22
1 Ege maike uetpur, areto nole aber kak, abele nei atker Paseka.
2 Zogozogo le, pako aotale giz uiaba deraimerare nalu tonar uiaba ko abi ipitare; abelelam uiaba au geum abele ged.
3 Ege Satana balu muige Iuda, nei atker Isakariota, abara nerkep, E nerute tuelf le.
4 E bakeamulu zogozogo le a pako ares kerem le, a uiabi daratagerare, kega, Nalu ka akailu, iaueakai abi keserkeser uabim?
5 Ege ui au sererege, a abi detagerare ko abim mani naisuerare.
6 Abara nerkep au sererege, E ditimedelu abi deraimer, na uarge umele abi keserkeser, a abi uiabi uanatomeretare, a nole lekub kak.
7 Ege abele gerger, areto nole aber kak, tabarki, abkoreb paseka ipit.
8 Ege E uiabi namariklu Peteru a Ioane, a daratager, kega, Ua bakeamulam derseram abele paseka, abkoreb meribim mi aroare.
9 Epe uiaba abi detager, kega, Na uteb ge mama lagelag ki derserei?
10 Ege E uiabi daratager, kega, Dasmeram, ese ua erdariei abele uteb muige, a ua op nerute le dipitiei, E ais nini tarpor; a ua abi irmirauam abele meta ge obaoa.
11 A uaba itimer boai kemle, Ereuer le mari detager, kega, Nade suble la uteb, paseka derser ki aroare, kaka pako kara kaimeg giz?
12 Ege E uabi natomelu nerute au uteb kotor, emetu derser: a uaba paseka derser.
13 Ui bakeamulei, a erdarei, mokakalam abara mer: epe uiaba paseka derser.
14 Ege abele haua ge, ui baid eroare, epe abara kaimeg giz tuelf le, E uiabi kemem.
15 Ege E uiabi daratagerare, kega, Kara lag, kaka au lagelag kekiam eroli abele paseka uabim, a kara asias nole tabarki:
16 Abelelam kaka uabi detagereda, kega, Kaka nole ko eroli, kekiam Ade ra baselaia ge eseemud.
17 E tanelu ekao, a esoao, a uiabi daratagerare, kega, Uaba erpei abele tanelu, a uabu nakuarare:
18 Abelelam kaka uabi detagered, Kaka nole eroli uina turum ge, kekiam Ade ra baselaia tabarki.
19 E areto ekao, a esoao, a itur, a uiabi nakuarare, a uiabi daratagerare, kega, Kara gem peike, E uabi nakuarare: uaba ikeli kara atamelam.
20 Ege emetu leuer eroare, a tanelu ekao ko, E uiabi daratagerare, kega, Abele tanelu kerkar tom kara mam, uabim epaitered.
21 Dasmer, kari dog abele laulau ge, nerute le la tag, E kari keserker.
22 Le la Uerem obakeamu mokakalam abim gobarem: epe abele le abi keserkeser, Uaiai!
23 Ui ge ditimedare deraimerare, nete le ikeli abele lu.
24 A uiaba asared, nete le aule.
25 E uiabi daratagerare, kega, Nogle la opole, uiaba opole; uader uiabi sirdam, etomereti uiaba au debe tonar.
26 A uaba nole mokakalam: ese le uabim aule, E mokakalam kebile; ese le sirdamu, E memeg le.
27 Epe nete le aule, nako le eidi eroli, nako memeg le? nako nole le eidi eroli? epe kaka uabi kemem mokakalam nerute memeg le.
28 Epe uaba mamoro emeri kari mirem:
29 Mokakalam kara Aba E kari ikuar abara baselaia, abkoreb kaka uabi ikuar,
30 Iaueakai uaba eroli, a ereli, abele leuer aro uteb kara baselaia ge, a emeri opole bao ge, a itimer Isaraela tuelf nosik.
31 Ege Opole abi detager, kega, Simona, Simona, dasmer, Satana au lagelag uabim, iuaeakai E uabim derser, mokakalam saito derser:
32 A kaka Adim damosi marim, iaueakai mara oituli nole aseemur kak: marim, ese depegeli mara nerkep, a mama au saserim mara le.
33 Ege E abim detaut, kega, Opole, kaka marim okakis bakeamu audubar meta, pako eumida.
34 Ege E abi detager, kega, Peteru, kaka mara natager, kega, Kimiar faul nole ereretikri kak abele ki, a kekiam thri kari nasared ma nole kari umer kak.
35 Ege E uiabi daratagerare, kega, Kaka uabi demarida, uaba nole epei mani, a pako epei, a teter gab, nako uaba nole nerute lu kak? A uiaba abi detager, kega, Nolea.
36 E uiabi daratagerare, kega, Abele lu, ese nerute le nagri epei mani, debele erpei, a pako epei; le nole teibur aosos tulik, debele abara am uali terapei, ko nagri.
