1 Iesu emri nerute uteb ge, ege E esorerapare, eseemuda, ege nerute abara kaimeg giz, E abi detager, kega, Opole, debele ma keribi dereuerare abele esorerapare, mokakalam Ioane de tabara kaimeg giz nereuerare.

2 Ege E uiabi detager, kega, Ua esorerapauem mokakalam, kega, Keriba Aba kotor ge, zogoem mara nei. Mamoro mara baselaia sepem uatabu. Ikeroa mabara lag abele geseb ge, mokakalam kotor ge.

3 Keribi ikuar leuer, nerute gerger a nerute gerger, keribi abkoreb.

4 Adem dikri keriba uit; abelelam keribibu dikri ui uridili keribi dedkoeda. Nole keriba tegeredare abele mirem, epe keribi ditkedarare uitelam.

5 E ge uiabi nautumerare, kega, Nete uaba tebud, E bakeamulu eipu ki ge, E abi detager, kega, A ma tais neisi netat areto, keubu iako bodomalam;

6 Abelelam, kara tebud emetu tabakeam, a kaka nole leuer kak abi ikuar;

7 E ge abi detager, muige taba meta ge, Nalu ma kari naogatili: emetu peike meta dimiredare, emetu ki eididare omaskerkem; kaka umer kak nakiamlu mari nakuare?

8 Kaka uabi detager, kega, Ese E nole ekue abi ikuar, abelelam abara tebud, epe E ikuar gaire lu uridili E laglag, abelelam E elele damosi.

9 Kaka uabi detager, kega, Debele uaba damos, ueakai uaba nagri; uaba deraimer, ueakai nagri; uaba mudmud, E uabi diski.

10 Abelelam, ese le abi damos, E nagri; le deraimer, a erdali; le mudmud, E abi diski.

11 Ese uerem areto damos tabara abalam, nako E abi baker ikuar? Ese abi damos nerute lar, nako E ikuar tabo, a nolea lar kar ikuar?

12 Ese abi damos kalkal ra uer, nako E ikuar bokani, a nolea ikuar kalkal uer?

13 Uaba adud tonar, ese uaba umele gaire debe lu naisuerare uaba omasker, mokakalam uaba Aba, emeri Kotor ge, E uabi uadekuarare Lamar Zogo uaba damos?

14 E imud nerute demoni, ege E te dabimdabim. Ege demoni baos abielam, ege E mer etkalu, abele le te dabimdabim; ui ge gaire le giz abi damerare.

15 Uader le batagelare, kega, Belezebul, demoni giz opole, abelelam E umeli demoni imud.

16 Uader le giz abi mirem, ege uiaba abi deraimerare atamelam kotorlam.

17 Ege E opasereret uiaba dikiaporare, E uiabi daratagerare, kega, Gaire baselaia uridili epuli eseamuda; pako boai epuli nolea niaiem ekue.

18 Ese Satana tababu barili a epuli, nako E umele niaiem ekue, pako abara baselaia? abelelam, pe ua detager, kega, Belezebul, abelelam ka demoni imuda.

19 Ese kaka namuare demoni Belezebuloelam, netide uanamuare demoni giz a uaba omasker giz? abelelam keubu gerger ge, uabi uaditimerare.

20 Ese Ade ra tag kaka imud demoni giz, ege Ade ra baselaia emetu tabaruka.

21 Ese saserim le nagri ares lu taba meta uanaseseredauem, ia atko kak lu uadaragiri:

22 Ese au saserim le uatabakeamu abi uaekesmer, abara ares lu uadais, E au oituli tabara ares lu.

23 Ese nerute le nolea kari la kak, E nolea kari kemem; ese nerute le nole etami kari dog okakis, E tabara lu derapei.

24 Ese lamar uit obaos lelam, E degemli uatuet uteb, ege E deraimer nerezi uteb; nolea uteb kak, ege E detager, kega, Kai ko tarakomelu karba meta, emeret kaka emeri.

25 E bakeamulu taba utebem ge, erdar emetu dirup esemulu.

26 Ege E bakeamulu, taraisare uader sefen lamar, ui au adud abi tumge; a bakeuare barot muige, a bamer: ege E au adud abele le la mop, abele gerger ge ditimedelu.

