1 Kaka uina kar, kara Aba uina paret le.

2 E ko ismi gaire tam kari dog nole turum kak: a gaire tam turum turum E ko paret, ueakai au turum.

3 Uaba peirdi kerkar, kara merlam kaka uabi detager.

4 Uaba bameri kara nerkep ge, a kaka uabi nerkep ge emri. Mokakalam tam nole umer kak tababu turum, ese nole ekpi uina ge; a mokakalam uaba nole umer kak, ese nole kara nerkep ge bameri.

5 Kaka uina, uaua gaire tam: Abele le kara nerkep ge emri, a kaka muige abi nerkep, E dali ko au turum: abelelem uaba umer kak nerute lu ikeli ese kaka muriz ge.

6 Ese nerute le nole kara nerkep ge emri, debele abi adem ismi mokakalam tam, ueakai uatuet: gaire le etkemet, a urem dikri, a urem.

7 Ese uaba kara nerkep ge bameri, a kara mer uabi nerkep ge tarageri, ua ko damsare gaire lu uaba lagelag, ueakai ikeli uabim.

8 Babim despereda, ese uaba au turum turum; iauaekai uaba kara kaimeg giz.

9 Mokakalam Aba kari omare, abkoreb kaka uabi omare: kara omare ge niaiem tekue.

10 Ese uaba kara gelar irmili, uaba ko niaiem tekue kara omare ge: mokakalam kaka Baba ra gelar irmili, epe kaka niaiem tekue abi omare ge.

11 Kaka emetu uabim detaut abele gaire mer, ueakai kara sererge niaiem tekue uabi nerkep ge, ueakai uaba sererge kemerkemer.

12 Kara gelar peik, kega, Uaba ko omare uabu, mokakalam kaka uabi omare.

13 Ese nerute le abara eded ikuar taba boai bodomalam, nole nerute le la omare aule tumem ike.

14 Ese uaba ikeli gaire lu kaka uabi mer tigri, uaba kara boai.

15 Kaka nole iako uabi detager uaba memeg le giz; abelelam memeg le umer kak abele lu abara opole ikeli: kaka detaut uaba kara boai; abelelem gaire lu uridili kaka asoli kara Abalam, kaka uabi detomeret.

16 Uaba nole kari natarare, epe kaka uabi ditararda, a uabi depegereda, ueakai ua bakuare turum turum, a uaba turum niaiem tekue: ueakai Baba de ua dekuarare gaire lu uridili ua abi damsare kari neilam.

17 Kaka abele uabi mer tigri, iauaekai ua ko uabu omare.

18 Ege geseb ge uabi derar, uaba umele emetu kekiam kari derar, uaba keubu.

19 Ese uaba geseplam, geseb ko lagelag abara boai: abelelam uaba nole geseplam, epe kaka uabi depegerare geseplam, abelelam geseb uabi derar.

20 Dikiaporare kara mer kaka uabi detager, kega, Memeg le nole aule tumem abara opole. Ese uiaba emetu kari natkoli, uiaba ko uabi dedkoeda; ese uiaba emetu kara mer erpei, uiaba ko uaba mer erpei.

21 Abele gaire lu uridili uiaba uabim ikeli kara neilam, abelelam uiaba nole abi umer kak kari namarida.

22 Ese kaka nole tarabu ko uiabi daratagerare, uiaba nole uit kak: peirdi nole nerute lu ko uiaba uit batkamda.

23 Abele le kari naorar, E kara Abet naorarti.

24 Ese kaka nole ikeli gaire lu uiaba opem, nole nerute le ikeli, uiaba nole uit kak: peirdi uiaba kari nasmer, a kari naorti, pako kara Aba ko.

25 Iaueakai bakedida abele mer detali uiaba gelar ge, kega, Uiaba no kari naorarti.

26 Ese Upiatidar tabarki, kaka ko uabim emarida Abalam, pe ageakar Lamar, uatabu Abalam, E ko karim ageakar.

27 Uaba ko karim ageakar, abelelam uaba kari dog emri gizlam.