1 Iabialam Paulo, Sailas a Timoto, wabim zogometa Tesalonikage muige Baba Ad a Ople Iesu Keriso. Adira omar a mapodan wabim. 2 Ki gair kerkerge Adi eswao wabim waikelare waba nei odarabgelare kerbi erkepasamge. 3 Kiki mena wabi wadikepwalare meriba Ad a Baba opem waba dorge owaturge, waba meregsusapit omarge a wa barkak erkepwaikoslare abim meriba Ople Iesu Keriso. 4 Buai, Adide wabi omarge dikereda, ki umele dale E wabi ditutirda, 5 Ableglam ki debe mir wabim taisa nole no mir tebteb epe sasrim ko ableglam able mir barkak ike. Wa umele ki nako waurder nade ki wabi doge wadale wabi debeleem. 6 Wa kerbi doge a Oplege takmeirda. Wa asiasi tidigida a wage mir erpeidarda a sererge baprekerda Lamar Zogolam. 7 Able gair legize mir irmireda Masedoniage a Akaiage mokakalam pe wawa ikereda. 8 Oplera mir wabialam ebrerdi nole Masedoniage a Akaiage tebteb epe waba owatur Adi doge able mir ko ebrerdi gair gedge. Nole pa kerbim dike ki waderle daratagrare wabi owaturlam, 9 Ableglam wader legize kerbi detagreda wa nako wa kerbi derepda a wa nako wa Adim batarda able bes adilam ko agekar a idid Ad irmireda 10 a iako able werem dikailare mena e kotorlam watabakamu: abra werem Iesu ge e abi eudlam ikiamda a e merbi degderapda adud bodomalam pe tikaseredi.