8
Jesus Le Yach Llulupal Temarong
1 Pallengel fal meka si kekapta igla ila yesa mel semal Llulupal Temarong bo yach le ye maro rela gilemra irel Deus le tor hapagol mo woal laeng.Ps 110:1 2 Yesa mel bo semal Llulupal Temarong irel lobola ye Hartael Santus, we ye mel lal tento we te foruyel pol yarmat, bo foruyel Deus.
3 Panger llulupal temarong ngo Deus ye duwler bo rebe ma fang kkefang, ngo re tap maligach mael ngal Deus. Iwe ngo Llulupal Temarong le yach ila ye tugul le yebe yor mele yebe tap maligach. 4 Hare ye wochog bo iy ye mel woal talop ngo ye towe mel bo semal temarong, bo ye faesul yor temarong kala rema fefang maligach bo ye tugul le rebe dabey Hatobtob we yar Jews. 5 Yengang ka temarong ka rema foru ila ye igegili, ngo hal ila yete halongol hafedeg ngali ikla ye mel wol laeng. Yengang ka re foforu ila igegili chog mokwe Moses ye foru. Bo yodwe ye bele foru Tento we liliyel bogtag we ngo Deus yesa kangalu bo, “Hafalli chog bo hobe foru pangal formel le be dabey chog molwe isa kkewar ngalug mo wol tayit we.”Ex 25:40 6 Iwe ngo yela igla ngo yesa fang ngal Jesus yengangel temarong la ye tagiyet ngo ye palleng fal mo imol iy kala yar. Ye wochog bogtag we ye ffaor llepedal Deus mo mekla lol le ye momay tangi iwe Moses ye foru, bo Deus le yesa foru bogtag le yesa hatugulu ngalir yarmat le yor mekla ye palleng momayel le yebe budoh.
7 Hare tor derel molwe metamol bogtag ila ngo tor pelal iye harwowal. 8 Iwe ngo Deus ye sor bo resa tayikof mekla lol irel yodwe ye sor bo,
“Samol yesa sor bo, yesa harep yodla iy bele faor tefaeli sew bogtag mo llepdemem mo yarmetael Israel mo yarmetael Judah.8:8–12; Jr 31:31–34 (LXX)
9 Tewa wochog bogtag we iy foru ngalir chapdoh kowe yar,
irel yodwe iholu payur isa palirwey mo wol Egypt.
Rete itol deper irel bogtag we ha foru fengali,
iwe isa ttahcherloh.
10 Ila iye bogtag le ibele foru ngalir meka yarmetael Israel lal ral ka bele budoh,
yalol Samol yal sor: ibele yetolong hatobtob ka yai lal yar luluwal,
ngo iy tefalong lal mekla buler.
Iy bele mel bo yar Deus
ngo ir re bele mel bo layi yarmat.
11 Tayor pelal le semal ir yebe chil foloyu
ngal choluwal hare chol faluyal le yebe sor bo, ‘Hobe yitli Samol le iy Deus.’
Bo panger ngo re bele golayey le be chap mo irer ika re hartal totol,
yesa bidah irer ikla re hartael tagiyet.
12 Yebe ffaho depey ngalir irel mekla molfidir,
ngo tayor fael sew le ibe chil luluwaley mekla ye tayikof le re foru.”
13 Irel yael Deus kapta bogtag le ye tefoy, mele yesa habaaliloh iwe metamol bogtag; ngo pangal meka sa ssulay le yesa baa, ngo towe ssulay ngo yebe torloh.