1 Uiaba maike Ierusalema, a Bethefage, a Bethania, abele paser ge Oliua, Iesu namarida neisi abara kaimeg giz, a uiabim detager, kega,

2 Ua bakeamlam abele ged uaba opem: ua abele tabarki, ua ko dasmeram asina ra uerem didbarda, abi sor agimur kak; abi detue, karim tegared.

3 Ese nerute le uabi detager, kega, Nalu uaua ikeli abele? ua detautam, Opole abi laglag: E sobkak abi emarida.

4 Ui bakeamulei, a asina ra uerem erdali abele mai gab ge esakri didbare; ui abi detue.

5 Uader le abele ekue, ui detager, kega, Nalugem ua asina ra uerem detue?

6 Ui ge uiabi detagereda mokakalam Iesu mer tigri: epe uiaba ui namariklam.

7 Uiaba asina ra uerem Iesuim egardale, a uiaba dordor am uali abi sorge dikmerikare; a E abi sorge egimulu.

8 Gaire le lakub uiaba dordor am uali gab ge esegarare: uader lu tam ismi, a gab ge esegarare.

9 Uiaba kekiam le, a uiaba armi le, ereretikri, kega, Hosana; Uerkab abele le Opole ra nei tabarki:

10 Uerkab Dauida ra baselaia, meriba aba, tabarki Opole ra nei: Hosana gaire lu tum ge.

11 Iesu Ierusalema tabarki, a zogo meta ge badari; E deraueilu dasmer gaire lu uridili; kikem E Bethania nakaseredi, kemem gaire tuelf le.

12 Iuaokaer, uiaba tabakeuare Bethanialam, E uerer ge.

13 E suke erdalu muriz ge lam nagri, E bakeam dasmer, ese turum nagri: E abele tabarki, E no lam dasmer; nole tabarki kerker turum.

14 Ege E suke detager, kega, Nole le mara turum aro kak niai karem. Abara kaimeg giz asereda.

15 Uiaba Ierusalema ge tabarki; Iesu zogo meta ge badari, a ditimeda uiabi daratirieda gaire le lu terapeirare zogo meta muige, a bau lu terapeirare eraskida, a uiaba dibadib terapeirare, uiaba gaire sik eraskida;

16 Pako E nole nerute le amari kak tanelu tais zogo meta ge.

17 Iesu uiabi ereuerem, kega, Nako, nole autar kak, Ko kara meta nei atker, kega, Esorerapare meta uiabim gaire le uridili? epe uaba emetu depegereda abele mokakalam baker kur ge uiabim gaire eruam le giz.

18 Aotale giz asereda, a zogozogo le giz, uiaba deraimer ko abi ipit: uiaba abi geum, abelelam gaire le lakub abara ereuer damereda.

19 Gaire kikem, E osmeda ab gedelam.

20 Idim ge, uiaba gab ge ekasered maike abele suke, ui dasmer abele suke ekeamulu giz ge ditimeda.

21 Peteru dikiapor, epe abim detager, kega, Rabi, dasmer, abele suke mama desauersili, abele ekeamulu.

22 Iesu uiabim detaut, kega, Ua ko Adim oituli.

23 Ageakar, kaka uabi detagereda, kega, Ese nerute le abele paser ge mer detager, kega, Ma eupumar, a gur ge baraigida; a nole abara nerkep emarili, E ko egared abele mer E detager, oitulilam.

24 Abelelam, kaka uabi detagereda, kega, Gaire lu uridili uaba damos esorerapare ge, oituli uaba ko nagri, epe uaba ko nagri.

25 Ua taba ko esorerapare, ese nerute le uabi dedkoeda, abi emariklu; iako uaba Aba kotor ge uaba uit emarik.

26 Ese uaba nole emarik, iako uaba Aba, kotor ge, nole uabi uit giz emarik.

27 Uiaba iako Ierusalema takomeda: E muige zogo meta ekasereder, epe zogozogo le giz abim tabakeuare, a aotale giz, a au le giz;

28 A abi detager, kega, Nalu abele sirdam mama ikeli abele gaire lu? a nete le marim ikuar abele sirdam ko mama ikeli abele gaire lu?

29 Iesu uiabi detager, kega, Kai uabim eutumer nerute mer, ese ua kari natautare, kaka ko uabi detagerare abele sirdam kaka ikeli abele gaire lu.

30 Ioane ra bapataiso, nako kotorlam, nako lelam? kari nataut.

31 Ege uiaba mer atagere, kega, Ese meriba detagerare, kega, Kotorlam; ege E detager, kega, Nalugelam uaba nole abi agared kak?

32 Ese meriba detagerare, kega, Lelam: uiaba geum gaire lelam, abelelam gaire le uridili Ioane egared mokakalam perofeta kar.

33 Ege uiaba Iesuim detaut, kega, Keriba umer kak. Iesu uiabim detager, kega, Kaka nole uabi atager kak abele sirdam gaire lu kaka ikeli.