1 Able au lar kemlam Zona erkepasameilu taba Ople Agudim. 2 E detauti, “Muige kari adud paikaige ka Agudim ererekri a E kara erer terpeida. Ka ererekri au muimui eudle paierlam a Ma kara erer tasri. 3 “Ma kari au karemge natimeda au muikakarem, nade able podagadgize kari narpomerda a mara dugdug zeuber kari tumge baraplare. 4 “Kage natkarti: “Mari erkeplam kari adem namarikdarda, ka umele ka iako erkepnakereder Mari zogozogo metaem. 5 “Able nide kari kemerkemer natkami eud maike, aukaremira mui kari nairumada. Meo kari kerimge arpomreder. 6 “Ka baitri nade paserira sip tadaramar, able gesepem ge kari kar narker niaiem epe mama kari nagimedari eudlam Ople ae kara Agud. 7 “Nade kara eded adem dorier, kage Mari nakepwari, Ople, a kara erkepasam baurwari Marim Mari zogo utebem. 8 “Netiba pe tag arsirarsir agudem kemerkemer tababu baiswereda, wipe bapekda Agudi upiatidarlam. 9 “Marim iaka auspirwed dakrier a ka iako Marim zegulu agimulu a kara nalu mir geka Mari nakwari kai akailu sikak obai. Azimwaret tikase Opleilam.” 10 A Oplelut able lar au aler detagri a ege Zonai adem ikeida watwet gesepge.