6
1 Abele iobaru, Iesu bakeam kei apek Galilaia keper ge, pe Tiberia.
2 Gaire le netate gedim abi irmili, abelelam uiaba dasmerare gaire atamelam E ekere, tumem gaire gim le.
3 Iesu paserem ogi, a kemem emri abara kaimeg giz.
4 Paseka maike, nerute Iudaia giz ra uetpur.
5 Iesu etilu, a gaire le lakub dasmer abim tabakeuare, E Filipo detaut, kega, Meriba nagelam leuer terapei, ko uiabi darasisiare?
6 E detager abele ko abi mirem: epe E umele abele lu ko ikeli.
7 Filipo abi detaut, kega, Nole uiaba abkoreb abele leuer terapei tu handed denari, iauaekai uiaba nagri kebi leuer mog.
8 Nerute abara kaimeg giz, pe Anederea, Simona Peteru ra keimer, abi detager, kega,
9 Nerute makeriam ike nagri faif areto kon, a neisi lar: epe nako dali uiabim gaire le lakub mokakalam?
10 Iesu detaut, kega, Gaire le bameri. Au soge dali. Epe gaire kimiar bameri, mokakalam faif thausan etag.
11 Iesu gaire areto ekau; emetu esoao, E kaimeg giz naisuerare, a uiaba gaire le bamer naisuerare; a neisi lar ko, abkoreb uiaba lag.
12 Uiaba kem osmeda, E abara kaimeg giz detager, kega, Gaire leuer mog etagarare, a nole nerute lu adem.
13 Uiaba etagerare, a gaire tuelf epei artare, abele gaire mog areto kon faif, kaier uiaba leuer aroem.
14 Emetu gaire le dasmer abele atamelam Iesu de ikeli, uiaba detager, kega, Ageakar, perofeta idali, emetu detaut ko uatabu gesepem.
15 Iesu umele uiaba ko elele abi egaret, ko abi ekairare opole, E iako gumik bakeamulu paserem.
16 Kikem, abara kaimeg giz keperem batueri;
17 A nar ge bateri, a atiem keper ge datuperti Kaperenauma ge. Ki ge, Iesu nole uiabi dog tabarki.
18 Keper au zauber au uaglam.
19 Emetu uiaba uzer mokakalam tuente faif a therti gaire setadia, uiaba Iesui dasmer tumem keper ge ekase, a maike nar ge: uiaba geum.
20 E uiabi detaut, kega, Kakanali; uaba nole geum kak.
21 Uiabi sererge abi tigemertare nar ge ekauerertare; epe uiaba sobkak ia karida ab ged ge uiaba atiem.
22 Idim ge, gaire le lakub nerute apek ekue, a dasmer nole nar kak abele, epe abele nar tepteb abara kaimeg giz ekauerertare, Iesu nole uiabi kemem ekauererti nar ge, ege abara kaimeg giz tepteb atiem,
23 (Gaire nar barkarki Tiberialam, maike abele uteb uiaba areto eroare iobaru Iesu de esoao):
24 Emetu le lakub dasmerare Iesu nole akar pedali, pako abara kaimeg giz, uiaba gaire nar ge batiri, a Kaperenauma ge atiem, Iesu deraimerare.
25 Uiaba abi erdali kei apek abele keper, uiaba abi detaut, kega, Rabi, ma ge tabarki na gerger ge?
26 Iesu uiabi detaut, kega, Ageakar, ageakar, kaka uabi detagereda, Uaba nole kari naraimeli abelelam uaba dasmer gaire atamelam, mamaro uaba areto eroarem, a kem osmeda.
27 Nole sagim kak buzbuz leuer, epe mamoro niai leuer, a tabarki eded aseamur kak, Le la Uerem ko uabi ikuar; abelelam Baba, pe Ade, abi detakobi.
28 Uiaba abi detaut, kega, Nalu keriba dorge, ki ko ikeli Ade ra dorge?
29 Iesu uiabi detaut, kega, Ade ra dorge peik, ko oituli abim, E temarida.
30 Uiaba abi detaut, kega, Nalu atamelam mama ikeli, ki ko dasmer, a marim oituli? nalu mara dorge?
31 Keriba kaied mana erolare soge purge; mokakalam emetu detali, kega, E uiabi areto nakuarare kotorlam ko eroare.
32 Iesu uiabi detaut, kega, Ageakar, ageakar, kaka uabi detager, Mose nole areto uabi ikuar kotorlam; epe mamoro kara Aba uabi dekuarda areto kar kotorlam.
33 Abelelam Ade ra areto dali kotorlam tabi, a eded nakuarare gesepem.
34 Uiaba abi detaut, kega, Kole, keribi dekuarare areto dali.
35 Iesu uiabi detager, kega, Kaka eded areto: abele le karim tabakeam, E nole iako uererge: abele le karim oituli, E nole iako ni ap.