37 Abelelam kaka uabi detagereda, kega, Debele karim ageakarem abele lu emetu detar, A okakis etag uader uit tonar le; abelelam pe gaire lu karim emetu detarda maike detomeret.
38 Uiaba abi detagerare, kega, Opole, dasmer, neis teibur aosos tulik. E uiabi daratagerare, kega, Sina.
39 A E bakeamulu adem digemli nerute paser, nei Oliua, mokakalam abara tonar; abara kaimeg giz abi irmilare.
40 Abele uteb ge, E emeri, a uiabi daratagerare, kega, Uaba esorerapare, iaueakai nole mirem tabarki.
41 Ege E bakeamulu adem uiabielam, mokakalam baker murzem batauered; E kokamamu, a esorerapare.
42 E abi detager, kega, Aba, ese ma lagelag, abele tanelu karielam adem: kara lag nole ikeli, debele mabara lag ikeroa.
43 Angela kotor ge abi etomelu, E ikuar saserim.
44 E au asias, a elele esorerapare: abara mereg mokakalam kepmam, E abi sep ge.
45 E emetu esorerapare, a ekueilu bakeamulu taba kaimegem, a uiabi naradarare ui ge utirdeder, uiaba nerkep au beber,
46 E uiabi daratagerare, kega, Nalugelam uaba uteidi? ua bako, esorerapare, iaueakai nole mirem barot.
47 E uiabi meratager, a dasmer, gaire le lakub pako Iuda, nerute le tuelf lelam, E kekiam uiabi dog; a maiem Iesuim, E lagelag eskos.
48 A Iesu abi detager, kega, Iuda, ma keserkeser Le la Uerem, a eskos?
49 Uiaba umele abele lu uiaba ikeli, ui ge abi detagerare, kega, Opole, nako ki uiabi daramerkare abele teibur aosos tulika?
50 Nerute le uiabielam E ipit zogozogo le la memeg le, E dikiam abara tuter laip.
51 A Iesu de uiabi daratagerare, kega, Sina. E itut abara laip, a ko barkak.
52 Iesu uiabim detager, gaire zogozogo le, pako kerem le abele zogo meta ge, pako aule giz, ui tabakeauare abim, Nako uaba karim tabakeauare, gaire teibur aosos tulik, a gabagaba kem, mokakalam deraimerare lugatkamer le?
53 Mi okakis zogo meta ge, gaire gerger, a uaba tag nole kari erpei: a uaba ikeli abele ki, a kupikupi sirdam.
54 A ui ge abi erpeirare, a tegared zogozogo le giz ra meta. A Peteru muriz ge abi irimli.
55 Ui ge ur eskaisirare muige meta ge, a uiaba lokod ge emeri, a Peteru uiabi kemem.
56 Nerute memeg neur, E abi erdali emeri maike ur ge, E dasmer, a detager, kega, Abele le E Iesuim okakis.
57 E abi asared, kega, Neur, kaka nole umer kak abele le.
58 Mena, nerute le ko abi erdar, a kega, Ma uiaba le. A Peteru abi detager, kega, Nolea kaka.
59 Ege emetu netate haua, nerute le lut elele detager, kega, Ageakar, abele le E abi kemem: abelelam E Galilaia le.
60 Peteru abi detager, kega, Kaka nole umer kak abele lu mama detautili. Epe kimiar faul sobkak ereretikri, abele kerker E mer egali.
61 Ege Opole egreemalu, E abi dasmer Peteru. Epe Peteru de ga dikiapor Iesu ra mer ge, abi detager, kega, Kimiar faul nole ereretikri, ma neis netat kari nasared.
62 Ege Peteru adem eosmelu, a au ezoli.
63 Uader uiaba Iesu erpeirare, a abi negneg, a damarik.
64 Uiaba demed abara op, a uiaba abara op erap, a itimer, kega, Ma dikiapor, nete mari ipit?
65 Gaire mer, a uader abi adud meru ikeli.
66 Ege gerger ge, gaire kerem le, abele ged ge, uiaba etami netat uteb, pako zogozogo le giz a aotale giz; epe uiaba abi egared uiabi opem, a kega,
67 Ese ma Keriso kar, ma detaut keribim. Epe E uiabim detager, kega, Ese kaka uabi detager, a uaba nole kari oituli:
68 Ese kaka uabi itimer, a uaba nole kari natautare.
69 E ditimeda peirdi, Ade ra Uerem emeri tuter peik, Ade ra au adigri.
70 Ui uridili abi detaut, kega, Nako mama Ade ra Uerem? E uiabi daratagerare, kega, Karim pe ua abele mer tegareda.
71 A uiaba detaut, kega, Nalugelam meriba iako ko deraimer uader etomereti? abelelam meriba emetu asoli abara mer.