1 Gerger giz barki, E iako Kaperenauma uatabu; ui asereda E muige meta.

2 Sobkak gaire le netate gedim, meta mui osmeda, pako adige; E uiabim Ade ra mer marau.

3 Uiaba abim tabakeuare, nerute le ibibi egardare, neis a neis le abi bakeuarare.

4 Uiaba umer kak abi dog maiem bakeuare mitkarlam: uiaba meta tumge ezagarare E muige, a lemlem ismi, uiaba sik dikri gim le tumge igimrare.

5 Iesu erdarda uiaba oituli, E le ibibi detager, kega, Kara uerem, emetu adem dikri mara uit giz.

6 Uader aotale giz abele emeri, a tababu dikiapor muige uiaba nerkep ge, kega,

7 Nalugelam le dali detager mokakalam? E Ade desauersili, nete le umele uit dikri, Ade tepteb?

8 Sobkak Iesu opasereret muige abara nerkep abele uiaba dikiapor muige uiaba nerkep, E uiabim detager, kega, Nako uaba dikiapor mokakalam muige uaba nerkep?

9 Nako perper, le ibibi egali, kega, Emetu adem dikri mara uit giz; pako egali, kega, Tekue, mabara sik ekau, a bakeamu?

10 Ko uabim paret kak, Le la Uerem adigiri gaire uit geseb ge adem dikri, (E le ibibi detager, kega,)

11 Kaka mari natager, kega, Tekue, mabara sik ekau, a mabara meta bakeamulu.

12 E ekueda, a sobkak tabara sik ekaida, a E osmeda uiaba op uridili; abelelam uiaba uridili damereda, a Ade despili, kega, Meriba nole dasmerauem tonar mokakalam.

13 E iako keper dege degemili; gaire le abim tabakeuare, E uiabim ereuerem.

14 E uteb esaimelu, E Leui, Alefaio ra uerem, dasmer meta dipumeda emeri, E abi detager, kega, Kari narmili, E ekueilu a abi irmili.

15 Abele iobaru, E abara meta ge emeri leuer ero, telona giz a uit le giz kemem emeri Iesui dog, a abara kaimeg giz; abelelam gaire le uiaba abi irmilare.

16 Aotale giz a Faresaio giz abi dasmer kemem leuer ero telona giz a uit le giz, uiaba tabara kaimeg giz daratagerare, kega, Nako E kemem leuer ero a ereli telona giz a uit le giz?

17 Iesu asoli abele mer, E uiabim daratagerare, kega, Saserim le giz lukup kemle lakak, gim le giz lagelag; kaka nole tabarki ko gaire barkak tonar dabgeri, debele gair uit le giz.

18 Ioane ra kaimeg giz, a gaire Faresaio ra kaimeg giz leuer baili; uiaba tabakeuare a abi detager, kega, Nalugelam Ioane ra kaimeg giz a gaire Faresaio ra kaimeg giz leueru baili, a mara kaimeg giz nole leueru baili?

19 Iesu uiabi detager, kega, Nako, umele gaire boai le ispida ko leueru baili, le ispida uiabi dog emeri? uiaba umer kak leueru baili, le ispida mena uiabi dog.

20 Kerker niai tabarki, le ispida uiabielam egared, abele gaire gerger uiaba leueru baili.

21 Nole le kerkar mog uali itkedi okakis buzibuzi am uali; akeulam buzibuzi mog uali de kerkar mog ualilam ekep itkedi, iako au atoatatoat.

22 Nole le epaiteret kerkar uaina muige emeret tarpor giz; epe gegur tarpor giz arperiklam, uaina epaiteredlu, epe sor giz adud: mamor ko kerkar gegur tarpor epaiteret kerkar uaina.

23 Abele iobaru, E ekas kon gedub ge abele sabath; abara kaimeg giz kon itakemarare, a eroarare, gab ge.

24 Faresaio giz abi detager, kega, Dasmer, nako uiaba lu akerare nole abkoreb sabath?

25 E uiabi detager, kega, Nako uaba nole etagerare Dauida de ikeli, leuer aro kak, uerer eudili, a gaire abara kaimeg giz?

26 E Ade zogo meta ge tabalu, Abiatara ra kerker, zogo tarim le, E derser areto eroli, abele nole abkoreb nogle tero, mamor zogozogo le tepteb, E abara kaimeg nakuarare?

27 E uiabi detager, kega, Sabath emetu ikeli le la uai kedeua, a nole le ikeli sabath uaikedeua;

28 Abelelam Le la Uerem sabath ra Opole.