36 Kaka uabi detagereda, kega, Emetu uaua kari nasmereda, pe nole uatur kak.
37 Ui uridili Baba de kari nakuar ko karim tabakeuare; abele le karim tabakeam, kaka nole abi atua kak.
38 Abelelam kaka nole kotorlam tarabu ko ikeli kara lag, mamoro abara lag, E kari namarida.
39 Baba ra lag peike, kari namarida, kega, Kaka nole nerute dekaerti, E kari nakuar, epe kaka ko ekiamda keubu gerger ge.
40 Abara lag peike, kari namarida, kega, Gaire le uridili Uerem dasmerare, a abi oituli, uiaba eded nagri aseamur kak: epe kaka ko uiabi nakiamda keubu gerger ge.
41 Iudaia le giz abi gumik mer atagere, abelelam E detaut, kega, Kaka areto kotorlam tarabu.
42 Uiaba detaut, kega, Nako, nole Iesu pedali, Iosefa ra uerem, pe nako, meriba nole umer kak abara aba a apu? nalugem E detaut, kega, Kaka kotorlam tarabu?
43 Abelelam Iesu detaut, a uiabim detagereda, kega, Uaba nole gumik mer atager kak.
44 Le nole umer kak karim tabakeam, ese nole abi egared Baba de, kari namarida: epe kaka ko abi ekiamda keubu gerger ge.
45 Emetu detali gaire perofeta ge, kega, Ade de uiabi uridili nereuereda. Gaire le uridili asereda Babalam, a emetu nereuereda uiaba karim tabakeuare.
46 Nole nerute le Baba dasmer, mamoro E Adelam, E Baba dasmer.
47 Ageakar, ageakar, kaka uabi detagereda, kega, Abele le karim oituli, E nagri eded aseamur kak.
48 Kaka eded areto.
49 Uada kaied mana erolare soge purge, uiaba baumer.
50 Abele areto kotorlam tabu, ese le eroli, E nole eud kak.
51 Kaka eded areto kotorlam tarabu; ese le eroli areto peik, E ko eded niai karem: abele areto kaka ko ikuar, abele kara gem, kaka ko ikuar ueakai gesepem eded.
52 Iudaia le giz basaredelare, kega, Epe nalu le dali ko ikuar abara gem aroem?
53 Iesu uiabi detaut, kega, Ageakar, ageakar, kaka uabi detagereda, ese uaba nole eroli Le la Uerem ra gem, pako abara mam ere, uaba nole eded kak muige uaba nerkep ge.
54 Abele le kara gem eroli, pako kara mam ere, E nagri eded aseamur kak; epe kaka ko abi ekiamda keubu gerger ge.
55 Abelelam kara gem leuer kar, a kara mam ni kar.
56 Abele le kara gem eroli, a kara mam ereli, E muige kara nerkep ge, a kaka abi nerkep ge.
57 Mokakalam Baba eded kari namarida, a kaka ko eded Babalam: mokakalam abele le kari naroli, E ko eded karielam.
58 Abele areto kotorlam tarabu: nole mokakalam kaied giz erolare, gako baum: abele le areto idali eroli ko eded niai karem.
59 E abele gaire lu detagereda muige sunago, E nereuereda Kaperenauma ge.
60 Gaire abara kaimeg giz abele asarare, uiaba detager, kega, Beber abele mer; nete umele asoli?
61 Iesu umele, taba nerkep ge, abara kaimeg giz gumik mer atager abele, E uiabim detaut, kega, Nako, abele uabi bamsili?
62 Nako, ese uaba dasmer Le la Uerem abara emeret utebem ogi?
63 Lamar de idgiri, gem nole lu kar: abele gaire mer kaka uabi detagereda, lamar pedali, pako eded.
64 Uader uabielam nole oatur kak. Iesu umele gizlam uiaba nole oatur kak, a abele le abi keserkeser.
65 E detaut, kega, Abelelam kaka uabi detagereda, le umer kak karim tabakeam, ese nole abi ikuar Baba de.
66 Abele merlam, gaire abara kaimeg giz iako takomeda, a nole abi kemem bakeam.
67 Iesu tuelf le detagereda, kega, Nako uaba ko laglag akomeda?
68 Simona Peteru abi detaut, kega, Kole, nitim keriba bakeam? mari dog gaire eded mer aseamur kak.
69 Ki oituli, a opasereret, mama Keriso, Ade ra Uerem niai eded.
70 Iesu uiabi detaut, kega, Nako kaka uabi iterare tuelf le, a nerute uaba diabolo?
71 E Iudalam detager, Simona Isakariota ra uerem: abelelam E ko abi keserker, E nerute tuelf lelam.

Public Domain