ye ffesangugmi le fael mala Kristus ye hafohoy bo yaglugmi. Ila hami habe dabey tappel yedamgel kowe yael Kristus luwul hafohoy kowe yal. 22 Tor fael sew le iy ye molfid ngo tor fael sew le ye kachepar.Is 53:9 23 Yodwe yarmat re hapatpat tayikof ngali ngo iy yete hatefaeli ngal hapatpat tayikof. Yodwe ye hafohoy ngo iy yete luluwaley le yebe paliliy hafohoy kowe resa faor ngali. Iy ye yetedah chog depal wol Deus le iy mele chol Tatelal Hapatpat we ye momay.Is 53:7 24 Kristus ye hasi cchol meka molfidich irel yodwe rela krudu bo hare gich sibe tal mo irel mala kelel molfid bo sibe mel le sibe fel. 25 Hasa wochog saaf kowe resa mwael. Iwe ngo Deus yesa hatefalugmi doh igla bo habe dabey Kristus le iy mele Rematmetael Saaf we ye kekefaeli mekla ngulmi.