16
Jesus We Ye Molow Tefael Mo Irel Maes
(Matthew 28:1–8; Luke 24:1–12; John 20:1–10)
1 La wol miril Sabbath ngo Mary Magdalene, Salome mo Mary we sil James re sala chuway loy bo re bela chalfi ngal molwe porgol Jesus. 2 Lemaliyelel ralawe Sunday irel yodwe ye moch tehach yaal ngo resa loh irel pey we. 3-4 Yodwe re loloh ngo resa kekasiy fengal le re sor bo, “Itey le bela hatapulu ngalgich peltal pey we?” (Sew porow le hasfalu mala lepal.) Iwe rela kalloh re sala wiri porow we le sa faesul tapol tang hatmal pey we. 5 Rela bulong lal pey we ngo re sala wiri semal tarmal le ye maroro rela gilemra irer le ye mengag irel sew mengag le ye bech, iwe ngo sa budoh yar motog.
6 Iwe yesa kangalur bo, “Ha towe motog! Igula le hami ha memeri Jesusel Nazareth we re krudu. Ye taymel iga bo yesa molow tefael mo irel maes! Ha kalloh, iga loboswe re itol iyang. 7 Ha loh ha bela kangalur mokwe re dabeyal mo Pedrus hapatpat le: ‘Ye bele hamoloh mo imomi wol Galilee, ngo ila lobosla ha bela wiri mo iyang le sa faesul kangalugmi.’ ”Mt 26:32; Mk 14:28
8 Iwe resa buyoy mo lal pey we, resa ddar le sa ccheloh ngulur ngo re motog. Ngo tor mele re kangalur yarmat bo resa rusmes.
IYE MELE METAMOL HAYGUGUL LOH EBANGELIUM LE*IYE MELE METAMOL HAYGUGUL LOH EBANGELIUM LE: Yor tot babior kowe ye ffaor muswe mo Bible kala re hadayu ngal yalol sew mo sew fulu le ye tamel mele haygul loh Ebangelium le iyang (verses 9–20).
Jesus Ye Llah Ngal Mary Magdalene
(Matthew 28:9–10; John 20:11–18)
9 [Lemaliyelel Sunday mo wol miril yael Jesus molow tefael mo irel maes ngo ye mwoal llah ngal Mary Magdalene we iy Jesus ye hachuya moniyan kowe fismol mo uwol. 10 Yesa loh sala kangalur mokwe chilal le re tetang luwul tayikofel lal deper. 11 Yodwe rela rongrong we Mary Magdalene ye sor bo ye wiri Jesus le yesa molow tefael ngo rete chepar ngali.
Jesus Ye Llah Ngal Rumal Mokwe Re Dabeyal
(Luke 24:13–35)
12 La wol miril mele ngo Jesus sa llah ngal rumal mokwe re dabeyal ngo ye semat igegel yal llah ngalir irel yodwe re dedarloh luwul fuluy. 13 Rela tefael le rela kangalur ikowe sibis ngo rete chepar iyang.
Jesus Ye Llah Ngalir Chowe Seg Mo Semal
(Matthew 28:16–20; Luke 24:36–49; John 20:19–23; Acts 1:6–8)
14 Yela wol miril loh ngo Jesus sa llah ngalir mokwe re dabeyal we seg mo semal irel yodwe re momongoy iyang. Iwe ngo yesa kaftoroy ngalir bo tay luglug lal deper irel mokwe ye kangalur. Ye mmay mekla repiyer bo rete chepar ngalir rechokwe resa wiri Jesus le sa molow tefael mo irel maes. 15 Iwe sa kangalur bo, “Ha roloh lal faileng le bo ha bela foloyu Ebangelium le ngalir panger yarmat.Ac 1:8 16 Semal le yebe chepar ngo yebe baptismus ngo yebe daor. Ngo semal le yebe te chepar ngo rebe hagre. 17 Rechokla resa chepar ila sa yor kkaler le yebe llah mo irel yar bele hachuchuy moniyan le irel mele idey ngo re bele gola yalol sew mo sew laam. 18 Iwe ngo haramwo re holu parchoyoh ka hare re mongoy suup ngo tor mele rebe foru. Iwe ngo rebe yetedah payur uwor chotomay ngo yebe chuy yar tomway.”
Jesus Le Ye Loh Woal Laeng
(Luke 24:50–53; Acts 1:9–11)
19 Wol miril yael Jesus hapatpat ngalir ngo yesa loh woal laeng sala mel rela gilemra irel Deus.Ac 1:9–11 20 Iwe ngo mokwe re dabeyel Jesus resa loh re sala foloy fedal pangal lobos ngo Samol ma tipingir bo yebe tugul le foloy kala yar ila ye katos le ye lah mo irel kkemal kala re foforu.]
IYE MELE HARWOWEL HAYGUGUL LOH EBANGELIUM LE†IYE MELE HARWOWEL HAYGUGUL LOH EBANGELIUM LE: Yor tor babior kowe ye for muswe mo Bible kala re hadayu ngal yalol sew mo sew fuluy le re hasi momol le ye mochoch mo irel haygul loh Ebangelium le resa chila ngal momol we ye lelay (verses 9–20).
[Fefel kowe resa loh irel Pedrus mo mokwe wol marerel re sala kangalur pangal loh mokwe resa rongrong. Yela wol miril mele ngo spegil iy Jesus sa fang ngalir mokwe re dabeyal pedal hapatpat la ye santus le kaptal molow la tor siyal.]
*16:8 IYE MELE METAMOL HAYGUGUL LOH EBANGELIUM LE: Yor tot babior kowe ye ffaor muswe mo Bible kala re hadayu ngal yalol sew mo sew fulu le ye tamel mele haygul loh Ebangelium le iyang (verses 9–20).
†16:20 IYE MELE HARWOWEL HAYGUGUL LOH EBANGELIUM LE: Yor tor babior kowe ye for muswe mo Bible kala re hadayu ngal yalol sew mo sew fuluy le re hasi momol le ye mochoch mo irel haygul loh Ebangelium le resa chila ngal momol we ye lelay (verses 9–20).