27 E detager abele lu, ege nerute kosker ge, E ereretikri, eipu le lakub, a abi detager, kega, Uerkab ma E osmeda abele kemlam, pako abele nano ma ereli.

28 E abi detager, kega, Ageakar, E uerkab abele le asoli Ade ra mer, E asesereda.

29 Ege gaire le lakub abim tabakeuare, ege E uiabi daratagerare, kega, Abele nosik au adud; uiaba deraimerare atamelam; a nolea atamelam kak, no abele atamelam Iona perofeta tepteb.

30 Abelelam, mokakalam Iona abele atamelam Nineua ge, abkoreb Ade ra Uerem abele nosik.

31 Abele kosker, opole ziai apek, E ekue okakis nosik le ge, abuar ge E uiabi nautumerare, a uiabi bodomalam: abelelam E tabakeam bazmirare ge, E lagelage ueasiri Solomona ra pardale; dasmer, ike abele nerute le, E au kale tumem Solomona.

32 Ui ge bako Nineua ge, abele gerger ge uanautumerare abele nosik, E uiabi bodomalam: abelelam uiaba obazgeda Iona ra marau; dasmer, ike abele nerute le au kale tumem Iona.

33 Nolea le emetu disirik lamepa, E ikedilu lokod ge, pako agud saito ge, E ikedi tumge, iaueakai uadatki gaire le emeri be ge.

34 Pone lamepa ra gem: ese mara pone debele, mara gem uridili nagri datki; ese mara pone adud, a mara gem nolea datki kak.

35 Marim, nole kupkupi datki muige mari dog.

36 Ese mara gem uridili nagri datki, nole kupkupi kak, E datki uridili, mokakalam lamepa datki mari dog, au bebe.

37 Ege E detaut, nerute Faresaio de abi detager, kega, Kari okakis ereueda: Ege E balu, E emerilu ero.

38 Ege Faresaio de abi erdar, ege E damerar, abelelam E no eroli, nole tag ogarup kak.

39 Ege Opole abi detager, kega, Uaba Faresaio uaba dirup abele tanelu ge pako abele kumeti; epe muige pe mitkar poipi a adud tonar.

40 Uaba paim paim! Le ikeli sor ge, pako muige?

41 Debele ua aisare uaba lu omare; dasmer, gaire lu uridili uaba ogdirup.

42 Uaiai uaba Faresaio giz! abelelam ua aiseda ten mili, pako pekano, pako gaire lu uridili nagri nur ge, a ua dekaerta Ade ra itimer, pako abara omare: abkoreb ikeli abele lu, a nole dikaer abele lu.

43 Uaiai uaba Faresaio giz! abelelam ua au lagelag bao aule sunago ge, pako omare gizakos uteb.

44 Uaiai uaba aotale pako Faresaio, ua bes le giz! abelelam uaba mokakalam ao giz espi, ese le tumem uadegemeli, umer kak.

45 Epe nerute gelar giz, ereuer le, E abi detager, kega, Ereuer le, mama keribi dedkoeda, mara mer peike keribim.

46 Ege E daratagerare, kega, Uaiai uaba gelar giz ko! abelelam uaba nole dekmerik uaba lu uaba no ikuar nerute le, uaba tag pem nole.

47 Uaiai uaba! abelelam uaba ao emorare perofeta, a uaba kaied giz a uiabi ipit.

48 Epe uaba etomeret tonar uaba kaied giz, pako sererege: abelelam uiaba ipit, a uaba emorare uiaba ao.

49 Ege Ade ra pardali detaut, Kaka uiabi namarida perofeta pako aposetola giz; uiaba uader ipit a uader damrik;

50 Iaueakai abele nosik deraimer gaire perofeta ra mam, babused abele kerker ge ditimedelu geseb ge;

51 A ditimed Abela ra mam bakedida Sakaria ra mam, uiaba ipit eipu neres ge, maike Zogo meta: ageakar, kaka uabi detagereda, kega, E deraimerare abele nosik.

52 Uaiai uaba gelar giz, ereuer le! abelelam ua aisare ki pardar: ua nole barot, a ua daisumda uader lagelag barot.

53 Ege abele mer E uiabi detager, uiaba aotale a Faresaio giz au ueku; uige abi mirem itimerare gaire lu gem;

54 A ui ge deraimerare abara merem E ua detaut, a ui ge natomertare.